Magdiretso sa kaundan

Magdiretso sa listahan sang kaundan

Nasapwan Namon ang Butang nga Mas Maayo pa

Nasapwan Namon ang Butang nga Mas Maayo pa

 Nasapwan Namon ang Butang nga Mas Maayo pa

PANUGIRON NI FRANCIS DEL ROSARIO DE PÁEZ

Sang 1988, kami sang akon mga magulang nga lalaki, upod ang iban nga mga banda, nagtokar sa atubangan sang linibo ka tumalan-aw sa Madison Square Garden sa New York City. Ang amon grupo, nga nagpakita sang akon pagsaot, amo ang ginpalakpakan gid. Ini nga kadalag-an utang namon kay Tatay.

BILANG isa ka musikero, natalupangdan sang akon amay nga ang akon pito ka magulang nga lalaki may talento sa musika. Gani ginbaligya niya ang amon balay kag nagbakal sang mga instrumento sa musika kag sing mga kagamitan nga kinahanglanon agod makaporma sila sing isa ka banda. Bata pa ako sadto, kay sang 1966 lang ako natawo. Ang amon pamilya nagapuyo sadto sa banwa sang Higüey sa Dominican Republic.

Sang 1978, una nga nagpagua ang akon mga magulang sa tilipunan sang banwa sang Higüey. Sang ulihi didto na sila nagatokar sa Santo Domingo nga kapital sang Dominican Republic. Nagsugod sila sa pagtokar kag pagkanta sing bag-o nga estilo sang merengue kag, subong resulta, nagbantog sila. * Nakilal-an ang grupo subong Los Hermanos Rosario (Ang Mag-ululutod nga Rosario).

Sanglit madugay ko na nga handum nga mangin bantog nga mananaot, luyag ko mag-entra sa akon mga magulang nga lalaki. Sa isa ka party ang akon magulang nga si Pepe, nga amo ang lider sang grupo, nag-agda sa akon nga magsaot, nga nagasiling: “Si Francis isa sa mga manghod ko nga babayi, ang kinagot, kag kabalo sia magsaot.” Nanamian gid ang mga tumalan-aw sa akon pagsaot. Gani, ginsilingan ko si Pepe nga luyag ko magsaot upod sa grupo. Amo kon ngaa sa edad nga 16 pirme na ako nagasaot kada magtokar ang Los Hermanos Rosario.

Propesyonal nga Kadalag-an

Antes sini, may mga babayi na nga bokalista sa mga grupo sang merengue apang wala pa gid sing babayi nga nagasaot sa atubangan sang grupo nga nagatokar. Ako ang naghimo sang nanuhaytuhay nga estilo sang saot, nga ginabagay ining bag-o nga saot sa sonata sang merengue. Sang nangin sikat na ang akon estilo sang panaot, gintawag ini nga a lo Francis Rosario.

May kanta kami sang merengue nga gintawag “Cumandé,” nga ang isa ka bahin sang liriko nagasiling: “Y ahora todo el mundo como Francis Rosario” (Kag karon ang tanan nagasaot kaangay ni Francis Rosario). Ginailog sang mga tawo ang akon panaot. Kon kaisa nagalumpagi na lang sila sa salog kag magtan-aw sa akon sa baylo nga magsaot. Sang ulihi, ang retrato ko lamang ang ginagamit agod ipasayod ang pagtokar sang amon grupo. Ang tanan nga makakita sang akon retrato nakahibalo nga buot silingon sini may konsierto ang Los Hermanos Rosario.

Sang nagaupod na ako sa akon mga magulang, gindugangan sing mga musikero ang amon grupo, lakip ang tatlo ka mag-ululutod nga lalaki nga Páez ang apelyido. Ang isa sa ila, ang nagatokar sing trumpeta nga si Roberto, napamana ko sang ulihi. Wala magdugay, lakip na sa kadalag-an sang grupo ang mag-ululutod nga Páez. Nag-inasud-asod  ang mga imbitasyon sa Los Hermanos Rosario nga maggua sa telebisyon sa Santo Domingo, kag magkonsierto man sa iban nga mga pungsod.

