Magdiretso sa kaundan

Magdiretso sa listahan sang kaundan

Ang Siensia kag ang Biblia Nagbulig sa Akon nga Makita ang Katuyuan sang Kabuhi

Ang Siensia kag ang Biblia Nagbulig sa Akon nga Makita ang Katuyuan sang Kabuhi

 Ang Siensia kag ang Biblia Nagbulig sa Akon nga Makita ang Katuyuan sang Kabuhi

PANUGIRON NI BERND OELSCHLÄGEL

Ginpangita ko ang kahulugan sang kabuhi sa sulod sang 20 ka tuig. Duha ka butang ang nakabulig sa akon nga makita ini: ang siensia kag ang Biblia. Ginpamatud-an sang akon pagtuon sa siensia nga ang kabuhi may katuyuan. Apang ginpakita sa akon sang Biblia ina nga katuyuan kag ginbuligan ako nga mahangpan ini.

AYHAN nakabati ka na sa pila ka tawo nga nagasiling nga ang siensia nagasumpakil sa Biblia. Pareho ko nga gintun-an ang siensia kag ang Biblia, kag wala ako nagaugyon sa ila ginasiling. Ayhan interesado ka nga mahibaluan kon ngaa.

Natawo ako sang 1962 sa Stuttgart, nga isa ka siudad sa nabagatnan nga Alemanya. Nagtrabaho si Tatay subong desinyador sang mga makinarya, kag aktibo sila ni Nanay sa mga aktibidades sa simbahan. Ang akon utod nga babayi nga si Karin magulang sa akon sing apat ka tuig.

Sang bata pa ako, ginregaluhan ako ni Tatay sing science experiment kit (hampanganan nga nagatudlo sa bata sa paghimo sing simple nga mga eksperimento sa siensia). Nanamian gid ako sa paghimo sing simple nga mga eksperimento sa kemistri kag pisika. Sa pagkamatuod, ang pagtuon makalilipay gid.

Sang ulihi, sa kompyuter naman ako nahuyog. Bisan sang tin-edyer pa lang ako, nakita ko na nga ang pinakamaayo nga kompyuter amo ang utok. Apang nagpalibog ako: ‘Diin naghalin ang utok? Sin-o ang naghatag sini sa aton? Kag ano ang katuyuan sang kabuhi?’

Pagkuha sing Mas Mataas nga Edukasyon

Nag-untat ako sa pag-eskwela sang 16 anyos ako kag nag-aprentis ako subong kabulig sa isa ka  laboratoryo sang retrato. Bangod mahuyugon gid ako sa pagtuon, tulumuron ko nga magtuon sing pisika sa isa ka unibersidad. Apang wala ako dayon makaeskwela sa unibersidad. Lima ka tuig pa ang naglipas antes ko matuman ang mga kalipikasyon para sa sini. Ginsugdan ko ang akon pag-eskwela sa unibersidad sa Stuttgart sang 1983, kag ginpadayon ko ini sa Munich. Sang ulihi, nangin doktor ako sa pisika sa University of Augsburg sang 1993.

Indi mahapos ang akon una nga mga inadlaw sa unibersidad. Ang awditoryum para sa lektyur kinaandan na nga puno sang mga 250 ka estudyante, apang madamo sa ila ang nag-untat sa sulod lamang sang pila ka bulan. Determinado ako nga indi mag-untat kag tapuson ang akon ginsugdan. Madamo sa akon mga kaupdanan sa dormitoryo ang mahuyugon sa pagyagangyang. Indi gid maayo nga makig-upod sa amo sini nga mga tawo. Subong resulta, nahuyog ako sa magansal nga mga party kag sa pagdroga.

Sa Akon Pagpangita, Nakakadto Ako sa India

Sa akon pagtuon sing pisika, labi ko nga nahangpan ang mga kasuguan sang kinaugali tuhoy sa uniberso. Naglaum ako nga mahibaluan ko kon ano gid ang katuyuan sang kabuhi paagi sa siensia. Apang, ang akon pagpangita para sa katuyuan sang kabuhi isa ka butang nga indi mapaathag sang pisika. Sang 1991, nag-upod ako sa isa ka grupo pakadto sa India agod magtuon sing Oriental meditation. Makalilipay gid nga makita sing personal ang pungsod kag ang mga pumuluyo sini! Apang nakibot gid ako sa daku nga kinatuhayan sang mga manggaranon kag mga imol.

