Magdiretso sa kaundan

Magdiretso sa listahan sang kaundan

Ngaa Dapat Ka Magkuha sing Panuytoy Gikan sa Biblia?

Ngaa Dapat Ka Magkuha sing Panuytoy Gikan sa Biblia?

 Ang Pagtamod sang Biblia

Ngaa Dapat Ka Magkuha sing Panuytoy Gikan sa Biblia?

“Ang bug-os nga Kasulatan inspirado sang Dios kag mapuslanon sa pagpanudlo, sa pagsabdong, sa pagtadlong sa mga butang.”​—⁠2 Timoteo 3:16.

SA DIIN ka nagakuha sing panuytoy para sa imo kabuhi? Madamo gid nga laygay ang matigayon karon sa halos bisan ano nga topiko nga mahunahuna mo. Sa gihapon, madamo ang nagakuha sing panuytoy gikan sa dumaan nga mga sinulatan sa Biblia.

Apang, ginapakanubo sang kalabanan ang Biblia, ilabi na sa karon nga dag-on nga madamo nga impormasyon ang matigayon paagi sa kompyuter. Ang pila ka respetado nga mga edukador kag mga sientista nagasakdag sang ideya nga ang Biblia indi na praktikal. Husto bala sila? Sanglit kadamo gid sang makuhaan sing panuytoy karon, ngaa dapat magkuha ang isa sing panuytoy gikan sa Biblia?

Isa ka Tulun-an sang Kamatuoran

Sang isa ka bes nagapahuway si Jesucristo sa higad sang isa ka bubon kag nakigsugilanon sa isa ka Samaritana. Nagsiling sia sa iya: “Ang Dios Espiritu, kag ang mga nagasimba sa iya dapat magsimba sa espiritu kag kamatuoran.” (Juan 4:24) Ginapakita sining mga pulong nga may yara isa ka sahi sang pagsimba nga kalahamut-an sa Dios. Agod mangin matuod ang aton pagsimba, dapat ini maghisanto sa kon ano ang ginpahayag sang Dios tuhoy sa iya kaugalingon sa Biblia. Ang Pulong sang Dios nagaunod sing kamatuoran.​—⁠Juan 17:17.

Madamo nga relihion ang nagapangangkon nga nagapati sa Biblia, apang magkatuhay ang ila ginapanudlo. Subong resulta, may kagumon kon ano gid ang ginatudlo sang Biblia. Si Jesus bala Dios, ukon sia bala Anak sang Dios? May yara bala pihak nga kinabuhi ukon wala? May impierno gid bala diin ginapaantos ang mga tawo kon mapatay sila? Si Satanas bala isa ka matuod nga persona? Ano ang kahulugan sang mangin isa ka Cristiano? Importante gid bala sa Dios ang  aton mga ginabuhat kag ginahunahuna? Makatarunganon bala nga maghirupay ang duha ka tawo bangod lamang nagahigugmaanay sila? Malain bala ang mag-inom sing makahulubog nga ilimnon?⁠ * Madamo nga relihion ang nagapangangkon nga kamatuoran ang ginatudlo nila tuhoy sa sini nga mga butang. Apang masami nga nagasumpakilay ang relihioso nga mga doktrina. Indi mahimo nga kamatuoran ini tanan.​—⁠Mateo 7:21-23.

Paano mo mahibaluan ang kamatuoran tuhoy sa Dios kag ang sahi sang pagsimba nga nagapahamuot sa iya? Ibutang ta nga natukiban mo nga dapat ka magpaopera agod bulngon ang isa ka serioso nga diperensia sa imo lawas. Ano ang himuon mo? Kon mahimo, pangitaon mo gid ang pinakamaayo nga manugbusbos para sa sina nga sahi sang operasyon. Binagbinagon mo ang iya mga kredensial kag eksperiensia, kontakon sia, kag hambalon sia. Pagkatapos, kon makumbinsi ka pasad sa ebidensia nga sia ang pinakamaayo, magasalig ka sa iya kag magpaopera sa iya. Mahimo nga lain ang opinyon sang iban. Apang may basehan ang imo pagsalig sa sini nga manugbusbos.

