Magdiretso sa kaundan

Magdiretso sa listahan sang kaundan

Bagay Bala Sia sa Akon?

Bagay Bala Sia sa Akon?

 Pamangkot sang mga pamatan-on . . .

Bagay Bala Sia sa Akon?

Maghinguyang sing tion agod sabton ang masunod nga mga pamangkot:

Ano nga mga kinaiya ang ginakabig mo karon nga kinahanglanon gid sa isa nga mangin tiayon mo? Sa listahan sa ubos, butangi sing ✔ ang apat ka kinaiya nga sa banta mo kinahanglanon gid.

․․․․․․․․ guapo ukon guapa

․․․․․․․․ mahunahunaon sa espirituwal

․․․․․․․․ mainabyanon

․․․․․․․․ masaligan

․․․․․․․․ popular

․․․․․․․․ matadlong sa moral

․․․․․․․․ palalahog

․․․․․․․․ mahunahunaon sa tulumuron

May crush ka bala sang bata ka pa? Sa listahan sa ibabaw, butangi sing X ang kinaiya nga naluyagan mo gid sa iya sadto nga tion.

WALA sing malain sa bisan diin sa mga kinaiya nga ginhinambitan sa ibabaw. Tanan ini makagalanyat. Apang, wala ka bala nagaugyon nga sang bata ka pa, ang imo lang ginatan-aw amo ang nagua nga mga kinaiya sang crush mo, subong sang makita sa nawala nga kolumna?

Apang, samtang nagahamtong ka, ginagamit mo ang imo ikasarang sa paghantop sa pagbinagbinag sa mas importante nga mga kinaiya, subong sang makita sa natuo nga kolumna. Halimbawa, marealisar mo nga ang pinakamatahom nga dalagita sa inyo lugar indi gali masaligan ukon ang pinakapopular nga solterito sa inyo klase indi gali matadlong sa moral. Kon ‘lampas ka na sa hingurusgan sang pagkapamatan-on’—ang tion nga nagasugod ang mabaskog nga handum sa sekso—pat-od nga indi lamang ang nagua nga mga kinaiya ang ginatan-aw mo agod masabat ang pamangkot, Bagay bala sia sa akon?—1 Corinto 7:36.

Puede Bala ang Bisan Sin-o Lang?

Magaabot ang tion nga indi lang isa ang imo maluyagan. Apang indi puede nga bisan sin-o lang. Kay man nagapangita ka sing isa ka bug-os kabuhi nga tiayon, isa nga magabulig sa imo nga mapauswag mo pa ang imo maayo nga mga kinaiya kag ikaw man sa iya. (Mateo 19:4-6) Sin-o ayhan sia? Antes mo sabton ini nga pamangkot, dapat ‘mang-espiho’ ka anay kag usisaon sing bunayag ang imo kaugalingon.—Santiago 1:23-25.

Agod makilala mo pa gid ang imo kaugalingon, sabta ang masunod nga mga pamangkot:

 Ano ang akon maayo nga mga kinaiya?

․․․․․

Ano ang akon indi maayo nga mga kinaiya?

․․․․․

Ano ang akon emosyonal kag espirituwal nga mga kinahanglanon?

․․․․․

Indi mahapos nga makilala mo ang imo kaugalingon, apang ini nga mga pamangkot makabulig sa imo nga mahimo ini. * Kon mas kilala mo ang imo kaugalingon, mas madali ka makakita sing isa nga labi pa nga magapauswag sang imo maayong mga kinaiya sa baylo sang imo indi maayo nga mga kinaiya. Apang, ano abi kon sa pamatyag mo nakita mo na ang isa nga bagay sa imo?

Magamadinalag-on Ayhan Ini nga Relasyon?

Agod masabat ini nga pamangkot, kilalaha sing maayo ang imo naluyagan. Apang maghalong! Basi tan-awon mo lang ang gusto mo makita. Gani indi magpadasudaso. Kilalaha anay sia sing maayo.

