Magdiretso sa kaundan

Magdiretso sa listahan sang kaundan

Gikan sa Amon mga Bumalasa

Gikan sa Amon mga Bumalasa

 Gikan sa Amon mga Bumalasa

Ang Siod sang Pag-inom—Masiod Ka Bala? (Oktubre 8, 2005) Madamo na ako sing nabasa nga mga sulat gikan sa mga bumalasa nga nagasiling: “Ini nga artikulo nag-abot sa sibu gid nga tion.” Wala ko gid ginhunahuna nga makabatyag man ako sing subong sini, apang amo gid ini nga mga tinaga ang ginsiling ko sa akon kaugalingon sang nabasa ko ini nga serye. Mga pila ka tion na nga ginatublag ako sang akon ginainom nga alkohol adlaw-adlaw, bisan pa nga wala man ako nagakahubog. Nian, nag-abot ini nga serye. Sa tapos ko mabasa ang tuhoy sa mga katalagman, nagapati ako nga tion na agod untatan ko ang akon pagkagiyan sa alkohol.

K. W., Alemanya

Ginhinambitan sa sini nga serye ang eksperiensia ni Hilario, nga nag-inom sa sulod sang 30 ka tuig kag “pila ka beses nga nagbalik liwat sa pag-inom.” Nagsiling sia nga ang mga katapo sang kongregasyon “yara pirme sa akon tupad agod palig-unon ako.” Apang, indi bala dapat ginsabdong sia ukon ginsikway pa gani sa Cristianong kongregasyon?

R. L., Estados Unidos

Sabat sang “Magmata!”: Ang malip-ot nga paglaragway sang eksperiensia ni Hilario wala nagsambit kon san-o sia nangin bawtismado nga Cristiano sa sulod sang 30 ka tuig nga pagpakigbato niya sa pag-inom. Wala man ginsiling kon bala ginsabdong sia sang mga gulang sa kongregasyon. Apang ginsambit sang artikulo nga ginhatagan si Hilario sing “suno sa tion nga laygay halin sa Biblia,” nga kon kaisa ginahimo sang hudisyal nga komite. Ang pag-atubang sa alkoholismo nagalakip sang liwatliwat nga pagbalik sa pag-inom, kaangay sang kaso ni Hilario. Kon paano ginaatipan ini nga mga kahimtangan kon isa ka bawtismado nga Cristiano ang nadalahig, palihug tan-awa ang “The Watchtower,” nga Mayo 1, 1983, pahina 8-11.

Pamangkot sang mga Pamatan-on . . . Ngaa Nagakaganyat Ako sa Di-maayo nga mga Tawo? (Agosto 8, 2005) Nabuligan ako sining artikulo nga mahangpan nga indi ako dapat magduhaduha sa akon mga tulumuron. Nakumbinsi ako sini nga magpahilayo na sa malain nga kaupdanan. Suod na ako karon sa madamo nga kauturan sa kongregasyon, bata kag tigulang, nga nagpabatyag sa akon nga ginahigugma sang mga nagahigugma kay Jehova kag nagpalig-on sa akon nga magpadayon sa dalanon sang kabuhi.

M. D., Mexico

Determinado sa Paglab-ot sang Akon Tulumuron (Hulyo 8, 2005) Nagaagay ang akon luha samtang ginabasa ko ang eksperiensia ni Martha. May kuyap man ako. Isa ako ka bug-os tion nga manugbantala sa sulod na sang napulo ka tuig, kag kon kaisa mabudlay gid ini—ilabi na kon atakehon ako. Ang akon determinasyon nga indi mag-untat ginpabakod pa gid sang eksperiensia ni Martha. Naglugpay gid ini sa akon.

J. S., Poland

Pareho kami sing balatian ni Martha. Sa tapos ko mabasa ang iya sugilanon, naghalong na ako sa akon ginakaon. Sing kapin na sa napulo ka tuig, gintugutan ko ang kuyap nga punggan ako sa pag-alagad kay Jehova sing bug-os. Apang, mga tatlo na ka tuig ang nagligad, nagdesisyon ako nga mangin bug-os tion nga manugbantala, kag wala gid ako naghinulsol. Kabay nga pakamaayuhon kamo ni Jehova sa inyo pagbalhag sing subong sini ka makapalig-on nga mga eksperiensia!

B.C.C., Brazil

Labi gid ako nga napalig-on sini nga artikulo bangod sang indi pagpangampo ni Martha. Nalugpayan pa gid ako kay bisan pa may tion nga kinahanglan sia mag-untat sa pagpayunir, may balanse sia nga panimuot kag pagsalig nga nahamuot si Jehova sa aton bug-os kalag nga pag-alagad.

S. H., Japan

Nag-atubang man ako sang kahimtangan nga kaangay sang kay Martha, kag dapat ko batunon ang mga limitasyon sang akon lawas. Kaangay ni Martha, nakaalagad man ako subong bug-os tion nga manugbantala. Gani, napalig-on gid ako sang iya eksperiensia.

F. G., Switzerland