Magdiretso sa kaundan

Magdiretso sa listahan sang kaundan

Ano ang Dapat Ko Himuon sa Akon Kabuhi?

Ano ang Dapat Ko Himuon sa Akon Kabuhi?

 Pamangkot sang mga Pamatan-on . . .

Ano ang Dapat Ko Himuon sa Akon Kabuhi?

“Sang una, wala ako nagakabalaka sa palaabuton. Apang samtang nagahilapit na ang akon gradwasyon, narealisar ko nga magaatubang na ako sa matuod nga kalibutan, sa matuod nga mga trabaho. Kag sa matuod nga mga galastuhan.”—Alex, 17.

SANG gamay ka, ginhanduraw mo bala kon ano ang gusto mo kon magdaku ka? Amo bala gihapon sina ang imo ambisyon karon? Nagapalibog ka bala kon paano mo buhion ang imo kaugalingon kon mangin adulto ka na? Kon amo sina ang ginabatyag mo, wala ka nagaisahanon. “Ang pagpili sing karera amo ang isa sa ginakabalak-an gid sang mga pamatan-on,” siling sang libro nga Career Coaching Your Kids.

Sa pihak nga bahin, mahimo nga wala mo pa napamensaran ang tuhoy sa imo karera karon. Ayhan mas gusto mo pa nga magkalipay sa imo kabuhi. Wala sing malain sa pagkalipay sa kabuhi, kay ang Biblia nagasiling sa imo nga “magkalipay sa kabuhi samtang bata ka pa!” (Manugwali 11:9, Contemporary English Version) Walay sapayan sini, karon na ang nagakaigo nga tion agod sugdan mo nga hunahunaon kon ano ang imo pagahimuon sa imo kabuhi. “Ang isa nga maalam nagabinagbinag sang iya mga tikang,” siling sang Hulubaton 14:15. Paano mo mabinagbinag ang imo mga tikang?

“Hibalua Kon Diin Ka Makadto”

Handurawa nga nagaplano ka sa paglakbay sa malayo nga lugar. Mahimo nga magtan-aw ka anay sa mapa agod hibaluon kon diin ang pinakamaayo nga alagyan. Amo man sina kon nagaplano ka sa imo palaabuton. “Madamo ka sing pililian,” siling ni Michael, isa ka pamatan-on nga nagaalagad na karon sa isa sa mga sanga talatapan sang mga Saksi ni Jehova. Paano ka makapili sa tuman kadamo nga pililian? “Dapat may tulumuron ka,” siling ni Michael.

Tamda ang tulumuron subong isa ka lugar nga luyag mo kadtuan. Pat-od nga indi ka makalab-ot sa sini kon basta nagalakbay ka lang nga wala sing pasingadtuan. Mas maayo nga magkuha ka sing mapa kag planuhon ang imo banas, kon sa aton pa. Sa sining paagi masunod mo ang laygay sa Hulubaton 4:26: “Tapana ang banas sang imo mga tiil.” Ginbadbad sang Contemporary English Version ining prase subong: “Hibalua kon diin ka makadto.”

Sa masunod nga mga tinuig, magahimo ka sing madamong mabug-at nga mga desisyon tuhoy sa pagsimba, palamugnan, pagminyo, pamilya, kag iban pa importante nga mga butang. Mas mahapos maghimo sing maalamon nga mga desisyon  kon hibaluon mo anay kon diin ka makadto. Kag samtang ginaplano mo ang imo kabuhi, may isa ka butang nga indi mo dapat pasapayanan.

“Dumduma ang Imo Manunuga”

Agod mangin matuod ka nga malipayon, dapat tumanon mo ang ginsiling sang maalam nga si Hari Solomon: “Dumduma ang imo Manunuga samtang bata ka pa.” (Manugwali 12:1, Today’s English Version) Ang dalanon sang kabuhi nga imo pilion dapat naimpluwensiahan sang handum mo nga pahamut-an ang Dios.

