Magdiretso sa kaundan

Magdiretso sa listahan sang kaundan

Isa ka Pinasahi nga Sahi sang Paglakat!

Isa ka Pinasahi nga Sahi sang Paglakat!

 Isa ka Pinasahi nga Sahi sang Paglakat!

SUNO SA MANUNULAT SANG MAGMATA! SA FINLAND

Nakabati ka na bala sang paglakat nga ginatawag sa Ingles nga “Nordic walking?” Isa ini sa pinakapopular nga sahi sing ehersisyo sa Finland. Nagagamit ini sang sungkod nga kaangay sa ginagamit sa pag-“ski.” Paano ini nag-umpisa, kag ano ang mga benepisyo sini?

KON makita mo ang isa ka Nordic walker ukon ang isa nga nagalakat nga nagagamit sing sungkod, mahimo madumduman mo ang isa ka skier nga wala sing ski. Sa pagkamatuod, ang mga nagapaindis-indis sa ski amo ang nag-umpisa sang Nordic walking sang naghanas sila sing lakas sang tig-ilinit paagi sa paglakat nga nagagamit sang ila mga ski poles (sungkod). Sang katuigan 1980, ang paglakat nga nagagamit sing sungkod ginsugdan sang iban nga mga atleta subong isa ka epektibo nga ehersisyo. Sang talipuspusan sang 1990, madamo na ang naga-Nordic walking. Ginapakita sang Gallup nga surbe sang 2004 nga 760,000 ka taga-Finland​—⁠19 porsiento sang populasyon​—⁠ang naga-Nordic walking sing di-magkubos makaisa kada semana. “Ang Nordic walking amo na karon ang ikaduha sa pinakapopular nga ehersisyo sa Finland, ang paglakat amo ang nagapanguna,” siling ni Tuomo Jantunen, ehekutibo nga direktor sang Suomen Latu, ang organisasyon nga nagpasurbe. Ang Nordic walking indi lamang umalagi nga uso. Sining karon lang nga mga tinuig amat-amat na ini nga ginahimo sa iban pa nga mga pungsod.

Nahibaluan sang madamo ang mga benepisyo sang paglakat, apang ano ang mga benepisyo sang paglakat nga may sungkod? “Ang isa ka daku nga benepisyo sang Nordic walking amo nga nagahulag ang naibabaw nga bahin sang lawas, lakip na ang mga maskulo sa butkon, likod, kag tiyan,” siling sang physical therapist kag eksperto sa Nordic walking nga si Jarmo Ahonen. “Nagabulig man ini agod makuha ang pagpalanig-a sang liog kag abaga, nga masami nga problema sang mga nagaopisina,” dugang niya.

Mas madamo nga kalori ang mabuhin sa lawas kon naga-Nordic walking sangsa kon nagalakat lamang bangod mas madamo nga maskulo ang nagapamuwersa. Ang paggamit sing sungkod nagapadasig man sang paglakat kag sang pitik sang pulso. Apang indi lamang ina. Ang mga tagsakdag sini nagasiling nga kon husto ang paggamit sang sungkod, nagabulig ini sa isa nga maglakat sing tiso, sa amo nagapauswag sang postura. “Ang Nordic walking nagapaumpaw man sang pagpalanakit sang mga lutalutahan, kay ang bug-at sang lawas mapaliton sa sungkod,” siling ni Ahonen. Ang isa ka Nordic walker nagsiling nga ang taliwis nga sungkod nagabulig sa iya sa pagbalanse kon nagalakat sa madanlog nga mga lugar. Amo gani nga ang mga may edad naga-Nordic walking kon tigtulugnaw, kon ang duta masunson nga nakulapan sing niebe ukon yelo.

[Kahon sa pahina 22]

Pagpanugod

Indi gid man mahal ang mga galamiton para sa Nordic walking. Dapat may komportable ka lang nga sapatos kag gindesinyo sing maayo nga sungkod nga hustuhan ang kalabaon. Kon nagalakat ka sa matig-a nga lugar, butangi sing goma ang taliwis nga punta sang sungkod. Indi mabudlay ang Nordic walking. Matun-an mo ini. Apang, kon bag-uhan ka pa lang, maayo gid nga magpatudlo ka sa isa ka eksperto sa Nordic walking.