Sang 1988 nagkonsierto kami sa lainlain nga mga duog sang Estados Unidos kag Canada. Ang isa sini amo ang ginhinambitan kaina sa Madison Square Garden. Madamo sang labing bantog nga mga grupo sang merengue ang nakigbahin didto, apang ang amon grupo ang labi gid nga ginpalakpakan. Halin sadto nga konsierto, kami na pirme ang pangkatapusan nga bahin sang konsierto. Labi pa nga nagbantog ang akon pagsaot kag nagdamo pa ang mga fans sang Los Hermanos Rosario. Nagdahog man ang amon mga rekording.

Nakalab-ot kami kon diindiin, sa Alemanya, Colombia, Curaçao, Ecuador, Espanya, Panama, Puerto Rico, kag sa iban pa nga mga pungsod. Sang ulihi nangin isa kami sa ginahangad gid nga grupo sa Latin America. Ang saot, ang entablado, ang mga kostyum, kag ang mek-ap nangin pinakaimportante nga butang sa akon kabuhi.

Sang dalaga pa lang ako, pirme ko ginasiling nga kon may mangaluyag sa akon apang wala sia sing hilig sa pagsaot, pasulabihon ko pa nga indi ako makapamana sangsa untatan ko ang akon pagsaot. Apang, ang akon panimuot tuhoy sa akon mga prioridad sa kabuhi magabag-o.

Pagkamaradmad sa Espirituwal

Ini nga pagbag-o nagsugod sang nagkonsierto kami sa Canary Islands sang 1991. Bag-o lang kami makasal ni Roberto. Ang iya magulang nga si Freddy, nga miembro man sang grupo, nagsugod sa pagtuon sa Biblia upod sa mga Saksi ni Jehova kag pirme niya ginadaladala ang ila mga publikasyon.

Isa ka adlaw nakita ko ang libro nga Mahimo Ka Mabuhi Sing Dayon sa Paraiso sa Duta sa kuarto ni Freddy, kag ginbasabasa ko ini. Nakuha ang akon igtalupangod sang kapitulo nga “Ano nga Sahi Sang Duog ang Impierno?” Nangin interesado ako sa sini bangod nagsiling si Nanay nga ang tawo nga nagahimo sing malain nga mga butang pagasunugon sa impierno. Gani nahadlok ako nga magpaimpierno.

Mga pila ka semana sang ulihi, samtang yara pa kami sa Canary Islands, nahulugan ako. Sang gindala nila ako sa ospital, ginlihug ko si Roberto nga hulamon kay Freddy ang libro nga nakita ko sa iya kuarto. Luyag ko basahon ini samtang nagapaayoayo ako. Nagustuhan ko ang libro. Ang isa sa mga butang nga natun-an ko amo nga ang impierno sa Biblia isa lamang ka kabilugan nga lulubngan sang katawhan kag wala gid gintuyo sang Dios nga silutan ang bisan sin-o. (Jeremias 7:31) Ang Biblia gali nagatudlo nga ang mga patay wala sing pangalibutan.—Manugwali 9:5, 10.

Pagpauli namon sa Dominican Republic, ginpakadto ni Freddy ang isa sa mga Saksi ni Jehova agod duawon kami. Ginpaathag niya sa amon ang paglaum sa Biblia nga kabuhi nga walay katapusan sa paraiso nga duta, kag napukaw sini ang interes sang akon bana. (Salmo 37:29; Lucas 23:43) Nangabay kami sing isa ka pagtuon sa Biblia.

Pagbag-o sa mga Prinsipio kag mga Prioridad

Samtang nagauswag ang akon ihibalo sa Biblia, ang akon pagtamod sa trabaho nga ginahigugma ko gid nagbag-o. Ang mga prinsipio sa Biblia nagsugod sa pagdihon sa akon hunahuna. (Roma 12:2) Ginpamangkot ko ang akon kaugalingon:  ‘Dapat bala ako magsaot sa atubangan sini nga mga tawo? Indi amo sini ang luyag ko.’ Nangamuyo ako sa Dios, “Buligi ako palihug nga makahalin sa sini nga kahimtangan.” Ginsugid ko sa akon bana ang akon ginabatyag, kag amo man gali ang iya ginabatyag. “Hulathulat ka lang, Pangga,” siling niya. “Ikaw una ang mahalin sa grupo, kag magasunod ako.”

