Tikang 1

Mangita sing Maayo nga Laygay

Ngaa importante ini? Sa una nga pagkugos sang mga ginikanan sa ila bag-o mabun-ag nga lapsag, mahimo nga daw indi mahangpan ang ila ginabatyag. “Nalipay gid ako,” siling ni Brett, isa ka amay sa Britanya. “Apang, nahangawa man ako kay sa banta ko indi pa ako handa sa sining daku nga responsibilidad.” Si Monica, isa ka iloy sa Argentina, nagsiling: “Nabalaka ako kon bala mahatag ko ang mga kinahanglanon sang akon bata. Ginpamangkot ko ang akon kaugalingon, ‘Mahanas ko bala sia agod mangin responsable sia nga tawo pagdaku niya?’”

Mahangpan mo bala ang kalipay kag kahangawa sini nga mga ginikanan? Sa pagkamatuod, ang pagpadaku sa bata isa sa pinakamabudlay kag makapalaslaw gid nga hangkat sa tawo. Apang, amo man ini ang makahatag sing daku gid nga kalipay kag kaayawan. Ang isa ka amay nagsiling, “isa lang ang imo oportunidad sa pagpadaku sa imo bata.” Bangod daku ang impluwensia sang mga ginikanan agod mangin mapagros kag malipayon ang ila mga anak, mahimo nga luyag mo gid mahibaluan ang masaligan nga laygay kon paano ka mangin mas maayo nga ginikanan.

Ngaa mabudlay ini? Bisan sin-o pa ang imo pamangkuton, daw may matugda gid kon paano padakuon ang kabataan. Sang una, ang ginagamit nga giya sang bag-o nga mga ginikanan amo ang halimbawa sang ila mga ginikanan ukon ang ila relihioso nga mga pagpati. Apang, sa madamo nga kadutaan karon, naghuyang na ang pamilya kag wala na sing impluwensia ang relihion. Amo kon ngaa madamo nga mga ginikanan ang nagapangayo sing bulig sa propesyonal nga mga manuglaygay. Ang pila nga ginasiling sini nga mga manuglaygay napasad sa maayo nga mga prinsipio. Kon kaisa naman, ang ila laygay nagasumpakilay kag indi madugay, mahimo nga indi na praktikal.

Ano ang makabulig? Pangitaa ang laygay sang Isa ka Persona nga amo ang nakahibalo gid kon paano padakuon ang kabataan. Amo sia ang Manunuga sang tawo, si Jehova nga Dios. (Binuhatan 17:26-28) Ang iya Pulong, ang Biblia, nagaunod sing direkta nga laygay kag praktikal nga mga halimbawa nga makabulig sa imo agod mangin isa ikaw ka mas maayo nga ginikanan. “Laygayan ko ikaw nga ang akon mata yara sa ibabaw nimo,” amo ang saad niya.​—Salmo 32:8.

Ano ang ginalaygay sang Dios sa mga ginikanan agod mapadaku nila ang ila mga anak nga mangin malipayon?

[Blurb sa pahina 3]

“Salig sa GINOO sa bug-os mo nga tagipusuon, kag dili magsandig sa imo kaugalingon nga paghangup.”​—Hulubaton 3:5