Magdiretso sa kaundan

Magdiretso sa listahan sang kaundan

Ngaa Kinahanglan Ako nga Magbasa?

Ngaa Kinahanglan Ako nga Magbasa?

 Pamangkot sang mga Pamatan-on . . .

Ngaa Kinahanglan Ako nga Magbasa?

“Ginatak-an ako sa pagbasa. Mas gusto ko pa nga magtan-aw sing telebisyon.” —Margarita, 13, Rusya.

“Kon papilion ako kon mabasa sing libro ukon magbasketbol, mabasketbol na lang ako.” —Oscar, 19, Estados Unidos.

KON ginhatagan mo sing tion ang pagbasa tubtob sa sini nga punto, mahimo marealisar mo nga ang pagbasa isa ka importante nga ikasarang nga kinahanglan tun-an. Walay sapayan sini, basi tamdon mo ang pagbasa sing libro ukon bisan gani sing isa ka artikulo sa magasin nga daw kaangay sang pagtomar sing bulong: Nakahibalo ka nga maayo ini para sa imo, apang ginapakamaayo mo nga likawan ini.

Gin-interbyu sang Magmata! ang mga pamatan-on gikan sa 11 ka pungsod agod hibaluon kon ano ang ila masiling tuhoy sa mga hangkat kag mga kapuslanan sang pagbasa. Ang masunod amo ang ila ginsiling.

Ngaa ginakabig mo nga isa ka hangkat ang pagbasa?

“Daw wala ako sing tion para sa sini.”—Semsihan, 19, Alemanya.

“Ang pagbasa nagakinahanglan sing daku nga panikasog. Daw ginatamaran ako sini.”—Ezekiel, 19, Pilipinas.

“Indi ko gid luyag nga ginapilit ako nga magbasa sing makatalaka nga mga topiko.”—Christian, 15, Inglaterra.

“Kon manipis ang libro, basi basahon ko. Apang kon madamol, nagakadulaan ako sing gana.”—Eriko, 18, Japan.

“Mahapos lang ako matublag sang iban nga mga butang. Indi ako makakonsentrar.”—Francisco, 13, Bagatnan nga Aprika.

Ang Cristianong mga pamatan-on ginapalig-on nga basahon ang Biblia. (Salmo 1:1-3) Nabudlayan ka bala? Kon amo, ngaa?

Madamol gid ang Biblia! Sa banta ko indi ko ini maubos basa sa bilog ko nga kabuhi!”—Anna, 13, Rusya.

“Ang pila ka bahin sang Biblia mabudlay hangpon kag indi gid makalilingaw.”—Jezreel, 11, India.

“Nabudlayan ako magbasa sing Biblia sing regular bangod magamo ang akon iskedyul.”—Elsa, 19, Inglaterra.

“Isa ini ka hangkat para sa akon bangod sang mga ulubrahon sa balay kag sa eskwelahan nga nagaubos sang akon tiempo.”—Zurisadai, 14, Mexico.

“Mabudlay para sa akon ang pagbasa sing Biblia bangod daw indi ko mabuhinan ang tion nga ginahinguyang ko sa paglingawlingaw.”—Sho, 14, Japan.

Maathag nga mahimo mangin makahalangkat ang pagbasa. Apang takus bala ini panikasugan? Paano ka nakapanginpulos sa pagbasa?

“Ginpasangkad sang pagbasa ang akon ihibalo, kag nangin mas may kompiansa ako nga makigsugilanon sa mga tawo.”—Monisha, 14, India.

“Ang pagbasa nagaparelaks sa akon kag ginabuligan ako sini nga malikawan ang paghunahuna sang akon mga kabalaka.”—Alison, 17, Australia.

“Bangod sa pagbasa, nakakadto ako sa mga lugar nga imposible ko makadtuan.”—Duane, 19, Bagatnan nga Aprika.

“Ang pagbasa nagabulig sa akon nga mag-usisa sing personal, sa baylo nga mamati lang sa ginasugid sang iban.”—Abihu, 16, Mexico.

Ano ang nakabulig sa imo nga manamian sa pagbasa?

“Halin sang bata pa ako, ginapalig-on na ako sang akon mga ginikanan nga magbasa sing matunog.”—Tanya, 18, India.

“Ginpalig-on ako sang akon mga ginikanan nga gamiton ang akon imahinasyon samtang nagabasa, agod mahanduraw ko ang mga hitabo.”—Daniel, 18, Inglaterra.

