Magdiretso sa kaundan

Magdiretso sa listahan sang kaundan

Pagpakig-abyan sa Kaeskwela—Tubtob Diin ang Pagpakigsuod?

Pagpakig-abyan sa Kaeskwela—Tubtob Diin ang Pagpakigsuod?

 Pamangkot sang mga Pamatan-on . . .

Pagpakig-abyan sa Kaeskwela​—Tubtob Diin ang Pagpakigsuod?

“Ang akon mga kabutho nagainistoryahanay tuhoy sa ila pagkinasadya sang talipuspusan sang semana. Pamatyag ko daw isa lang ako.”—Michelle. *

“Makita ko kon kaisa ang isa ka grupo sang mga kabataan kag nagahunahuna ako, ‘Baw, miguhay gid sila ba. Tani makaentra man ako sa ila.’”—Joe.

“Indi ko problema ang makig-abyan sa eskwelahan. Kahapos lang sina. Amo ina ang akon problema.”—Maria.

MAS malawig nga tion ang imo ginahinguyang upod sa imo mga kabutho kada adlaw. Halos palarehas ang inyo ginaatubang nga mga kabudlayan, mga kapaslawan, kag mga katigayunan. Sa pila ka paagi, mahimo nagabatyag ka nga daw nagasahuay pa kamo sang imo mga kabutho sangsa imo mga ginikanan, mga utod, ukon mga masigka-Cristiano. Indi katingalahan kon ayhan luyag mo makig-abyan sa ila. May malain bala sa sini? May yara bala mga katalagman? Kon tuhoy sa pagpakig-abyan sa mga kaeskwela, tubtob diin ang pagpakigsuod? Ano ang mga limitasyon?

Kinahanglan Mo ang mga Abyan

Ang tagsatagsa nagakinahanglan sing mga abyan—mga tawo nga makaupod nila sa makalilipay nga mga tion kag masandigan sa mabudlay nga mga tion. Si Jesus may mga abyan, kag nalipay sia makig-upod sa ila. (Juan 15:15) Nian, sang ginpatay sia sa usok sang pag-antos, ang suod nga abyan ni Jesus nga si Juan, “ang disipulo nga iya [labi nga] hinigugma,” nagatindog sa malapit. (Juan 19:25-27; 21:20) Kinahanglan mo ang mga abyan nga kaangay ni Juan—mga tawo nga magaunong sa imo sa tion sang kabudlayan. Ang isa ka hulubaton sa Biblia nagasiling: “Ang matuod nga kaupod nagahigugma sa tanan nga tion, kag isa ka utod nga natawo kon may kapiutan.”—Hulubaton 17:17.

Ayhan may nakita ka nga kaangay sini sa eskwelahan, isa sa imo mga klasmeyt nga nasahuan mo gid dayon. Pareho ang inyo mga naluyagan kag nanamian kamo mag-istoryahanay. Matuod nga ini nga tawo mahimo indi masigkatumuluo; apang, para sa imo, indi man sia makabig nga ‘malain nga kaupod.’ (1 Corinto 15:33) Matuod, may pila ka mga pamatan-on nga wala nagaugyon sa imo mga pagpati sa Biblia pero nagasunod sa maayo nga mga prinsipio. (Roma 2:14, 15) Apang buot bala silingon nga makigsuod ka na sa ila?

 Indi Ermitanyo ang mga Cristiano

Maathag nga wala ginalikawan sang matuod nga mga Cristiano ang mga di-tumuluo. Kay man, agod matuman ang sugo sa ila nga “maghimo sing mga disipulo sa mga tawo sang tanan nga pungsod,” ang mga Cristiano nagapakighambal sa mga lalaki kag babayi sang tanan nga rasa, relihion, kag kultura. (Mateo 28:19) Indi sila makiiyahon ukon nagalikaw sa ila mga kasilingan, mga kaupod sa trabaho, ukon mga kabutho. Sa baylo, ginapakita sang mga Cristiano ang tunay nga interes sa iban.