Malapit sa siudad sang Pune, halimbawa, nagkadto kami sa isa ka guru kag nagsiling sia nga ang pagtuon sing husto nga mga teknik sa pagpamalandong makabulig sa isa nga magmanggaranon. Nagpamalandong kami subong isa ka grupo kada aga. Nagabaligya man ang guru sing mahal kaayo nga mga bulong. Maathag gid nga may daku sia nga kita; ang iya pagsinalayo nagapakita nga manggaranon sia. Nakita man namon ang mga monghe nga daw tuman gid ka imol ang pangabuhi, nga kabaliskaran sa guru. Nagpalibog ako, ‘Ngaa wala sila mabuligan sang pagpamalandong nga magmanggaranon?’ Ang akon pagkadto sa India daw naghatag sing mas madamo pa nga pamangkot sangsa sabat.

Ang isa sa akon gindala nga handumanan gikan sa India amo ang kilingkiling para sa pagpamalandong. Ginsilingan ako nga kon kilingkilingon sing nagakaigo, ang tunog sini makabulig sa akon nga makapamalandong sing husto. Pagpauli ko sa Alemanya, nagbakal ako sing isa ka horoskopyo nga ginhimo sang isa nga nagsiling nga mapaktan niya ang akon buas-damlag. Apang ang pagpamalandong wala sing nasugid sa akon tuhoy sa kabuhi. Natukiban ko man nga ang horoskopyo isa lamang gali ka walay pulos nga panid sang papel. Gani wala gihapon masabat ang akon mga pamangkot tuhoy sa katuyuan sang kabuhi.

Nakita Ko ang mga Sabat sa Biblia

Wala ginapaabot nga nagbag-o ang akon kabuhi sang 1993. Natapos ko na ang akon pagtuon kag pagpanalawsaw kag nagasulat ako sing tesis sa pagkadoktor sa quantum physics. Agod matapos ko ini sa gintalana nga petsa, halos adlaw kag gab-i ko ini nga ginpangabudlayan, apang napatumbayaan ko naman ang iban pa nga mga butang. Isa ka hapon, may nagpanuktok sa ganhaan. Sang ginbuksan ko ini, nakita ko ang duha ka babayi.

“Nahibaluan mo bala nga ang tuig 1914 isa ka pinasahi gid nga tuig suno sa Biblia?” pamangkot nila. Nakibot gid ako sa pamangkot. Wala pa gid ako makabati tuhoy sini; kag wala man ako sing tion agod tun-an ini. Walay sapayan, nangin interesado ako sa pamangkot. Paano sila makasiling  nga madugay na nga ginatudlo sang Biblia ang 1914 subong isa ka pinasahi nga tuig?

“Luyag mo bala makahibalo sing dugang pa?” pamangkot pa gid nila. ‘Pat-od gid,’ hunahuna ko, ‘kon pamatian ko ang ila isiling, makakita ako sing mga indi paghilisantuanay sa ila mga argumento.’ Sa baylo sang indi paghilisantuanay, nakita ko ang makapakumbinsi nga prueba tuhoy sa pagkamasaligan sang Biblia. Natun-an ko nga maathag nga ginapakita sang tagna sang Biblia nga ang Mesianikong Ginharian sang Dios​—⁠ang langitnon nga ginharian nga magagahom sa ulihi sa bug-os nga duta​—⁠gintukod sang 1914.⁠ *

Mga Saksi ni Jehova ang mga babayi, kag ginhatagan nila ako sing isa ka kopya sang libro nga Mahimu Ka Mabuhi sing Dayon sa Paraiso sa Duta.⁠ * Ginbasa ko ini sa sulod sang pila ka adlaw kag nakita ko nga ang tanan maathag kag rasonable. Ginpakita sa akon sang mga Saksi gikan sa Biblia nga kabubut-on ni Jehova nga magkabuhi sing dayon ang tawo sa isa ka paraiso sa duta. Suno sa tagna sang Biblia, ini nga saad malapit na matuman. Daw ano gid ka makalilipay nga paglaum para sa palaabuton! Natandog gid ako kag nakahibi sa sini nga paglaum. Amo na ayhan ini ang ginapangita ko sa sulod sang 20 ka tuig?