Madamo ang wala nagabinagbinag kon ano gid ang matuod nga pagkatawo sang ila ginadeyt. Sa baylo, maabtik sila sa pagtalupangod sang mga butang nga magkapareho sila: ‘Pareho ang luyag namon nga musika.’ ‘Pareho ang luyag namon nga himuon.’ ‘Pareho ang amon pagtamod sa tanan nga butang!’ Apang, subong sang nahinambitan na, kon lampas ka na gid sa hingurusgan sang pagkapamatan-on, ang dapat mo binagbinagon amo ang nasulod niya nga pagkatawo. Kinahanglan mo hantupon “ang tinago nga pagkatawo sa tagipusuon.”—1 Pedro 3:4; Efeso 3:16.

Halimbawa, sa baylo nga talupangdon lamang mga butang nga magkapareho kamo sing pagtamod, makilala mo sia sing labi pa kon talupangdon mo kon ano ang iya reaksion kon magkatuhay na kamo sing pagtamod. Kon sa aton pa, ano ang iya ginahimo kon indi kamo mag-ugyunay—ginapilit  bala niya ang iya luyag, ayhan ‘nagasilabo sia sa kaakig’ ukon ‘nagapasipala’? (Galacia 5:19, 20; Colosas 3:8) Ukon rasonable bala sia—handa magpaumod para sa paghidait sa baylo nga ipilit ang personal nga luyag?—Santiago 3:17.

Ang isa pa ka butang nga dapat mo binagbinagon amo: Dominante bala sia ukon maimon? Gusto bala niya mahibaluan ang tanan mo nga hulag? “Ang pagkadominante kag kaimon nagapatimaan sing serioso nga problema,” siling sang isa ka lin-ay nga si Nicole. “May nabatian gani ako nga mga magnobyahanay nga nagaaway bangod nagsunggod ang isa nga wala sia pirme ginapahibalo sang ginahimo sang iya kahagugma—sa banta ko mangin problema gid ini.”

Ano ang masiling sang iban tuhoy sa imo nobyo ukon nobya? Ayhan luyag mo istoryahon ang mga tawo nga madugay na nga nakakilala sa iya, subong sang mga hamtong nga kauturan sa ila kongregasyon. Mahibaluan mo kon “maayo ang [ginasiling sang iban]” tuhoy sa iya.—Binuhatan 16:1, 2. *

Dapat Bala Ako Makigbulag?

Ano abi kon marealisar mo nga ang imo naluyagan indi gali mangin isa ka maayo nga tiayon? Kon amo, mas maayo pa nga bulagan mo sia. Ang Biblia nagasiling: “Ang maalam nga tawo makakita sang magaabot nga kagamo kag ginalikawan niya ini.”—Hulubaton 22:3, Maayong Balita nga Biblia. *

Sa ulihi, mahimo makanobyo ukon makanobya ka liwat. Kon amo, pat-od nga mangin mas timbang na ang imo pagtamod—pagtamod nga natigayon mo paagi sa eksperiensia. Ayhan pag-abot sina nga tion mangin huo na ang imo sabat sa pamangkot, “Bagay bala sia sa akon?”

Ang dugang pa nga mga artikulo sa serye sang “Young People Ask . . .” masapwan sa Web site nga www.watchtower.org/ype

[Mga nota]

^ par. 25 Para sa dugang nga ipamangkot mo sa imo kaugalingon, tan-awa ang pahina 30 sang Enero 2007 nga gua sang Magmata!

^ par. 31 Tan-awa man ang mga pamangkot sa kahon sa pahina 19-20.

^ par. 33 Para sa dugang nga impormasyon tuhoy sa pagpakigbulag, tan-awa ang pahina 28-30 sang Abril 8, 2001 nga Magmata!

HUNAHUNAA

▪ Ano ang imo maayo nga mga kinaiya nga magahimo sa imo nga isa ka maayo nga tiayon?

