Magdiretso sa kaundan

Magdiretso sa listahan sang kaundan

May Isa Lamang Bala ka Matuod nga Dios?

May Isa Lamang Bala ka Matuod nga Dios?

 Ang Pagtamod sang Biblia

May Isa Lamang Bala ka Matuod nga Dios?

SANDAY Artemis, Astoret, Baal, Dagon, Hermes, Merodac, Moloc, kag Zeus pila lamang sa mga dios kag mga diosa nga ginasambit sa Biblia. (Levitico 18:21; Hukom 2:13; 16:23; Jeremias 50:⁠2; Binuhatan 14:12; 19:24) Apang, si Jehova lamang ang ginalaragway sang Kasulatan subong Labing Gamhanan nga Dios. Sa isa ka ambahanon sang kadalag-an, ginpangunahan ni Moises ang iya katawhan sa pag-amba: “Sin-o sa mga dios ang kaangay mo, O Jehova?”​—⁠Exodo 15:11.

Maathag nga sa Biblia si Jehova labaw sa tanan iban pa nga mga dios. Apang, ano nga papel ang ginatungdan sining kubos nga mga dios? Sila bala, kag ang iban pa di-maisip nga mga dios nga ginasimba sa bug-os nga maragtas, matuod man nga mga dios ugaling mas kubos lang sa Labing Gamhanan nga Dios nga si Jehova?

Sa Handurawan Lamang

Ginapakilala sang Biblia si Jehova subong ang lamang matuod nga Dios. (Salmo 83:18; Juan 17:3) Ginrekord ni manalagna Isaias ang mga pinamulong mismo sang Dios sang nagsiling sia: “Una sa akon wala sing Dios nga nahuman, kag wala na sa ulihi nakon. Ako​—⁠ako si Jehova, kag luwas sa akon wala sing manluluwas.”​—⁠Isaias 43:​10, 11.

Ang tanan iban pa nga mga dios indi lamang kubos kay Jehova. Masami nga wala sila nagaluntad​—⁠isa gid lamang ka handurawan sang tawo. Ginapatuhuyan sang Biblia ining mga dios subong “hinimuan sang mga kamot sang tawo . . . , nga indi makakita ukon makabati ukon makakaon ukon makapanimaho.” (Deuteronomio 4:28) Maathag nga ginatudlo sang Biblia nga si Jehova ang lamang matuod nga Dios.

Indi makapakibot nga ang Kasulatan nagapaandam gid batok sa pagsimba sa bisan ano nga dios luwas kay Jehova. Halimbawa, sa una sa Napulo ka Sugo nga ginhatag kay Moises, ang pungsod sang Israel sang una ginsugo nga indi magsimba sa iban nga dios. (Exodo 20:3) Ngaa?

Una, ang pagsimba sa isa ka dios nga wala gani nagaluntad isa ka daku nga insulto sa Manunuga. Ginapakita sang Biblia nga “ginbaylo [sang mga sumilimba sa sining butig nga mga dios] sa butig ang kamatuoran sang Dios kag nagsimba kag nag-alagad sang tinuga sa baylo sang Manunuga.” (Roma 1:25) Masami nga ining wala nagaluntad nga mga dios ginarepresentaran sang mga diosdios nga human sa kinaugali nga mga materyales, subong sang metal ukon kahoy. Madamo nga mga dios ang ginaangot sa pila ka aspekto sang kinaugali, subong sang daguob, kadagatan, kag hangin. Maathag gid nga ang pagsimba sa sining butig nga mga dios isa ka daku nga pagtampalas sa Labing Gamhanan nga Dios.

Ang butig nga mga dios kag ang ila mga diosdios makangilil-ad gid sa atubangan sang Manunuga. Apang, ang kaakig sang Dios labi gid nga ginapatungod sa mga tawo nga naghimo sining butig nga mga dios. Mabaskog nga ginpabutyag niya ang iya balatyagon sa sining mga pulong: “Ang mga diosdios sang mga pungsod pilak kag bulawan, ang buhat sang mga kamot sang mga tawo. May mga baba sila, apang wala sila nagahambal; may mga mata sila, apang indi makakita; may mga dulunggan sila, apang indi makabati. Kag wala sing ginhawa sa ila baba. Ang mga nagahimo sa ila mangin kaangay sa ila, ang tagsatagsa nga nagasalig sa ila.”​—⁠Salmo 135:15-18.

