Magdiretso sa kaundan

Magdiretso sa listahan sang kaundan

“Ginbilanggo Bangod sang Ila Pagtuo”

“Ginbilanggo Bangod sang Ila Pagtuo”

 “Ginbilanggo Bangod sang Ila Pagtuo”

SUNO SA MANUNULAT SANG MAGMATA! SA POLAND

ANG mga tinaga nga Arbeit Macht Frei (Ang Hilikuton Nagahatag Sing Kahilwayan) makita gihapon tubtob karon sa salsalon nga gawang sang kampo konsentrasyon sa Auschwitz sa nabagatnan sang Poland, mga 60 kilometros gikan sa dulunan sang Czech. * Apang, ini nga mga tinaga nagasumpakil sa natabo sa kalabanan nga nagsulod sa sadto nga gawang sa ulot sang 1940 kag 1945. Sa sulod sini nga mga tinuig, kapin sa isa ka milyon ka tawo sa Auschwitz ang napatay sa mga kamot sang mga Nazi. Apang, may mga indibiduwal  kuntani sa isa ka grupo nga nahatagan sang ila kahilwayan bisan ano man nga oras.

Ano ang kondisyon agod mahilway sila? Ang bisan sin-o nga bilanggo nga isa sa mga Saksi ni Jehova nga magapirma sa isa ka papeles nga nagasiling nga indi na sia mag-alagad sing aktibo subong isa ka Saksi sarang makatigayon sing kahilwayan. Ano ang gindesisyon sang kalabanan? Ang istoryador nga si István Deák nagsiling nga ang mga Saksi “kaanggid sa una nga mga Cristiano nga nagpili nga lamunon sang mga leon sa baylo nga magbutang sing diutay lamang nga halad sa altar sang Romano nga emperador.” Takus gid dumdumon ini nga panindugan, kag ginadumdom ini matuod.

Sa sulod sang duha ka bulan, sugod sang Septiembre 21, 2004, nagpresentar ang mayor nga hulot sang Auschwitz-Birkenau State Museum sing isa ka eksibit nga gindedikar para lamang sa mga Saksi. Ang nagakaigo nga tema sang eksibit amo “Ginbilanggo Bangod Sang Ila Pagtuo—Ang mga Saksi ni Jehova kag ang Pagginahom Sang mga Nazi.” Nagpasundayag ini sing 27 ka maragtason nga eksibit nga nagalaragway sang malig-on nga determinasyon sang mga Saksi nga magpabilin nga neutral subong mga Cristiano sa tion sang dag-on sang mga Nazi.

Madamo nga bisita ang natandog sa kopya sang isa ka sulat nga ginpadala halin sa bilangguan ni Deliana Rademakers nga taga-Netherlands. Nagsulat sia sa iya pamilya: “Nanumpa ako nga himuon ang kabubut-on ni Jehova. . . . Magmasidla kamo kag magpakaisog. Upod naton si Jehova.” Sang 1942, gintapok si Deliana sa Auschwitz, diin napatay sia pagligad sang mga tatlo ka semana.

Mga 400 tanan ang mga Saksi sa sulod sang kampo konsentrasyon sa Auschwitz. Tatlo sa mga nakalampuwas didto ang nagtambong sa inagurasyon sang eksibit, diin ginsaysay nila ang ila mga naeksperiensiahan kag ginsabat nila ang mga pamangkot sang mga dyurnalista. Nagpakita sila sing amo man nga kabakod nga nagbulig sa ila agod maagwanta ang mga kahimtangan sa sulod sang kampo.

Sa iya libro nga Imprisoned for Their Faith—Jehovah’s Witnesses in Auschwitz Concentration Camp, ang manugpanalawsaw nga si Teresa Wontor-Cichy sang State Museum nagsulat: “Ang panindugan sining gamay nga grupo positibo nga nag-impluwensia sa iban pa nga mga bilanggo, kag ang ila determinasyon sa adlaw-adlaw nga magpabilin nga malig-on nagpabakod sa iban pa sa pagsalig nga sa idalom sang tanan nga kahimtangan sarang makapabilin nga matutom ang mga tawo sa mga prinsipio nga ila ginapatihan.”

Ang matuod, ang pagkabilanggo kag kamatayon indi bag-o sa mga sumulunod ni Jesucristo, nga gindakop man mismo kag ginpatay bangod sa iya pagtuo. (Lucas 22:54; 23:32, 33) Ang apostol ni Jesus nga si Santiago ginpatay man. Si apostol Pedro ginbilanggo, kag si apostol Pablo ginsakit kag ginbilanggo sing madamo nga beses.—Binuhatan 12:2, 5; 16:22-25; 2 Corinto 11:23.

Sing kaanggid man, ang mga Saksi ni Jehova sa Europa naghatag sing isa ka maayo gid nga halimbawa sang pagtuo sa Dios sang katuigan 1930 kag 1940. Dalayawon nga ang pagtuo sini nga mga utod ginkilala sa Auschwitz.

[Nota]

^ par. 3 Ang Auschwitz may tatlo ka mayor nga bahin—Auschwitz I (mayor nga kampo), Auschwitz II (Birkenau), kag Auschwitz III (Monowitz). Ang kalabanan sang ginakahadlukan nga mga gas chamber yara sa Birkenau.

[Retrato sa pahina 10]

Tatlo ka nakalampuwas sa Auschwitz nga nagauyat sang board nga nagaunod sang tig-ulo sang eksibit

[Mga retrato sa pahina 11]

Si Deliana Rademakers, kag ang sulat nga iya ginsulat sang bilanggo sia

[Credit Line]

Inset photos: Zdjęcie: Archiwum Państwowego Muzeum Auschwitz-Birkenau

[Credit Line sang retrato sa pahina 10]

Tower: Dzięki uprzejmości Państwowego Muzeum Auschwitz-Birkenau