Magdiretso sa kaundan

Magdiretso sa listahan sang kaundan

Sayop Bala ang Pag-inom sing Alkoholiko nga mga Ilimnon?

Sayop Bala ang Pag-inom sing Alkoholiko nga mga Ilimnon?

 Ang Pagtamod sang Biblia

Sayop Bala ang Pag-inom sing Alkoholiko nga mga Ilimnon?

“ANG alak manug-uligyat, ang makahulubog nga ilimnon manugpagahod, kag ang bisan sin-o nga ginpatalang sini indi maalamon.” Ini bala nga teksto nga masapwan sa Biblia sa Hulubaton 20:1, nagapakita nga sayop ang pag-inom sing alkoholiko nga mga ilimnon? Amo sini ang pagpati sang iban. Subong dugang nga pamatuod, ginatudlo nila ang kasaysayan sa Biblia nga bangod sa pagpatuyang sing alkohol natabo ang malaut nga mga buhat.—Genesis 9:20-25.

Nian, yara man ang makahalalit nga mga resulta bangod sang pagpatuyang—mga balatian subong sang cirrhosis sa atay, makamamatay nga mga aksidente, pagpamigado, pag-abuso sa pamilya, kag kahalitan sa wala pa mabun-ag nga lapsag. Ayhan bangod sining grabe nga mga resulta, “gintudlo sang madamong relihioso nga mga denominasyon nga sayop ang pag-inom sing alkohol,” siling sang The World Book Encyclopedia. Apang sayop gid bala ang pag-inom sing alkoholiko nga mga ilimnon? Ginadumilian bala sang Biblia ang pag-inom bisan sing diutay lang nga alkoholiko nga mga ilimnon?

Ano ang Ginasiling sang Biblia?

Ang Biblia nagapaandam tuhoy sa makahalalit nga resulta sang pagpatuyang sa alkohol. Ang Efeso 5:18 nagalaygay: “Indi kamo magpahubog sa alak, nga may pagpatuyang, kundi padayon kamo nga mapuno sang espiritu.” Subong man ang Hulubaton 23:20, 21 nagapalig-on: “Indi ka makig-upod sa mga lakas mag-inom sing alak, sa mga mahakog magkaon sing karne. Kay ang palahubog kag ang hakugan magaimol.” Kag ang Isaias 5:11 nagasiling: “Kailo sa mga nagabangon sing aga pa agod mangita lamang sila sing makahulubog nga ilimnon, nga nagapabilin tubtob sa managob nga kagab-ihon agod mapainit sila sang alak!”

Ginsambit man sang Biblia ang kalipay kag kaayuhan sang pag-inom sing haganhagan. Halimbawa, ang Salmo 104:15 nagasiling nga ang isa sa regalo sang Dios amo ang “alak nga nagapasadya sa tagipusuon sang mamalatyon nga tawo.” Kag ang padya sa paghimo sing maayo nga mga buhat, siling sang Manugwali 9:7, amo ang ‘pagkaon nga may kalipay sang imo kalan-on kag pag-inom nga may malipayon nga tagipusuon sang imo alak.’ Bangod nahibaluan nga may mahatag nga kaayuhan sa panglawas ang pag-inom sing alak, ginsilingan ni Pablo si Timoteo nga indi “mag-inom sing tubig, kundi maggamit sing diutay nga alak para sa imo tiyan kag sa imo masunson nga pagbalatian.” (1 Timoteo  5:23) Ginsambit sang Biblia ang ikasarang sang alkohol agod buligan ang isa nga malandas ang iya kalisdanan.—Hulubaton 31:6, 7.

Maathag nga ang Biblia wala nagadumili sa pag-inom sing alkoholiko nga mga ilimnon. Apang, gindumilian sini ang pag-inom sing sobra kag pagpahubog. Busa, ginlaygayan ni Pablo ang Cristianong mga manugtatap, mga ministeryal nga alagad, kag tigulang nga mga babayi nga indi magpaulipon “sa madamo nga alak,” kag ginlaygayan niya si Timoteo nga mag-inom lamang sing “diutay nga alak.” (1 Timoteo 3:2, 3, 8; Tito 2:2, 3) Ginpahanumdom ang tanan nga mga Cristiano nga ang “mga palahubog” indi “makapanubli sang ginharian sang Dios.”—1 Corinto 6:9, 10.