May isa pa ka rason kon ngaa nagapaandam gid ang Biblia batok sa pagsimba sa bisan ano ukon  sa kay bisan sin-o magluwas kay Jehova nga Dios. Ina nga pagsimba isa gid ka daku nga pag-uyang sing tion kag panikasog. Nagakaigo gid ang ginsiling ni manalagna Isaias: “Sin-o ang nakahuman sing isa ka dios ukon nakahurma sing isa lamang ka larawan nga tinunaw? Ini wala gid sing pulos.” (Isaias 44:10) Ang Biblia nagasiling man nga “ang tanan nga dios sang katawhan walay pulos nga mga dios.” (Salmo 96:5) Ang butig nga mga dios wala nagaluntad, kag ang pagsimba sa wala, wala man sing matigayon.

Si Jesus, ang mga Anghel, kag ang Yawa

Kon kaisa, ginapatuhuyan sang Kasulatan ang mga tawo mismo subong mga dios. Apang, ang isa ka maid-id nga pagpangusisa maathag nga nagapakita nga ang termino nga “dios” sa sini nga mga halimbawa wala gintuyo agod itangdo ining mga indibiduwal subong mga dios. Sa baylo, sa orihinal nga mga lenguahe nga gingamit sa pagsulat sa Biblia, ang termino nga “dios” ginagamit man sa paglaragway sa isa ka gamhanan nga persona ukon sa isa ka indibiduwal nga balaan ukon may suod nga kaangtanan sa Labing Gamhanan nga Dios.

Halimbawa, ang pila ka mga bersikulo sa Biblia nagapatuhoy kay Jesucristo subong isa ka dios. (Isaias 9:​6, 7; Juan 1:​1, 18) Nagakahulugan bala ini nga dapat simbahon si Jesus? Si Jesus mismo nagsiling: “Magsimba ka kay Jehova nga imo Dios, kag sa iya ka lamang magahimo sing sagrado nga pag-alagad.” (Lucas 4:8) Gani, maathag nga bisan si Jesus gamhanan sa kusog kag kaangay sa Dios, wala sia ginalaragway sang Biblia subong isa nga dapat simbahon.

Ang mga anghel ginapatuhuyan man subong “kaangay sang dios.” (Salmo 8:⁠5; Hebreo 2:7) Walay sapayan sini, wala sing mabasa sa Kasulatan nga nagapalig-on sa mga tawo nga simbahon ang mga anghel. Ang matuod, sang isa ka higayon, ang tigulang na nga si apostol Juan nahalawhaw gid sa presensia sang isa ka anghel amo nga nagyaub sia sa pagsimba sa anghel. Apang, ang anghel nagsiling: “Maghalong ka! Indi paghimua ina! . . . Simbaha ang Dios.”​—⁠Bugna 19:10.

Ginlaragway ni apostol Pablo ang Yawa subong “ang dios sining sistema sang mga butang.” (2 Corinto 4:4) Subong “ang manuggahom sini nga kalibutan,” ginapasanyog sang Yawa ang pagsimba sa di-maisip nga butig nga mga dios. (Juan 12:31) Gani, ang tanan nga pagsimba nga ginapatungod sa ginhimo-sang-tawo nga mga dios isa gid ka pagsimba kay Satanas. Apang, si Satanas indi isa ka dios nga nagakadapat sang aton pagsimba. Isa sia ka manuggahom nga nagtangdo sang iya kaugalingon, isa ka manug-agaw. Sa ulihi, sia kag ang tanan nga sahi sang butig nga pagsimba, pagalaglagon. Kon matabo na ina, ang tanan nga katawhan​—⁠huo, ang tanan nga tinuga​—⁠magakilala kay Jehova subong ang lamang matuod kag buhi nga Dios tubtob sa walay katubtuban.​—⁠Jeremias 10:10.

NAGPALIBOG KA BALA?

▪ Ano ang ginatudlo sang Biblia tuhoy sa pagsimba sa mga diosdios?​—⁠Salmo 135:15-18.

▪ Si Jesus bala kag ang mga anghel dapat simbahon subong mga dios?​—⁠Lucas 4:8.

▪ Sin-o ang lamang matuod nga Dios?​—⁠Juan 17:3.

[Mga retrato sa pahina 28, 29]

Mga imahen halin sa nawala patuo: Maria, sa Italya; dios sang mais sang mga Maya, sa Mexico kag Sentral nga Amerika; Astoret, sa Canaan; anting-anting nga dios, sa Sierra Leone; isa ka Buddha, sa Japan; Chicomecóatl, sa Aztec, Mexico; Horus nga dapay, sa Egipto; Zeus, sa Gresya

[Credit Line]

Maize god, Horus falcon, and Zeus: Photograph taken by courtesy of the British Museum