Nagpahamtang sing maayo nga halimbawa si apostol Pablo sa sini nga bahin. Nakahibalo sia kon paano makigsugilanon sa “tanan nga sahi sang tawo,” bisan pa nga wala sila nagaugyon sa iya mga pagpati. Sa pagkamatuod, indi katuyuan ni Pablo nga makig-upod sa ila. Sa baylo sia nagsiling: “Ginahimo ko ang tanan nga butang tungod sa maayong balita, agod mangin manugpaambit ako sini sa iban.”—1 Corinto 9:22, 23.

Sarang mo mailog ang halimbawa ni Pablo. Mangin mainabyanon sa imo mga katubotubo. Mangin lantip sa pagpakig-angot sa ila. Ang pila sa imo mga kabutho mahimo nagapangita sing pasad-sa-Biblia nga paglaum nga yara sa imo. Binagbinaga ang eksperiensia sang isa ka Cristianong babayi nga si Janet. Sila sang iya mga klasmeyt gin-asaynan nga magsulat sing isa ka malip-ot nga komento tuhoy sa ila masigkaestudyante, kag nian mahimo nga basahon sang tagsa ka estudyante ang komento tuhoy sa iya. Ang isa sa mga komento nga nabaton ni Janet mabasa: “Daw pirme gid lang nga tuman sa imo ka malipayon. Palihug sugiri kami kon ngaa!”

Subong sang ginalaragway sini nga eksperiensia, ang iban sa imo mga klasmeyt mahimo nga luyag magpamati sa imo mga pagpati. Matuod gid nga bentaha sa imo kon mangin mainabyanon ka sa ila. Walay duhaduha, magahatag ini sa imo sing kahigayunan nga mapaathag ang imo mga pagpati. Tuguti man ang imo mga klasmeyt nga magpabutyag sang ila mga pagtamod, kag mamati sing maayo sa ila. Ang imo eksperiensia sa pagpakig-angot sa imo mga kaupod makabulig sa imo kon  magtrabaho ka na sa ulihi kag makaatubang sang pareho nga mga kahimtangan. Sa eskwelahan kag sa duog sang trabaho, ang pagkamainabyanon makabulig sa imo nga ‘mapunihan ang panudlo sang aton Manluluwas, ang Dios, sa tanan nga butang.’—Tito 2:10.

“Sampihakan” nga mga Pag-abyanay

Siempre pa, may kinatuhayan ang mangin maayo sa isa ka klasmeyt kag ang mangin iya suod nga abyan. Si Pablo nagsulat: “Dili kamo magpagota sing sampihakan upod sa mga di-tumuluo.” (2 Corinto 6:14) Agod mangin suod nga abyan sang isa, pareho ka sing mga prinsipio kag mga tulumuron sina nga tawo. Indi gid ina posible sa isa ka tawo nga wala nagaugyon sa imo Makasulatanhon nga mga pagpati kag mga talaksan. Kon magpagota ka sing sampihakan upod sa isa ka di-tumuluo nga klasmeyt, mahimo gid nga madalahig ka sa sayop nga mga buhat ukon magdunot ini sang imo mapuslanon nga mga batasan.

Natun-an ini ni Maria paagi sa isa ka masakit nga eksperiensia. Bangod mainabyanon sia mahapos sa iya ang makig-abyan apang nabudlayan sia magbutang sing mga limitasyon. “Nalipay ako kon nanamian ang iban sa akon, mga lalaki man ukon babayi,” ginbaton niya. “Subong resulta, amat-amat ako nga nahulog sa hatayhatay sini nga kalibutan.”

Kaangay ni Maria, mahimo indi mo man mahibaluan kon san-o ang pagpakig-abyan sa isa nga di-tumuluo nagsobra na kasuod. Walay sapayan, malikawan ang kasakit sang buot paagi sa pagpahamtang sing maathag nga dulunan kon sin-o ang imo kabigon nga kakilala kag kon sin-o ang imo pilion nga mangin suod nga abyan. Paano mo ini mahimo?

