Magdiretso sa kaundan

Magdiretso sa listahan sang kaundan

Husto Bala nga Maghulid ang Duha nga Nagahigugmaanay Antes sang Kasal?

Husto Bala nga Maghulid ang Duha nga Nagahigugmaanay Antes sang Kasal?

 Ang Pagtamod sang Biblia

Husto Bala nga Maghulid ang Duha nga Nagahigugmaanay Antes sang Kasal?

SUNO sa isa ka surbe halos 90 porsiento sang mga tin-edyer nga ginpamangkot ang nagapati nga indi sala ang maghulid antes sang kasal kon ang duha nagahigugmaanay. Ini nga panghunahuna ginapakita kag masami nga ginakunsinte sang media. Pirme ginapagua sa telebisyon kag sa mga pelikula nga normal lang sa duha nga nagahigugmaanay nga maghulid.

Siempre pa, yadtong mga luyag nga pahamut-an ang Dios wala nagapangayo sing panuytoy sa kalibutan, bangod nahibaluan nila nga ginapadayag sang kalibutan ang panghunahuna sang manuggahom sini, ang Yawa. (1 Juan 5:19) Nagahalong man sila nga indi magpadaug sa ila balatyagon, bangod nahibaluan nila nga “ang tagipusuon malimbungon labaw sa tanan nga butang kag makatalagam.” (Jeremias 17:9) Sa baylo, yadtong matuod nga maalam nagapangayo sing panuytoy sa Manunuga kag sa iya inspirado nga Pulong.—Hulubaton 3:5, 6; 2 Timoteo 3:16.

Ang Paghulid Isa ka Dulot Gikan sa Dios

“Ang tagsa ka maayong dulot kag tagsa ka himpit nga regalo nagagikan sa hitaas, kay halin ini sa Amay sang langitnon nga mga kapawa,” siling sang Santiago 1:17. Lakip sa sinang maayo nga mga dulot amo ang paghulid sang mag-asawa. (Rut 1:9; 1 Corinto 7:2, 7) Bangod sa sini, ang tawo makapamata, kag ang bana kag asawa nagasuod sa pisikal kag sa emosyonal sa mahigugmaon kag malipayon gid nga paagi. “Magkalipay ka sa asawa sang imo pagkapamatan-on,” siling ni Hari Solomon sang dumaan nga tion. “Magpaayaw ka sa iya dughan sa tanan nga tion.”—Hulubaton 5:18, 19.

Siempre pa, luyag ni Jehova nga magbenepisyo kita kag magkalipay sa iya mga dulot. Amo gani nga ginhatagan niya kita sing pinakamaayo nga mga kasuguan kag mga prinsipio nga sundon naton. (Salmo 19:7, 8) Si Jehova amo “ang Isa nga nagatudlo sa imo agod makabenepisyo ka, ang Isa nga nagatuytoy sa imo sa dalanon nga dapat mo laktan.” (Isaias 48:17) Ang aton bala langitnon nga Amay—ang personipikasyon mismo sang gugma—magadingot sa aton sang isa ka butang nga tuman kaayo?—Salmo 34:10; 37:4; 84:11; 1 Juan 4:8.

Ang Paghulid Antes sang Kasal Indi Mahigugmaon

Kon ang lalaki kag ang babayi gintingob paagi sa kasal, daw subong nga nangin “isa [sila] ka unod.” Kon naghulid ang duha nga di-kasal, nga ginatawag nga pagpakighilawas, sila man nangin “isa ka unod”—apang indi ini matinlo sa mata sang Dios. * Isa pa, ini nga pagtingob indi mahigugmaon. Ngaa?—Marcos 10:7-9; 1 Corinto 6:9, 10, 16.

Una, ang pagpakighilawas amo ang paghulid nga wala sing tampad nga salabton. Magluwas nga  nagadula ini sang pagtahod sa kaugalingon, mahimo man ini magresulta sa balatian, batok sa buot nga pagbusong, kag kasakit sa balatyagon. Labaw sa tanan, paglapas ini sa matarong nga mga talaksan sang Dios. Gani ang pagpakighilawas nagapakita nga ang isa wala sing pagtahod sa karon kag sa palaabuton nga kaayuhan kag kalipay sang iban.

Para sa isa ka Cristiano, ang pagpakighilawas isa ka pagtapak sa mga kinamatarong sang iya espirituwal nga utod. (1 Tesalonica 4:3-6) Halimbawa, ang nagapangangkon nga mga alagad sang Dios nga nagahulid antes sang kasal nagadagta sa Cristianong kongregasyon. (Hebreo 12:15, 16) Dugang pa, ginadingutan nila ang ila kahulid sang matinlo nga tindog sa moral kag, kon ang ila kahulid di-minyo, sang posibilidad nga magminyo sa ulihi nga putli sa moral. Ginahigkuan man nila ang maayo nga rekord sang ila pamilya kag ang pamilya man sang ila kahulid. Sa katapusan, ginapakita nila nga wala sila sing pagtahod sa Dios, nga ginsaklaw nila paagi sa paglapas sang iya matarong nga mga kasuguan kag mga prinsipio. (Salmo 78:40, 41) Nian, si Jehova ‘magapadapat sing silot’ bangod sang tanan nga malain nga butang nga ginhimo sang di-mahinulsulon nga mga indibiduwal. (1 Tesalonica 4:6) Gani, katingalahan bala kon ang Biblia nagasiling sa aton nga “palagyo kamo gikan sa pagpakighilawas”?—1 Corinto 6:18.

