Magdiretso sa kaundan

Magdiretso sa listahan sang kaundan

Gikan sa Amon mga Bumalasa

Gikan sa Amon mga Bumalasa

 Gikan sa Amon mga Bumalasa

Pagbulig sa mga Tin-edyer nga Yara sa Katalagman (Abril 8, 2005) Ini nga serye tuman gid ka impormatibo. Kon kaisa, ang pagkatin-edyer mabudlay gid, apang ang makapalig-on nga mga artikulo kaangay sini makabuhin sa mga kahuol. Amo gid ini ang sahi sang impormasyon nga kinahanglan namon agod mapalig-on kami sa sining “makahalanguyos nga mga tion nga mabudlay pakigbagayan.” (2 Timoteo 3:1) Ang mga pahanumdom sa sini nga artikulo makabulig sa amon nga indi masiod sang mga “pahito sang Yawa.” (Efeso 6:11) Salamat gid sa pag-aman sining espirituwal nga pagkaon sa nagakaigo nga tion.

K. S., Estados Unidos

A Clean Home—The Part We All Play (Hunyo 8, 2005 nga Awake!) Sang gamay pa ako, pareho nga nagatrabaho ang akon mga ginikanan kag kami nga tatlo ka mag-utod nagasagad lang hampang sa balay. Gani, nagaululukay lang ang amon balay. Bisan subong ginatamaran gihapon ako magpaninlo. Apang sang ginbasa ko ini nga artikulo daw subong bala nga mapinalanggaon nga ginatudluan ako sang akon iloy kon paano magpaninlo. Karon dalagku naman ang akon mga kabataan, kag ginatamaran man sila magpaninlo. Madamo ako sang dapat itudlo sa ila. Napalig-on ako sang artikulo.

Y. E., Japan

For Family Review (Mayo 8, 2005 nga Awake!) Sang nakita ko ini nga artikulo, naglumawlumaw ang akon mga mata. Ginpakita ko ini sa akon anak nga babayi. Nian, ginsugiran niya ako nga nabasa na niya ang artikulo tuhoy sa nasamad nga maya kag nasabat na niya ang mga pamangkot sa “For Family Review.”

L. S., Estados Unidos

Mga Librarya—Mga Ganhaan Padulong sa Ihibalo (Hunyo 8, 2005) Palihug tuguti ako nga ipatalupangod nga ang laragway sa pahina 18 indi si Hari Asurbanipal sang Asiria. Ang yara sa laragway amo si Hari Esar-hadon sang Asiria.

A. W., Alemanya

Sabat sang “Magmata!”: Salamat gid sa pagpatalupangod sini. Subong sa ginapakita sang isa ka reperensia sa Biblia nga “Insight on the Scriptures,” Tomo 1, pahina 757, si Esar-hadon amo ang manghod nga anak nga lalaki kag manunubli sa trono ni Hari Senaquerib sang Asiria. *

The Amazing Maya Calendar (Abril 8, 2005 nga Awake!) Bangod sini nga artikulo nagpanalawsaw ako sa Internet. Nasapwan ko nga may yara gid kaangtanan ang astrolohiya kag ang kalendaryo sang Maya. Para sa akon ang pagbalhag sing mga artikulo nga kaangay sini nagaganyat sa mga bumalasa nga mangin interesado sa astrolohiya kag salamangka.

J. K., Poland

Sabat sang “Magmata!”: Subong sang ginsiling sa pahina 4 sang “Magmata!” ini nga dyurnal ‘nagareport sang mga balita, nagasugid tuhoy sa katawhan sa madamong kadutaan, nagausisa sang relihion kag siensia.’ Maathag nga wala ini nagakahulugan nga ginarekomendar namon ang tanan nga mga butang sa sini nga mga patag. Sa malip-ot nga artikulo nga imo ginapatuhuyan, nagasugid kami tuhoy sa dumaan nga Maya, nga ang ila lantip nga kalkulasyon sa tion nakabulig agod mahimo ang sibu nga mga kalendaryo. Ang kamatuoran nga ginagamit ini nga kalendaryo sa pagpamakot—nga ginsiling man sa artikulo—indi dapat magganyat sa mga bumalasa nga mangin interesado sa astrolohiya.

Kon kaisa makabaton kami sang mga pamangkot tuhoy sa mga laragway nga makita sa amon mga publikasyon. Ang mga retrato sang mga idolo, relihioso nga mga simbulo, ukon mga butang nga ginagamit sa espiritismo wala ginatuyo nga pukawon ang pagkamausisaon kundi agod ipaathag kon ano ang yara sa likod sini nga mga butang kag agod paandaman ang mga bumalasa nga maglikaw sa sini. Madamo sa mga komento nga nabaton namon ang nagapakita nga ang amon mga artikulo kag ang mga laragway sa sini mapuslanon gid.

[Nota]

^ par. 10 Ginbalhag sang mga Saksi ni Jehova.