Ngaa importante ini? Ang Biblia nagasiling sa Bugna 4:11: “Takus ka, Jehova, nga amon Dios, nga magbaton sing himaya kag dungog kag gahom, bangod gintuga mo ang tanan nga butang, kag bangod sang imo kabubut-on nagluntad sila kag natuga.” Huo, ang tanan nga tinuga sa langit kag sa duta may utang nga kabalaslan sa Manunuga. Nagapasalamat ka bala bangod ginhatagan ka niya “sing kabuhi kag sing ginhawa kag sing tanan nga butang”? (Binuhatan 17:25) Wala ka bala ginapahulag nga magbalos kay Jehova nga Dios bilang pagpasalamat sa tanan nga butang nga ginhatag niya sa imo?

Bangod pirme nila ginadumdom ang ila Manunuga, madamo nga pamatan-on sa tunga sang mga Saksi ni Jehova ang nagsulod sa bug-os tion nga ministeryo. Sa katunayan, ang bug-os tion nga ministeryo isa ka dungganon nga tulumuron, kag nagahatag ini sing madamo katama nga mga pagpakamaayo. (Malaquias 3:10) Apang, kinahanglan ini planuhon. Halimbawa, pamangkuta ang imo kaugalingon, ‘Ano bala ang akon mga abilidad kag mga ikasarang nga magamit ko agod masakdag ang akon kaugalingon sa bug-os tion nga ministeryo?’

Si Kelly, nga 27 na karon, naghimo sing plano sang bata pa sia. Tulumuron gid niya nga magsulod sa bug-os tion nga ministeryo. Sa ulihi nga bahin sang iya pagkatin-edyer, nagsugod si  Kelly sa “pagplano sang iya banas” may kaangtanan sa iya palamugnan. “Kinahanglan ko magpili sing trabaho nga makasakdag sa akon sa akon ministeryo,” siling niya.

Naghanas si Kelly agod mangin kabulig sang dentista paagi sa isa ka bokasyonal nga programa sa hayskul. Nagdaug pa gani sia sa pang-estado nga kompetisyon. Walay sapayan sang iya kadalag-an, wala niya nalipatan ang iya panguna nga tulumuron. “Luyag ko gid ang bug-os tion nga ministeryo,” siling ni Kelly. “Ang iban nga butang segundaryo na lamang.” Si Kelly nagakalipay gihapon sa bug-os tion nga ministeryo. “Amo ini ang pinakamaayo nga desisyon nga nahimo ko,” siling niya.

Mamangkot sing Direksion

Kon nagalakbay ka sa isa ka di-pamilyar nga duog, mahimo nga mamangkot ka sing direksion—bisan pa nga may mapa ikaw. Mahimo mo man ini himuon kon nagaplano ka sang imo palaabuton. Mangayo sing laygay sa iban. Ang Hulubaton 20:18 nagasiling: “Bangod sa laygay ang mga plano natukod sing maayo.”

Sa pagkamatuod, daku ang mabulig sang imo mga ginikanan. Makapangayo ka man sing laygay sa hamtong nga mga Cristiano nga nagpakita sing diosnon nga kaalam sa ila pagkabuhi. “Pamangkuta ang mga adulto nga may maayo nga halimbawa sa inyo man kongregasyon ukon malapit sa inyo duog,” panugyan ni Roberto. “Masugiran ka nila sang mga butang nga mahimo wala mo mahunahuna.”

Labaw kay bisan sin-o, luyag ka buligan ni Jehova nga Dios nga makahimo sing maayo nga mga desisyon sa kabuhi nga makahatag sa imo sing matuod nga kalipay. Gani mangabay sa iya nga buligan ka nga ‘magpadayon sa paghantop kon ano ang iya kabubut-on’ tuhoy sa imo palaabuton. (Efeso 5:17) Kon magsalig ka kay Jehova sa bug-os mo nga tagipusuon, “tadlungon niya ang imo mga banas.”—Hulubaton 3:5, 6.

Ang iban pa nga mga artikulo sa serye nga “Pamangkot Sang mga Pamatan-on . . .” masapwan sa Web site nga www.watchtower.org/ypa

HUNAHUNAA

▪ Ano ang imo mga ikasarang kag mga abilidad?