Nakita ko gilayon ang akon katuyuan sa kabuhi: ang makilala si Jehova nga Dios kag ang alagaron sia sing bug-os tagipusuon. Nagpadayon ako sa pagtuon sa Biblia upod sa mga Saksi ni Jehova, kay nakita ko ang akon ginatun-an amo ang kamatuoran. Daw indi mabulong ang akon kauhaw para sa espirituwal nga mga butang. Samtang ginatapos ko ang akon tesis sa pagkadoktor sa pisika, nabasa ko ang katunga sang Biblia sa sulod sang tatlo ka bulan.

Indi Lamang mga Sabat ang Nakita

Sang Mayo 1993, nagtambong ako sa mga miting sa lokal nga kongregasyon sang mga Saksi ni Jehova sa Kingdom Hall sa Augsburg sa nahauna nga tion. Ang mga panudlo nga nabatian ko kamatuoran. Dugang pa, wala ako nasaw-ahan nga makig-upod sa mga Saksi. Mainit nila ako nga gin-abiabi, bisan pa nga estranghero ako. Isa ka tigulang nga babayi ang nagtupad sa akon kag nagkuha sing songbook para sa akon. Sang masunod nga mga semana, ginpasakay ako sang mag-amay nga Saksi sa ila salakyan pakadto sa Kingdom Hall. Wala magdugay, gin-agda ako sining akon bag-o nga mga abyan sa ila puluy-an. Nabatyagan ko sang ulihi ang handum nga ipaambit sa iban ang akon natun-an tuhoy sa katuyuan sang kabuhi.

Napahulag na ako sa paghimo sing mga pagbag-o sa akon kabuhi bangod sang natun-an ko sa Biblia. Halimbawa, indi ko na luyag taguon ang mga butang nga may kaangtanan sa okultismo. Gani ginhaboy ko ang akon mga horoskopyo kag subong man ang kilingkiling para sa pagpamalandong kag ang iban pa nga relihioso nga mga handumanan halin sa India. Nag-uswag ako sa akon pagtuon sa Biblia, kag gindedikar ko ang akon kaugalingon kay Jehova nga Dios, kag nagpatugmaw subong isa sang mga Saksi ni Jehova sa Munich sang Hunyo 1994. Sa paghimo sini ginbaton ko sing tinagipusuon ang matuod nga katuyuan sang kabuhi.

Sang Septiembre 1995, nangin regular payunir ako, ukon bug-os tion nga ministro sang mga Saksi ni Jehova. Nagkahulugan ini sang paghinguyang sing mas madamo nga oras sa pagpakighambal sa mga tawo tuhoy sa mga katuyuan sang Dios. Agod mahimo ini nagsandig ako sa kusog nga ginahatag ni Jehova. Madamo nga beses nga sa pagpauli ko sa gab-i pagkatapos sang pila ka oras sa ministeryo, nabatyagan ko ang kalipay kag pagkakontento nga wala ko pa gid anay mabatyagan antes ko makilala si Jehova. Sang Enero 1997, gin-agda ako nga padayunon ang akon bug-os tion nga pag-alagad sa sanga talatapan sang mga Saksi  ni Jehova sa Alemanya sa Selters, nga ginatawag Bethel, diin ako karon nagapuyo. Pila ka beses na nga ginduaw ako sang akon mga ginikanan, kag walay sapayan nga indi kami pareho sing pagtuluuhan, ginatahod nila ang Bethel kag nalipay sila nga yari ako diri.