Kon Paano Magpili sing Maayo nga mga Abyan

Subong sang ginsambit kaina, ginpalambo ni Jesus ang suod nga pagpakig-abyan samtang yari sia sa duta. Ginhimo ini ni Jesus paagi sa pagkabuhi sing bunayag kag paagi sa pagpamulong tuhoy sa espirituwal nga mga butang. Kon batunon sang mga tawo ang iya mga panudlo kag estilo sang pagkabuhi, nagapakigsuod sila sa iya. (Juan 15:14) Halimbawa, pagkatapos nga nabatian ang pinamulong ni Jesus, napahulag gid ang apat ka lalaki amo nga “ginbayaan [nila] ang tanan nga butang kag nagsunod sila sa iya.” Ining mga lalaki—sanday Pedro, Andres, Santiago kag Juan—nangin suod nga mga abyan ni Jesus.—Lucas 5:1-11; Mateo 4:18-22.

Maathag gid sa mga pulong kag mga buhat ni Jesus nga serioso sia sa iya ginapatihan kag malig-on sa iya tindog. Naglakat ang mga indi luyag magbaton kay Jesus kag sa iya mga panudlo, kag gintugutan niya sila.—Juan 6:60-66.

Halimbawa, natandog gid si Jesus sa pagkasinsero sang isa ka pamatan-on nga lalaki. Ang Biblia nagasiling: “Gintulok sia ni Jesus kag nagbatyag sing gugma sa iya.” Apang sang narealisar sang pamatan-on kon ano ang ginapaabot ni Jesus sa iya mga abyan, “naglakat” sia. Ang pamatan-on daw maayo nga tawo—sa katunayan, si Jesus “nagbatyag sing gugma sa iya.” Apang, labi pa ang ginapaabot ni Jesus sa iya mga abyan. (Marcos 10:17-22; Mateo 19:16-22) Kamusta ka?

Ayhan may nasahuan ka nga isa ka kabutho. Apang, pamangkuta ang imo kaugalingon: ‘Handa bala nga himuon sini nga tawo ang mga sugo ni Jesus? Luyag bala niya nga magtuon tuhoy kay Jehova, ang isa nga gintudlo ni Jesus nga simbahon naton?’ (Mateo 4:10) Samtang nagapakigsugilanon ka sa imo mga klasmeyt kag nagakabuhi sa mga talaksan sang Biblia, mangin maathag ang mga sabat sa sining mga pamangkot.

Nagakaigo nga mangin mainabyanon sa imo mga klasmeyt, subong nga si Jesus mainabyanon sa tanan nga sahi sang tawo. Apang, ginapat-od ni Jesus nga ang iya suod nga mga abyan nagahigugma sa iya langitnon nga Amay nga si Jehova. Sarang mo man ini mahimo. “Hupti nga maayo ang inyo paggawi” sa eskwelahan, kag makigsugilanon sing mataktikanhon sa iban tuhoy sa imo mga pagpati. Labaw sa tanan, pat-ura nga ginapili mo ang maayo nga mga abyan.—1 Pedro 2:12.

HUNAHUNAA

▪ Ano nga mga katalagman ang mahimo matabo sa paghinguyang sing tion upod sa di-tumuluo nga klasmeyt pagkatapos sang klase? Maalamon bala ina nga dalanon?

▪ Pagkatapos mabasa ini nga artikulo, nabatyagan mo bala nga ang imo pagpakig-angot sa imo klasmeyt nangin sobra ka suod? Kon amo, ano ang mahimo mo sa sini?

[Nota]

^ par. 3 Gin-islan ang iban nga mga ngalan.

[Kahon/Mga retrato sa pahina 18]

How Can I Make Real Friends?

Ini nga video, nga ginhimo sang mga Saksi ni Jehova, nagapakita sang prangka nga mga interbyu sa mga pamatan-on halin sa Espanya, Estados Unidos, Italya, kag Pransia. Matigayon ini sa 36 ka lenguahe.

[Retrato sa pahina 18]

Ang pila sang imo mga klasmeyt mahimo nga interesado nga makahibalo tuhoy sa imo mga pagtuluuhan