“Ginpanugda sang akon amay nga magsugod ako sa mga tulun-an sa Biblia nga mas makapainteres sa akon, kaangay sang mga Salmo kag Hulubaton. Nanamian na ako karon magbasa sing Biblia, kag indi na ini makapabug-at sa akon.”—Charene, 16, Bagatnan nga Aprika.

“Kuatro anyos pa lamang ako, ginhatagan na ako sang akon mga ginikanan sing lamesa kag bulutangan-libro nga puno sing libro nga gintago nila para sa akon halin pa sang akon pagkabun-ag.”—Airi, 14, Japan.

Ngaa sa banta mo importante nga basahon ang Biblia?

“Madamo sing sayop nga pagpati ang mga tawo tuhoy sa Biblia. Mas maayo kon ikaw mismo ang mag-usisa sining mga butang.” (Binuhatan 17:11)—Matthew, 15, Estados Unidos.

“Ang Biblia indi mahapos tun-an. Apang ang pagbasa sini nagabulig sa akon nga ipabutyag ang akon kaugalingon sing may kompiansa kag sing maathag kon nagapakigsugilanon ako sa iban tuhoy sa akon mga pagtuluuhan.” (1 Timoteo 4:13)—Jane, 19, Inglaterra.

“Kon nagabasa ako sing Biblia, nagabatyag ako nga nagapakigsugilanon si Jehova sa akon sing direkta. Kon kaisa nagakatandog ang akon balatyagon.” (Hebreo 4:12)—Obadiah, 15, India.

“Nanamian na ako magbasa sing Biblia bangod nagasugid ini kon ano ang pagtamod ni Jehova sa akon kag nagahatag ini sing maayo nga laygay sa akon.” (Isaias 48:17, 18)—Viktoriya, 14, Rusya.

San-o ka nagabasa sing Biblia kag sing pasad sa Biblia nga mga literatura?

“May iskedyul ako. Nagabasa ako sing isa ka kapitulo sang Biblia pagbugtaw ko sa aga.”—Lais, 17, Brazil.

“Nagabasa ako sing Biblia kag sing iban pa nga Cristianong literatura samtang nagasakay sa tren pakadto sa eskwelahan. Apat ka tuig ko na ini nga ginahimo.”—Taichi, 19, Japan.

“Nagabasa ako sing diutay nga bahin sang Biblia kada gab-i antes magtulog.”—Maria, 15, Rusya.

“Nagabasa ako sing apat ka pahina sang ‘Ang Lalantawan’ ukon ‘Magmata!’ kada adlaw. Matapos ko na basa ang bug-os nga magasin antes pa mag-abot ang masunod nga isyu.”—Eriko, 18, Japan.

“Nagabasa ako sing Biblia kada aga antes ako magkadto sa eskwelahan.”—James, 17, Inglaterra.

 Subong sang ginapakita sang mga komento sa ibabaw, ang pagbasa makadugang sang imo kompiansa, kag makapasangkad sang imo ihibalo. Ang pagbasa sing Biblia kag pasad sa Biblia nga mga literatura—lakip na ining magasin—makabulig man sa imo nga ‘magpalapit sa Dios.’ (Santiago 4:8) Gani, bisan pa ang pagbasa isa ka hangkat para sa imo, indi mangampo!

HUNAHUNAA

▪ Ngaa importante para sa imo nga basahon ang Pulong sang Dios?

▪ Paano mo ‘mabakal ang tion’ sa pagbasa sing Biblia kag pasad sa Biblia nga mga literatura?—Efeso 5:15, 16.

 [Kahon sa pahina 16]

IANGOT ANG IMO GINABASA

Iangot ang imo ginabasa sa kon ano ang imo nahibaluan na tuhoy sa imo kaugalingon kag sa imo palibot. Pamangkuta ang imo kaugalingon sang masunod nga mga pamangkot:

Sa Imo Na Nabasa Ang mga sitwasyon bala ukon mga problema nga ginalaragway pareho sa nabasa ko na sa mga libro, magasin, ukon mga istorya? Ang pamatasan bala sang mga karakter kaanggid sa mga tawo nga nabasahan ko na?

Sa Imo Kaugalingon Paano ining impormasyon naangot sa akon kahimtangan, akon kultura, akon mga problema? Magamit ko bala ining materyal agod maatubang ko ang mga problema ukon agod mapauswag pa ang akon pagkabuhi?

Sa Imo Palibot Ano ang ginatudlo sa akon sining materyal tuhoy sa kinaugali, palibot, nanuhaytuhay nga kultura, ukon mga problema sa katilingban? Ano ang ginatudlo sa akon sining impormasyon tuhoy sa Manunuga?