▪ Ano nga mga kinaiya ang ginapangita mo sa isa ka tiayon?

▪ Sa ano nga mga paagi mahibaluan mo pa gid ang batasan, panimuot, kag reputasyon sang imo kahagugma?

[Kahon sa sa pahina 19]

Mangin maayo ayhan sia nga bana?

KINAHANGLANON GID

❑ Paano niya ginagamit ang iya awtoridad?—Mateo 20:25, 26.

❑ Ano ang iya mga tulumuron?—1 Timoteo 4:15.

❑ Ginapanikasugan bala niya karon nga malab-ot ina nga mga tulumuron?—1 Corinto 9:26, 27.

❑ Sin-o ang iya mga abyan?—Hulubaton 13:20.

❑ Ano ang iya pagtamod sa kuarta?—Hebreo 13:5, 6.

❑ Ano nga sahi sang kalingawan ang iya nanamian?—Salmo 97:10.

❑ Ano ang ginapakita sang iya pamayo?—2 Corinto 6:3.

❑ Paano niya ginapakita ang iya gugma kay Jehova?—1 Juan 5:3.

MAAYO NGA MGA KINAIYA

❑ Mapisan bala sia?—Hulubaton 6:9-11.

❑ Makahibalo bala sia mag-uyat sing kuarta?—Lucas 14:28.

❑ Maayo bala ang iya reputasyon?—Binuhatan 16:1, 2.

❑ Ginatahod bala niya ang iya mga ginikanan?—Exodo 20:12.

❑ Mapatugsilingon bala sia sa iban?—Filipos 2:4.

INDI MAAYO NGA MGA PALATANDAAN

❑ Maakigon bala sia?—Hulubaton 22:24.

❑ Ginasulay ka bala niya sa imoral nga paggawi?—Galacia 5:19.

❑ Nagapanakit bala sia ukon maparas maghambal?—Efeso 4:31.

❑ Nagainom bala sia kon gusto niya malingaw?—Hulubaton 20:1.

❑ Maimon bala sia kag dominante?—1 Corinto 13:4, 5.

[Kahon sa pahina 20]

Mangin maayo ayhan sia nga asawa?

KINAHANGLANON GID

❑ Mapinasakupon bala sia sa iya pamilya kag sa kongregasyon?—Efeso 5:21, 22.

❑ Ano ang ginapakita sang iya pamayo?—1 Pedro 3:3, 4.

❑ Sin-o ang iya mga abyan?—Hulubaton 13:20.

❑ Ano ang iya pagtamod sa kuarta?—1 Juan 2: 15-17.

❑ Ano ang iya mga tulumuron?—1 Timoteo 4:15.

❑ Ginapanikasugan bala niya karon nga malab-ot ina nga mga tulumuron?—1 Corinto 9:26, 27.

❑ Ano nga sahi sang kalingawan ang iya nanamian?—Salmo 97:10.

❑ Paano niya ginapakita ang iya gugma kay Jehova?—1 Juan 5:3.

MAAYO NGA MGA KINAIYA

❑ Mapisan bala sia?—Hulubaton 31:17, 19, 21, 22, 27.

❑ Makahibalo bala sia mag-uyat sing kuarta?—Hulubaton 31:16, 18.

❑ Maayo bala ang iya reputasyon?—Rut 4:11.

❑ Ginatahod bala niya ang iya mga ginikanan?—Exodo 20:12.

❑ Mapatugsilingon bala sia sa iban?—Hulubaton 31:20.

INDI MAAYO NGA MGA PALATANDAAN

❑ Palaaway bala sia?—Hulubaton 21:19.

❑ Ginasulay ka bala niya sa imoral nga paggawi?—Galacia 5:19.

❑ Nagapanakit bala sia ukon maparas maghambal?—Efeso 4:31.

❑ Nagainom bala sia kon gusto niya malingaw?—Hulubaton 20:1.

❑ Maimon bala sia kag dominante?—1 Corinto 13:4, 5.