Ang Siensia kag ang Biblia

Mahimo matingala ang iban kon paano ang isa ka tawo nga tinuig nga nagtuon sing siensia makapati sa ginasiling sang Biblia. Ti, nakita ko nga ang siensia kag ang Biblia wala nagasumpakilay. Subong isa ka pisiko, gintun-an ko ang mga kasuguan nga nagagiya sa kabuhi, kag ini nga mga kasuguan nagapamatuod nga gindesinyo ini sang isa ka labaw sa tawo nga intelihente nga Persona.

Halimbawa, may madamo nga teoriya sa pisika, kemistri, kag biolohiya. Kag walay sapayan nga ang mga teoriya mahimo nga simple lamang, ang mga matematika nga naangot sa sini mahimo nga masibod gid. Ang maalam nga mga sientipiko nagapanugda sing mga teoriya kag ginapadyaan sila sing Nobel nga Premyo tungod sa ila panikasog. Daw ano pa ayhan kaalam ang intelihente nga Persona nga nagdesinyo kag nagtuga sang uniberso, nga ginapanikasugan gid sang mga sientipiko nga mahangpan!

Indi gid makatarunganon ang magsiling, subong sang ginahimo sang madamo nga ebolusyonista, nga ang kabuhi nagluntad sing natabuan lamang. Sa pag-ilustrar: Ikubay ang napulo ka bola sang soccer sa duog-halampangan, ang tagsa ka bola may antad nga isa ka metro. Paagi sa pagsipa sa una nga bola, tinguhai nga maigo sang kada isa ang masunod nga bola, agod ang tanan nga napulo nga bola maigo. Tinguhai man nga pakton kon ano ang mangin posisyon sang tagsa ka bola. Para sa kalabanan nga tawo, imposible ini pakton.

Bangod sini, paano makasiling ang isa nga ang pagporma sang selula sang tawo​—⁠nga nagadalahig sang mga proseso nga mas masibod pa sangsa pagsipa sa mga bola sang soccer​—⁠natabuan lamang? Ang labing makatarunganon nga paathag amo nga isa ka labaw gid nga intelihente nga Persona ang nagtuga sa mga tawo kag sa tanan nga iban pa nga mga tinuga sa duta. Himuon bala sini nga Persona, nga amo ang Manunuga, ini nga butang nga wala sing katuyuan? Indi gid. May yara sia katuyuan, kag ina nga katuyuan ginasugid kag ginapaathag sa Biblia.

Subong sang imo na nakita, ginbuligan ako sang siensia kag sang Biblia nga masabat ang madugay ko na nga mga pamangkot tuhoy sa kabuhi. Mahanduraw mo bala ang daku nga kaumpawan kag kalipay nga mabatyagan mo kon makita mo ang isa ka butang nga ginpangita mo sa sulod sang 20 ka tuig? Handum ko gid nga buligan ang madamo nga makita ang akon nakita​—⁠indi lamang ang mga sabat sa akon mga pamangkot kundi, sing mas importante pa, ang nagakaigo nga paagi sa pagsimba sa lamang matuod nga Dios, si Jehova!

[Mga nota]

^ par. 18 Para sa detalyado nga pagbinagbinag, tan-awa ang kapitulo 10, “Ang Ginharian Sang Dios Nagagahom,” sa libro nga Ang Ihibalo nga Nagadul-ong sa Kabuhi nga Walay Katapusan, nga ginbalhag sang mga Saksi ni Jehova, pahina 90-7.

^ par. 19 Ginbalhag sang mga Saksi ni Jehova. Wala na karon ginaimprinta.

[Blurb sa pahina 14]

Subong isa ka pisiko, gintun-an ko ang mga kasuguan tuhoy sa kabuhi, kag ining mga kasuguan nagapamatuod nga gindesinyo ini sang labaw sa tawo nga intelihente nga Persona

[Retrato sa pahina 12]

Sang 12 anyos ako

[Retrato sa pahina 13]

Sa pagpangita ko sing katuyuan sang kabuhi, nagdangop ako sa ‘Oriental meditation’

[Retrato sa pahina 15]

Ang pagbantala sa iban nagahatag sa akon sing matuod nga kalipay kag pagkakontento

[Credit Line]

Cover of book: J. Hester and P. Scowen (AZ State Univ.), NASA