Magdiretso sa kaundan

Magdiretso sa listahan sang kaundan

Gikan sa Amon mga Bumalasa

Gikan sa Amon mga Bumalasa

 Gikan sa Amon mga Bumalasa

Bag-o nga Pormat sang Magmata! Kagab-i natapos ko basa ang Enero 2006 nga gua sang Magmata! Naluyagan ko gid ining bag-o nga pormat! Ang Magmata! isa ka magasin nga dapat tun-an sing maayo kay gindesinyo ini agod magpamensar ang bumalasa. Sa bug-os nga magasin, makita ko ang pagtuytoy ni Jehova agod labi nga mag-uswag ang aton espirituwalidad.

B. N., Canada

Disiseis anyos ako. Daku gid ang mabulig sang bag-o nga mga bahin sa Magmata! sa aton pagtuon sing Biblia. Ang pila ka mga artikulo may paagisod nga mga pamangkot agod buligan ang bumalasa nga pamalandungan ang iya nabasa. Nanamian ako maggamit sang Magmata! sa akon mga asaynment sa eskwelahan. Nagalaum ako nga padayunon ninyo ang pagbalhag sining matahom kag mapuslanon nga mga impormasyon para sa amon.

S. N., Namibia

Ginpabakod sang Akon Pagtuo—Pagkabuhi nga May ALS (Enero 2006) Sang mabasa ko ang eksperiensia ni Jason Stuart, daw nangin walay kabilinggan ang akon mga problema. Narealisar ko nga ginapabaloran ni Jehova ang aton pag-alagad sa iya suno sa aton mga kahimtangan. Ginadayaw ko ang asawa ni Jason sa iya pagkamasinakripisyuhon kag pagsalig kay Jehova. Indi ko gid malipatan ini nga eksperiensia kag magabulig ini sa akon sa pag-atubang sa mga problema nga magaabot pa.

C.R.S., Peru

Naghibi ako sang mabasa ko ang sugilanon ni Jason, kay natandog ako sang iya mabudlay nga mga inagihan kag subong isa sa mga Saksi ni Jehova, ginapabugal ko gid nga utod naton sia sa espirituwal. Sa sini nga artikulo, nakita ko ang importansia sang paghanda para sa mga pagtilaw, kay ang “tion kag wala ginapaabot nga hitabo” mahimo matabo sa kay bisan sin-o sa aton.—Manugwali 9:11.

T. A., Hungary

Napatay ang akon iloy bangod sa balatian nga ALS. Gani natandog gid ako sang eksperiensia ni Jason. Ang iya halimbawa nagpalig-on sa akon nga padayon nga ihatag ang akon labing masarangan sa ministeryo. Ginapangamuyo ko nga padayon nga pabakuron ni Jehova ini nga utod kag ang iya asawa.

L.Z.G., Paraguay

Ang katunayan nga si Jason naghinguyang gid sing tion sa personal nga pagtuon sang mapagros pa sia, amo nga may makuhaan sia sing espirituwal nga kabakod sang kinahanglanon niya ini, nagpahunahuna sa akon. Nagpabakod ini sa akon determinasyon nga magmakugi pa gid sa akon personal nga pagtuon sing Biblia.

Y. M., Japan

Pamangkot sang mga Pamatan-on—Ngaa Ginahalitan Ko ang Akon Kaugalingon? (Enero 2006) Subong isa ka pamatan-on nagpakigbato ako sa droga kag sa alkoholiko nga ilimnon, apang ang labing mabudlay nga problema nga akon ginaatubang amo ang paghalit sa akon kaugalingon. Isa ini ka dalayon nga pagpakig-away, apang ang mga artikulo kaangay sini naghatag sa akon sing kusog nga makabatas. Indi mapabutyag sang mga tinaga ang akon pagpasalamat.

E. C., Estados Unidos

Tin-edyer pa lang ako sang nagsugod ako sa paghalit sa akon kaugalingon. Karon 56 anyos na ako. Apat ka tuig ko pa lang nga gin-untatan ang paghalit sa akon kaugalingon, apang kon kaisa tuman gid kabug-at sang mga problema amo nga daw luyag ko nga himuon ini liwat. Nalab-ot gid sini nga artikulo ang alibutod sang akon tagipusuon. Makabulig ini sa mga tawo nga atubangon liwat ang kabuhi upod ang bag-o nga kaisog.

Ginhinago ang ngalan, Netherlands

Disisiete anyos ako kag luyag ko magpasalamat sa sini nga artikulo. Ginahalitan ko man ang akon kaugalingon. Sining karon  lang, ginpilasan ko liwat ang akon kaugalingon. Sa tapos sini, ginpalapitan ko ang akon iloy kag ginpangabay sia nga pangamuyuan ako. Walay sapayan sini nga problema, natun-an ko nga palangga ako ni Jehova. Ang inyo artikulo daku gid nga bulig sa akon, kag ginapasalamatan ko gid ang Dios sa sini!