Sa kaanggid nga paagi, kon usisaon mo sing bunayag kag maid-id ang matigayon nga ebidensia, magalambo ang imo pagtuo sa Dios kag sa Biblia. (Hulubaton 2:1-4) Sa pagpangita sing mga sabat sa mga pamangkot tuhoy sa kon ano nga sahi sang pagsimba ang ginakahamut-an sang Dios, may pililian ka. Sarang mo mausisa ang nagasumpakilay nga mga panudlo kag mga opinyon sang mga tawo, ukon sarang mo mabinagbinag kon ano ang pagtamod sang Biblia.

Sibu kag Praktikal

Ang maid-id nga pag-usisa sang Biblia magahatag sa imo sing daku nga ebidensia nga “ang bug-os nga Kasulatan inspirado sang Dios kag mapuslanon.”⁠ * (2 Timoteo 3:​16, 17) Halimbawa, ang Biblia nagaunod sing detalyado nga mga tagna. Ginapamatud-an sang maragtas ang katumanan sini. (Isaias 13:​19, 20; Daniel 8:3-8, 20-22; Miqueas 5:2) Bisan pa indi isa ka libro tuhoy sa siensia, ang Biblia nagasibu sa siensia. Nagaunod ini sing mga katunayan tuhoy sa kinaugali kag ikaayong lawas nga ginsulat linibo ka tuig sang una sang wala pa makahimo ang mga sientista sing pareho man nga mga konklusion.​—⁠Levitico 11:​27, 28, 32, 33; Isaias 40:22.

Dugang pa, ginabuligan kita sang Biblia sa paghimo sing maalamon nga mga desisyon. Nagaunod ini sing madamo nga praktikal nga laygay tuhoy sa pamilya, pisikal kag emosyonal nga kapagros, negosyo, kag iban pa nga mga butang sa adlaw-adlaw nga pagsinalayo. Ang Hulubaton 2:​6, 7 nagasiling: “Si Jehova nagahatag sing kaalam; gikan sa iya baba nagagua ang ihibalo kag paghantop. Kag para sa mga matadlong magatipon sia sing praktikal nga kaalam.” Paagi sa pagkuha sing panuytoy gikan sa Biblia, mahanas mo ang imo ikasarang sa paghantop “nga makilala ang maayo kag malain.”​—⁠Hebreo 5:14.

Ginabuligan man kita sang Pulong sang Dios nga mahangpan ang katuyuan sang kabuhi. (Juan 17:⁠3; Binuhatan 17:​26, 27) Ginapaathag sini kon ano ang kahulugan sang mga kahimtangan sa kalibutan. (Mateo 24:​3, 7, 8, 14; 2 Timoteo 3:1-5) Paagi sa sini, ginapakita sang Dios kon paano niya dulaon ang kalautan sa duta kag hatagan ang katawhan sing himpit nga panglawas kag dayon nga kabuhi.​—⁠Isaias 33:24; Daniel 2:44; Bugna 21:​3, 4.

Madamo ang nakaeksperiensia nga ang Biblia isa gid ka masaligan nga kuluhaan sing praktikal nga kaalam. Ginaagda ka sang mga manugbalhag sang Magmata! nga usisaon ang mga serye sang artikulo nga natig-uluhan “Ang Pagtamod Sang Biblia,” nga ginalakip sa tagsa ka gua sini nga magasin. Sa paghimo sini, mahimo nga makakuha ka sing dugang pa nga ebidensia nga ang Biblia amo ang labing maayo nga kuluhaan sing panuytoy para sa imo mismo kabuhi.

[Mga nota]

^ par. 8 “Ang Pagtamod Sang Biblia”​—⁠isa ka regular nga bahin sang Magmata!​—⁠magabinagbinag sini kag sang iban pa nga mga pamangkot sa palaabuton nga mga gua.

^ par. 12 Para sa ebidensia nga ang Biblia gin-inspirar sang Dios, tan-awa ang libro nga The Bible​​—⁠God’s Word or Man’s? nga ginbalhag sang mga Saksi ni Jehova.

NAGPALIBOG KA BALA?

▪ Ano nga sahi sang pagsimba ang ginakahamut-an sang Dios?—⁠Juan 4:24.

▪ Ano ang dapat mo himuon agod makabenepisyo ka gikan sa kaalam sang Dios?​—⁠Hulubaton 2:1-4.

▪ Ngaa praktikal nga panuytoy ang makuha gikan sa Biblia?​—⁠Hebreo 5:14.