Talalupangdon ang katunayan nga gin-angot sang Biblia ang pagpahubog sa pagkahakugan, nga nagalaygay sa aton nga likawan naton ini. (Deuteronomio 21:20) Kon ini nga laygay nagakahulugan nga indi na gid kita dapat mag-inom sing alkohol, wala bala ini nagapakita nga ang pagkaon bisan sing diutay lang sayop man? Sa baylo, ang pagpasobra tubtob sa punto nga mahubog kag ang pagkahakugan amo ang ginasiling sang Biblia nga sayop—indi ang pagkaon kag pag-inom sing haganhagan.

Ano ang Ginhimo ni Jesus?

Si Cristo nagbilin sing “huwaran agod nga sundon [naton] sing maayo ang iya mga tikang,” siling ni apostol Pedro. “Wala sia sing nahimo nga sala.” (1 Pedro 2:21, 22) Gani, ano ang pagtamod ni Jesus sa alkoholiko nga mga ilimnon? Ti, ang iya una nga milagro amo ang paghimo sang tubig nga mangin alak. Ano nga sahi sang alak ang ginhimo ni Jesus? “Ang manugdumala sang punsion” nagdayaw sa nobyo tuhoy sining milagruso nga alak nga nahimo. Sia nagsiling: “Ang tagsa ka tawo una nga nagapagua sang maayo nga alak, kag kon hubog na ang mga tawo, ang mapigaw nga alak. Apang natigana mo ang maayo nga alak tubtob karon.”—Juan 2:9, 10.

Ang pag-inom sing alak bahin sang selebrasyon sang Paskwa, kag gingamit ni Jesus ang alak sang gin-inagurahan niya ang Panihapon sang Ginuo. Sang gindaho niya ang kopa sang alak sa iya mga disipulo, sia nagsiling sa ila: “Inom kamo sa sini, kamo tanan.” Bangod nahibaluan niya nga malapit na lang sia mapatay, nagsiling pa sia: “Indi na gid ako mag-inom sing bisan ano sini nga alak tubtob sa adlaw nga magainom ako sini sing bag-o kaupod ninyo sa ginharian sang akon Amay.” (Mateo 26:27, 29) Huo, nahibaluan sang mga tawo nga si Jesus nagainom sing alak.—Lucas 7:34.

Ano ang Dapat Naton Himuon?

Bisan pa ang Biblia wala nagadumili sa pag-inom sing alkoholiko nga mga ilimnon, wala ini nagakahulugan nga dapat kita mag-inom. May madamo nga mga rason sa paglikaw. Halimbawa, ang isa ka alkoholiko anay nakahibalo sang katalagman sa pag-inom bisan sing isa ka tagay lang. Ang isa ka nagabusong nga babayi mahimo maglikaw agod mapat-od nga indi mahalitan ang iya kiring. Kag bangod nahibaluan sang drayber nga ang alkohol makahalit sa iya hunahuna kag reaksion, likawan niya ang paghimo sing bisan ano nga butang nga makahalit sa iya kabuhi ukon sa kabuhi sang iban.

Indi luyag sang Cristiano nga mangin kasandaran sa isa nga ang konsiensia nagapakamalaut sang pag-inom. (Roma 14:21) Maalamon nga likawan niya ang pag-inom sing alkoholiko nga mga ilimnon kon nagapakigbahin sa publiko nga ministeryo. Talalupangdon nga sa Kasuguan sang Dios sa dumaan nga Israel, ang mga saserdote gindumilian sa ‘pag-inom sing alak ukon sing bisan ano nga makahulubog nga ilimnon’ kon nagaalagad sa layanglayang nga tilipunan. (Levitico 10:9) Subong man, sa mga kadutaan diin ginadumilian ang pag-inom sing alkohol, tumanon sang Cristiano ang kasuguan.—Roma 13:1.

Kon bala mag-inom ukon indi, ukon kon daw ano kadamo ang imnon, ini personal nga mga desisyon, apang ang Biblia nagapalig-on sing pagkahaganhagan. Ini nagasiling: “Nagakaon man kamo ukon nagainom ukon nagahimo sing bisan ano nga butang, himua ang tanan nga butang para sa kahimayaan sang Dios.”—1 Corinto 10:31.

NAPALIGBAN MO NA BALA?

Ano nga paandam tuhoy sa pag-inom sing alkoholiko nga ilimnon ang ginasiling sang Kasulatan?—1 Corinto 6:9, 10.

Nag-inom bala si Jesucristo sing alkoholiko nga ilimnon?—Lucas 7:34.

Ano ang nagatuytoy sa matuod nga mga Cristiano kon tuhoy sa pagkaon kag sa pag-inom?—1 Corinto 10:31.