▪ May nahunahuna ka bala nga mga paagi agod magamit ining mga ikasarang sa pagdayaw kay Jehova?

▪ Ano nga sahi sang bug-os tion nga pag-alagad nga ginsambit sa sining artikulo ang nagustuhan mo?

[Kahon sa pahina 23]

ISA KA DALAN NGA WALA SING LULUTSAN

Ang Biblia nagasiling: “Ang mga determinado nga magmanggaranon nagakahulog sa pagsulay kag sa siod kag sa madamong binuang kag makahalalit nga kailigbon, nga nagatugdang sang mga tawo sa kalaglagan kag kahapayan.” Ang dalan padulong sa kamanggaran batsihon! Sa ulihi ining dalanon wala na sing lulutsan bangod sa mga utang, kabalaka, kag espirituwal nga pagkalusod.—1 Timoteo 6:9, 10.

[Kahon/Mga retrato sa pahina 24]

PAGPAYUNIR

Ang isa ka payunir nga manugbantala huwaran kag bawtismado nga Cristiano nga nagahinguyang sing di-magkubos 70 ka oras kada bulan sa pagbantala sang maayong balita sang Ginharian sang Dios. Paagi sa paghanas kag eksperiensia, ginapalambo sang mga payunir ang ila kalantip subong manunudlo sang Biblia.

PAG-ALAGAD SA BETHEL

Ang mga katapo sang pamilya Bethel nagaalagad sa mga sanga talatapan sang mga Saksi ni Jehova, diin nagabulig sila sa paghanda, paghimo, kag pagpadala sing mga literatura sa Biblia. Ang kada asaynment sa Bethel isa ka sagrado nga pribilehiyo sang pag-alagad.

PAG-ALAGAD KON DIIN MAS DAKU ANG KINAHANGLANON

Ang iban nga mga payunir nagasaylo sa mga duog diin mas daku ang pagkinahanglan sa mga manugbantala sang Ginharian. Ang iban nagatuon sing iban nga lenguahe kag nagaalagad sa iban nga pungsod ukon sa kongregasyon nga nagahambal sinang lenguahe.

INTERNASYONAL NGA PAG-ALAGAD

Ang mga international servant nagalakbay sa iban nga mga pungsod agod magbulig sa pagtukod sing mga Kingdom Hall kag mga pasilidad sang sanga. Isa ini ka porma sang sagrado nga pag-alagad nga mapaanggid sa ginhimo anay sang mga nagtukod sang templo ni Solomon.—1 Hari 8:13-18.

MINISTERIAL TRAINING SCHOOL

Sa sulod sang walo ka semana nga kurso, ang kalipikado kag di-minyo nga mga gulang kag mga ministeryal nga alagad ginahanas sa mga butang tuhoy sa organisasyon kag sa paghambal sa publiko. Ang iban nga naggradwar sa sini ginaasayn sa pungsod nga ila ginhalinan; ang iban naman ginapadala sa iban nga pungsod.

PAGMISYONERO

Ang kalipikado nga mga payunir nga mapagros kag mabaskog ang panglawas ginahanas para mag-alagad sa iban nga mga pungsod. Ang mga misyonero may makakulunyag kag makaalayaw nga kabuhi.

[Kahon/Retrato sa pahina 24]

WHAT WILL I DO WITH MY LIFE?

Ining video nga ginhimo sang mga Saksi ni Jehova, nagapakita sang realistiko nga mga interbyu sa mga pamatan-on gikan sa Alemanya, Brazil, Britanya, kag Estados Unidos. Matigayon ini sa ulihi sa iban pa nga mga lenguahe.

[Retrato sa pahina 23]

“Dapat may tulumuron ka.”—Michael, katapo sang pamilya Bethel

[Retrato sa pahina 24]

“Amo ini ang pinakamaayo nga desisyon nga nahimo ko.”—Kelly, anom ka tuig nga payunir

[Retrato sa pahina 25]

“Pamangkuta ang mga adulto nga may maayo nga mga halimbawa.”—Roberto, katapo sang pamilya Bethel