Nagbusong ako liwat, kag bangod indi na ako tanto makasaot, mas masunson ako nga nakatambong sa Cristianong mga miting sa Kingdom Hall. Nagpabakod ini sa akon, kag kay Roberto nga nagatambong man, amo kon ngaa naapresyar namon ang daku nga balor sang pagtipon sing tingob upod sa katawhan ni Jehova. Nahangpan namon nga agod padayon nga mag-uswag sa dalanon sang kamatuoran sang Biblia, kinahanglan namon ang instruksion kag pagpalig-on nga ginaaman sang Cristianong mga miting. (Hebreo 10:24, 25) Bisan pa nagakonsierto kami sa gua sang Dominican Republic, ginapangita namon ni Roberto ang Kingdom Hall kag nagatambong sa mga miting.

Sang makabata na ako, nagsaot ako liwat, apang daw wala na ako sing gana. Nasat-uman gid ini, kag ginmulay ako sang press. Pirme ako ginapamangkot, “Ngaa daw naglain na ang pagsaot mo?” Nangamuyo ako kay Jehova nga buligan ako nga makahalin sa sini nga kahimtangan agod nga indi kami maggamo sang akon mga magulang nga lalaki. Kasosyo ako sang grupo, kag indi ko luyag nga mag-away kami.

Sang nagbusong ako liwat, ginsilingan ko si Rafa, nga amo ang nagdumala sa grupo sang mapatay ang akon magulang nga si Pepe, nga luyag ko maghinguyang sing kapin nga tion sa akon kabataan kag indi na ako magsaot. Ginsilingan niya ako nga himuon ko kon ano ang sa banta ko nga maayo. Mapinasalamaton gid ako, bangod ang akon mga magulang nga lalaki wala nagpamatok sa akon pagtuon sing Biblia.

Isa Ka Bag-o nga Kabuhi nga Nagaalagad kay Jehova

Sang 1993, pagkatapos sang napulo ka tuig upod sa grupo, nag-untat ako sa pagsaot kag gindedikar ko ang akon kaugalingon sing bug-os kay Jehova. Nangin manugbantala ako sang maayong balita sang Ginharian sang Dios kag sang nakahalin si Roberto sa grupo, nabawtismuhan kami sang 1994. (Mateo 24:14) Ang mga magulang ni Roberto nga sanday Freddy kag Julio nangin mga Saksi, kag si Manuel Pérez man, ang isa pa ka miembro sang grupo. Tubtob karon nagaalagad gihapon sila sing matutom kay Jehova.

Indi mahangpan sang madamo kon ngaa nag-untat ako sa pagsaot, bangod hilig ko gid ini. Abi sang iban, pareho sang ginsiling sang isa ka kilala nga prodyuser sa telebisyon sa amon pungsod, agi lang ini. “Subong sang natabo sa iban nga mga artista, makamaradmad ina sia sa ulihi kag mabalik sa grupo,” siling niya. Apang wala gid ina matabo. Determinado gid ako nga ihugod ang akon kaugalingon sing bug-os tubtob posible sa pag-alagad kay Jehova.

Sa karon may tatlo na kami ka kabataan: si Katty, si Roberto, kag si Obed. Ginatudluan gid namon sila nga ang pinakaimportante nga butang sa kabuhi amo ang espirituwal kag indi ang materyal nga mga butang. Bangod sang amon naeksperiensiahan mapaandaman gid namon sila sang makapatalang nga impluwensia sang kalibutan kag mahatag sa ila ang maayo nga panuytoy sa kabuhi. Ang semanal nga pagtuon sa Biblia sang amon pamilya tuman gid ka mapuslanon, kay nagbulig ini sa amon nga magpabilin nga nahiusa sa tunga sang kalibutan nga ang mga pamilya nabahinbahin.

Gintudluan gid namon ang amon kabataan nga tamdon si Jehova subong matuod nga persona nga ila masaligan. (Hulubaton 3:5, 6; Hebreo 11:27) Ginpahangop man namon sa ila ang importansia sang pagtambong kag pagpakigbahin sa Cristianong mga miting. Ang pagdaku sang amon kabataan sa dalanon sang kamatuoran sang Biblia isa gid ka bilidhon nga regalo. Duha ka tuig na nga naga-auxiliary payunir ako, nga amo ang pagtawag sang mga Saksi ni Jehova sa mga nagahinguyang sing 50 ka oras ukon kapin pa kada bulan sa pagpaambit sa iban sang ila pasad sa Biblia nga pagtuluuhan. Kag ang akon bana naman, tinuig na nga nagaalagad subong isa ka gulang sa Cristianong kongregasyon.