N. M., Czech Republic

“Daw imposible gid ini!” Amo ini ang akon reaksion sang nakita ko ini nga artikulo. Disiotso anyos ako. Ginahalitan ko man ang akon kaugalingon. Ang kasakit nagabulig sa akon nga makontrol ang akon balatyagon. Masami nga luyag ko sakiton ang akon kaugalingon, kag indi ko mahibaluan kon paano batuan ini nga balatyagon. Makapakibot gid nga makita ini nga artikulo. Nagtululagay ang akon luha, kag ginpasalamatan ko si Jehova sa pangamuyo. Sa organisasyon lamang ni Jehova posible nga makasapo sini nga sahi sang kaumpawan!

A. P., Rusya

Sa edad nga 14, ginahalitan ko na ang akon kaugalingon agod paumpawan ang kasakit sang akon buot. Isa ka bes, naospital ako bangod sini. Ang pagsulat sing diary nakabulig sa akon nga kontrolon ini nga huyog. Subong man, kon daw ginasulay ako nga halitan ang akon kaugalingon, ginatawgan ko dayon ang isa ka mahinangpanon nga abyan. Tumalagsahon gid ang nabulig sang pangamuyo. Kag kon nagabatyag ako nga di-takus nga magpangamuyo, ang mga abyan kag ang Cristianong mga gulang nagapangamuyo para sa akon. Mabudlay ini nga pagpakig-away, apang natun-an ko kon paano ini atubangon kag gamiton ang tanan nga bulig nga matigayon agod nga indi ko na kinahanglan nga halitan pa ang akon kaugalingon.

N. W., Alemanya

Makita sa una nga pahina sini nga artikulo ang isa ka babayi nga nagagan-it sang iya buhok, kag ginsambit sa artikulo “si Sara,” nga nagagan-it sang iya buhok agod pinahan ang iya kaugalingon. Ang akon anak nga babayi may problema nga ginatawag trichotillomania, isa ka abnormal nga huyog nga pamugnuton ang iya buhok. Ini nga kondisyon may kaangtanan sa obsessive-compulsive disorder. Bangod ini sa mabudlay kontrolon nga pamatyag, indi bangod nga luyag halitan ang kaugalingon. Ang pagpamugnot sang buhok wala nagapadulong sa paghalit sa kaugalingon.

M. H., Estados Unidos

Sabat sang “Magmata!”: Ang termino nga trichotillomania, gin-imbento sang katapusan nga bahin sang ika-19 nga siglo, kag nagapatuhoy sa isa ka indi makontrol nga huyog sang isa nga pamugnuton ang buhok. Subong gintinguhaan nga iilustrar sing maayo sang amon laragway, ang paggan-it sang buhok ginahimo sang iban nga isa ka paagi sang paghalit sa kaugalingon. Apang, wala sini ginapakita nga ang tanan nga nagapamugnot sang buhok amo ang sahi sang nagahalit sa kaugalingon nga ginlaragway sa amon artikulo. Subong sang ginsiling sang isa ka bumalasa bag-o lang, kon kaisa ini nga batasan naangot sa obsessive-compulsive disorder.

Kon ano man, ginapaathag sang pila ka eksperto nga ang kabangdanan sang trichotillomania dapat binagbinagon agod ang pagbulong mapahisanto sa kinahanglanon sang tagsa ka pasyente. Busa, maalamon para sa may subong sini nga problema nga magpakonsulta sa doktor agod personal nga maeksamin kag maplano ang pagbulong.

Ano ang Imo Sabat? (Enero 2006) Nalangkag gid ako sa sining bag-o nga artikulo! Ginatudluan namon ang amon mga apo nga naga-home schooling, kag daku gid ini nga bulig sa ila adlaw-adlaw nga pagbasa sing Biblia kag mga artikulo sang Magmata! nga ila ginabasa subong bahin sang ila asaynment sa eskwelahan. Salamat sa inyo pagkabalaka sa mga pamatan-on.

B. E., Estados Unidos

Makahalangkat ini nga artikulo, apang nalipay gid ako kon mahibaluan ko ang mga sabat! Kagab-i, ginhinguyang ko ang akon tion sa pagbasa sini nga artikulo; makawiwili gid ini! Kon magdaku ako, luyag ko magbulig sa paghimo sini nga magasin agod nga makatuon man ang iban tuhoy kay Jehova!

D. H., Estados Unidos

Walo ka tuig ang akon edad. Ginagamit namon ini nga pahina sa amon pagtinuon sa pamilya. Nalipay kami sa amon ginahimo nga pagpanalawsaw. Ang bahin nga “Sin-o Ako?” medyo mabudlay, apang naluyagan namon ini. Padayuna ninyo ining maayong hilikuton.

C. W., Estados Unidos