Magdiretso sa kaundan

Magdiretso sa listahan sang kaundan

Ang Pinakabantog nga Tawo nga Nagkabuhi

Ang Pinakabantog nga Tawo nga Nagkabuhi

 Ang Pinakabantog nga Tawo nga Nagkabuhi

SIN-O sa banta mo ang pinakabantog nga tawo nga nagkabuhi? Si Noe bala, ang nakalampuwas sa Anaw kag nangin katigulangan sang tanan nga nagakabuhi karon? (Genesis 7:1, 21, 22; 9:18, 19) Si Nabocodonosor bala, ang manuggahom sang kalibutan sang una kag manugtukod sang bantog nga siudad nga gintawag niya nga Babilonia nga Daku? (Daniel 4:28-30) Si Alejandro nga Daku ayhan, ang kilala bisan sa tagna sang Biblia bangod sang iya mga katigayunan? (Daniel 8:5-8, 21-22) Ukon indi ayhan si Julio Cesar, ang bantog nga manuggahom sang Roma?

Mga 45 ka tuig pagkatapos napatay ang bag-o lang masambit nga Cesar, nabun-ag sa Betlehem ang bata nga ginhingalanan nga Jesus. Sia bala ang nangin pinakabantog nga tawo nga nagkabuhi? Mga isa ka gatos ka tuig ang nagligad, ang libro nga The Historians’ History of the World nagsiling: “Ang impluwensia sa maragtas sang mga hinimuan [ni Jesus] labi pa ka importante, bisan pasad sa sekular nga pagtamod, sangsa mga nahimuan sang bisan sin-o nga karakter sang maragtas. Ang isa ka bag-o nga dag-on, nga ginkilala sang nagapanguna nga mga sibilisasyon sang kalibutan, ginpasad sa iya pagkabun-ag.”

Tubtob karon, ang interes tuhoy kay Jesucristo padayon gihapon. Sang nagligad nga pila ka tuig, ang bantog nga mga magasin tuhoy sa mga balita sa Estados Unidos nga Time, Newsweek, kag U.S.News and World Report dungan nga nagpagua sing panghapin nga mga sugilanon tuhoy sa iya. Kag sa pagkamatuod, daw padayon nga nagadugang ang interes tuhoy kay Jesus. “Ang iya impluwensia nagaluntad gihapon sa mga pelikula, musika kag sa uso nga mga estilo sang panapton,” siling sang pamantalaan nga Toronto Star sang 2004. “Nangin isa sia sang aton labing bantog nga baganihan.”

Apang makalilibog nga sadto, ang pila nangatarungan nga si Jesus wala nagluntad. Amo sina ang pangatarungan sang isa ka prominente nga maestro nga si Bruno Bauer (1809-82). Ang isa sang iya mga estudyante amo si Karl Marx. Sining karon lang, si Robert E. Van Voorst, sa iya libro nga Jesus Outside the New Testament, nagsulat: “Ginlakip ni Marx ang mga ideya ni Bauer tuhoy sa sugidsugid nga mga ginhalinan ni Jesus sa iya ideolohiya, kag ini nga pangatarungan ginpalapta sang ulihi sang opisyal nga literatura sang Sobyet kag iban pa nga propaganda sang Komunista.”

Apang, sa karon, pila lamang ang nagapanghiwala nga si Jesus nagkabuhi. Sa katunayan, ang kalabanan nga tawo nagaugyon nga isa sia ka matuod kag importante gid nga persona. Ang ulong dinalan sang editoryal sang Wall Street Journal sang Disiembre 2002 nagsiling: “Indi Mapanghiwala Sang Siensia si Jesus.” Ang manunulat sini naghinakop: “Ang madamo nga iskolar, wala labot ang panalagsa nga ateista, nagbaton na nga si Jesus nga taga-Nazaret isa ka maragtason nga persona.”

Apang si Jesus indi lamang isa ka tawo sa maragtas. “Kinahanglan ang di-kinaandan nga pangatarungan,” report sang magasin nga Time, “agod mapanghiwala nga ang labing impluwensiado nga indibiduwal—indi lamang sa sining duha ka milenyo kundi sa bug-os nga maragtas sang tawo—amo si Jesus nga taga-Nazaret.” Nagdugang pa ini: “Ang mabug-at nga argumento amo nga wala na sing iban pa nga kabuhi ang napamatud-an nga mas impluwensiado kag may dayon nga epekto sangsa kay Jesus.”

Walay sapayan sini, may mga pamangkot gihapon: Sin-o gid bala sia? Sa diin sia maghalin? Ano ang iya katuyuan sa duta? Kag ngaa importante gid nga hibaluon naton ang tanan nga sarang naton mahibaluan tuhoy sa iya?