Nanamian gihapon ako sa saot nga merengue. Apang makapasubo nga lain na gid ang madamo sang sikat nga mga merengue karon. Sa kabug-usan, maayo gid ini anay. Sa karon, agod makakita kita sing maayo nga musika nga masautan sing merengue, dapat gid kita mangin mapilion.

 Ang Pagkasuperyor sang Pag-alagad kay Jehova

Madamo sing ginatanyag ang kalibutan, apang dapat anay binagbinagon sang isa kon ano gid ini. Matuod ini sa industriya sang musika, nga sa una nga pagtan-aw daw maayo gid kag indi makahalalit. Apang indi gali. Madamo sang nagatrabaho sa industriya ang nagadroga kag imoral. Kon miembro ka sang isa ka palaguaon, makaupod mo ang mga tawo nga nagapatuyang kag wala gid sing konsiensia.—1 Corinto 15:33.

Narealisar namon nga ang pinakamaayo nga mahimo sang isa ka tawo amo ang pag-alagad kay Jehova. Nadumduman ko pa sang nagpauli ako nga masinulub-on gid sa hotel pagkatapos sang amon pinakadaku nga konsierto. Nahibal-an ko na karon nga bangod gali wala namon sadto mapaayawan ang amon pinakaimportante nga kinahanglanon, ang amon espirituwalidad.—Mateo 5:3.

Ang sentro sa amon kabuhi karon amo ang pagpahamuot sa Manunuga, ilabi na gid paagi sa pagbantala kag pagpanudlo sing maayong balita sang Iya Ginharian. (Mateo 24:14; Binuhatan 20:35) Malipayon kag naayawan gid ang amon pamilya kon ginahimo namon ini. Nagapasalamat gid kami nga nalakip kami sa katawhan sang Dios kag may tunay nga mga abyan—mga kauturan nga lalaki kag babayi sa pagtuo—nga kaangay namon nagalaum man sa makalilipay nga kabuhi nga walay katapusan sa bag-ong kalibutan sang Dios.—Marcos 10:29, 30; 2 Pedro 3:13; Bugna 21:3, 4.

Nagmanggaranon gid kami sa kalibutan sang kalingawan. Apang sang nakilala namon ang aton Dios, nga si Jehova, nasapwan namon ang espirituwal nga kamanggaran nga labi pa sa bisan ano nga materyal nga manggad. Malipayon gid kami nga nagaalagad kami sa isa ka Dios nga may katuyuan, isa ka malipayon nga Dios nga nagaagda sa aton nga magsalig sa iya! (Salmo 37:3) Kumbinsido gid kami nga nasapwan namon ang isa ka butang nga mas maayo pa sa kadungganan kag materyal nga kamanggaran, kag nagapangamuyo kami nga si Jehova magabulig sa amon nga mag-asawa kag sa amon pamilya nga himuon ang iya kabubut-on sing dayon.

[Nota]

^ par. 5 Ang merengue amo ang salautan nga musika nga may tempo nga 2/4. Sa tradisyunal nga porma sini, ang isa ka gamay nga banda nagatokar sing merengue nga ginagamit ang accordion, guiro (isa ka metal nga ginakuskos), kag tambora (duha ka gamay nga tambor). Sa pagligad sang tion, naporma ang mas dalagku nga grupo (nga gintawag man nga orquestas sa Dominican Republic). Sa karon, madamo nga grupo sang merengue ang nagagamit sing piano, mga saxophone, mga trumpeta, kag mga tambor nga conga, lakip ang iban pa nga mga instrumento.

[Retrato sa pahina 21]

Upod sa iban nga mga miembro sang grupo sang nagaumpisa pa lang ang akon karera

[Retrato sa pahina 21]

Pagkonsierto sa New York City, sang mga 1990

[Retrato sa pahina 23]

Sa atubangan sang Kingdom Hall

[Retrato sa pahina 23]

Ginsal-ot: Sa tion sang isa ka pagtuon sa Biblia sang pamilya