May ginahigugma ka bala kag nagaplano nga magpakasal? Kon amo, ngaa indi mo paggamiton ang tion sang inyo pagnobyahanay sa pagtukod sing isa ka mabakod nga sadsaran sang pagsalig kag pagtahod? Hunahunaa: Paano masaligan sang isa ka babayi ang lalaki nga wala sing pagpugong sa kaugalingon? Kag paano higugmaon kag tahuron sang isa ka lalaki ang babayi nga nagasupak sang kasuguan sang Dios agod busgon ang silabo sang iya balatyagon ukon agod pahamut-an ang lalaki?

Dumduma man nga yadtong nagasikway sa mahigugmaon nga mga talaksan sang Dios nagaani sang ila ginasab-ug. (Galacia 6:7) “Sia nga padayon nga nagapakighilawas nagapakasala batok sa iya kaugalingon nga lawas,” siling sang Biblia. (1 Corinto 6:18; Hulubaton 7:5-27) Matuod, kon ang duha nga nakighilawas maghinulsol, sinsero nga manikasog agod mapasag-uli ang ila kaangtanan sa Dios, kag magpabakod sang ila pagsalig sa isa kag isa, ang negatibo nga balatyagon amat-amat nga madula. Apang, ang ila nahimo anay masami nga nagabilin sang pinalian. Ang isa ka hoben nga mag-asawa naghinulsol gid nga nakighilawas sila. ‘Indi ayhan nga ang amon di-matinlo nga panugod amo ang rason sang amon mga di-paghangpanay subong mag-asawa?’ pamangkot kon kaisa sang bana sa iya kaugalingon.

Ang Matuod nga Gugma Indi Makagod

Bisan pa nga ang matuod nga gugma mahimo ginaupdan sing romantiko nga balatyagon “wala [ini] nagagawi sing di-nagakaigo,” ukon “nagapangita sang kaugalingon nga kaayuhan.” (1 Corinto 13:4, 5) Sa baylo, ginapauswag sini ang kaayuhan kag ang dayon nga kalipay sang iban. Ini nga sahi sang gugma nagapahulag sa lalaki kag babayi nga tahuron ang isa kag isa kag maghulid sa nagakaigo kag hatag-Dios nga duog—ang higdaan sang pag-asawahay.—Hebreo 13:4.

Ang pagbatyag sang pagsalig kag kalig-unan nga nagaresulta sa isa ka malipayon gid nga pag-asawahay importante ilabi na kon may mga kabataan na, kay gintuyo sang Dios nga ang kabataan magadaku sa isa ka panimalay nga mahigugmaon, mabakod, kag may kalig-unan. (Efeso 6:1-4) Sa pag-asawahay lamang nga ang duha ka tawo nanaad nga mag-unungay gid. Sa tagipusuon nila, kag sa masami ginasiling nila nga, nanaad sila nga atipanon kag sakdagon ang isa kag isa sa maayo man ukon sa malain nga mga tion sa bug-os nila nga kabuhi.—Roma 7:2, 3.

Ginapabakod sang paghulid ang kaangtanan sang bana kag asawa. Sa isa ka malipayon nga pag-asawahay, nasapwan sang magtiayon nga ang paghulid malahalon kag makalilipay gid—kag wala ginapakanubo ang pag-asawahay, ginatublag ang konsiensia, ukon ginalapas ang Manunuga.

[Nota]

^ par. 9 Ang Griegong tinaga nga ginbadbad “pakighilawas” nagapatuhoy sa tanan nga seksuwal nga buhat sang duha nga di-kasal kag nagalakip sang paggamit sang kinatawo, lakip na ang oral sex.—Tan-awa ang Magmata! nga Agosto 8, 2004, pahina 12, kag Ang Lalantawan, Pebrero 15, 2004, pahina 13, nga ginbalhag sang mga Saksi ni Jehova.

NAGPALIBOG KA BALA?

Ano ang pagtamod sang Dios sa paghulid antes sang kasal?—1 Corinto 6:9, 10.

▪ Ngaa makahalalit ang pagpakighilawas?—1 Corinto 6:18.

▪ Paano mapakita sang duha nga nagahigugmaanay ang matuod nga gugma sa isa kag isa?—1 Corinto 13:4, 5.