Magdiretso sa kaundan

Magdiretso sa listahan sang kaundan

Dapat Ka Bala Mangamuyo kay Birhen Maria?

Dapat Ka Bala Mangamuyo kay Birhen Maria?

 Ang Pagtamod sang Biblia

Dapat Ka Bala Mangamuyo kay Birhen Maria?

SI Maria kilala gid sang kalabanan nga mga tawo nga kabisado ang Cristianismo. Nagasugid ang Kasulatan nga ang Labing Gamhanan nga Dios nagpakamaayo gid sini nga babayi paagi sa pagpili sa iya nga mangin iloy ni Jesus. Pinasahi gid ang pagkabun-ag ni Jesus bangod birhen si Maria sang ginbusong niya si Jesus. Madugay na ginapadunggan sang pila ka simbahan sang Cristiandad si Maria sa isa ka pinasahi nga paagi. Sang 431 C.E., ang Konsilyo sang Efeso nagtawag sa iya nga “Iloy sang Dios,” kag ginatudluan ang madamo nga tawo karon nga mangamuyo sa iya. *

Ang sinsero nga mga sumilimba nakahibalo nga dapat nila ipatuhoy ang ila mga pangamuyo sa husto nga persona. Ano ang ginatudlo sang Biblia bahin sini? Dapat bala mangamuyo ang mga Cristiano kay Birhen Maria?

“Tudlui Kami Kon Paano Mangamuyo”

Suno sa rekord sang Ebanghelyo ni Lucas, ang isa sa mga disipulo ni Jesus nagpangabay sa iya: “Ginuo, tudlui kami kon paano mangamuyo.” Bilang sabat, si Jesus nagsugod: “Kon magpangamuyo kamo, magsiling, ‘Amay, pakabalaanon ang imo ngalan.’ ” Sa iya Sermon sa Bukid, gintudluan man ni Jesus ang iya mga sumulunod nga mangamuyo: “Amay namon nga yara sa mga langit, pakabalaanon ang imo ngalan.”—Lucas 11:1, 2; Mateo 6:9.

Gani, ang una nga butang nga aton matun-an amo nga ang pangamuyo ukon mga pulong sang pagsimba, dapat ipatuhoy lamang sa Amay ni Jesus, nga si Jehova. Wala gid ginapahanugutan sang Biblia nga mangamuyo kita sa iban. Nagakaigo ini kay, subong sang ginsiling kay Moises sang nabaton niya  ang Napulo ka Sugo, si Jehova “isa ka Dios nga nagapatuman sing eksklusibo nga debosyon.”—Exodo 20:5.

Ano Naman ang Tuhoy sa Pagrosario?

Gintudluan ang madamo nga nagapangamuyo kay Maria nga ang mga pagpakamaayo matigayon paagi sa pagsulitsulit sang pila ka espesipiko nga mga pangadi—mga pangadi subong sang Maghimaya ka Maria, Amay Namon, kag iban pa. Para sa mga Katoliko, “ang pagrosario amo ang pinakalapnag nga porma sang debosyon kay Maria,” siling sang libro nga Symbols of Catholicism. Ang pagrosario isa ka relihioso nga buhat bilang pagpadungog kay Birhen Maria. Nagapatuhoy man ang rosarito sa gintuhog nga mga uyas nga ginagamit agod isipon ang pangadi. “Lima ka tignapulo nga mga uyas, nga may bal-ot nga isa ka uyas sa kada tignapulo,” paathag sang amo nga libro, “ang ginagamit agod ipangadi ang kalim-an ka ‘Maghimaya ka Maria’, lima ka ‘Amay Namon’, kag lima ka ‘Himaya sa Amay.’ ” Ginapamatian bala sang Dios ang sinsero nga pagrosario?

Liwat, ang instruksion ni Jesus sa iya mga disipulo nagahatag sa aton sing masaligan nga sabat. “Kon ikaw mangamuyo, indi pagsulitsulita ang amo gihapon nga butang, subong sang ginahimo sang katawhan sang mga pungsod,” siling niya, “kay nagahunahuna sila nga pamatian sila tungod sa paggamit nila sing madamong tinaga.” (Mateo 6:7) Gani, espesipiko nga ginsilingan ni Jesus ang iya mga sumulunod nga indi pagsulitsuliton ang espesipiko nga mga pangadi sa ila mga pangamuyo.

‘Apang, indi bala gintudluan ni Jesus ang iya mga disipulo nga ipangamuyo ang Amay Namon, nga nalakip sa pagrosario?’ mahimo ipamangkot sang isa. Nagtudlo gid man si Jesus sing modelo nga pangamuyo, nga amo ang Amay Namon ukon ang Pangamuyo sang Ginuo. Pero, dapat naton talupangdon nga gintudlo niya ini pagkatapos gid nga ginhatag niya ang paandam nga ginsambit kaina batok sa ‘pagsulitsulit sang amo gihapon nga butang.’ Ang pamatuod nga indi tuyo ni Jesus nga sauluhon ang modelo nga pangamuyo makita sang naggamit sia sing magkatuhay nga mga tinaga sa duha ka narekord nga higayon nga gintudluan niya ang iya mga disipulo sa pagpangamuyo. (Mateo 6:9-15; Lucas 11:2-4) Ang mga ideya nga ginpabutyag ni Jesus sadtong mga okasyon pareho lang, apang indi pareho ang mga tinaga. Gani, makahinakop kita nga nagahatag lamang si Jesus sing modelo ukon ehemplo kon paano mangamuyo kag kon ano ang nagakadapat nga ipangamuyo sang iya mga sumulunod. Labaw sa tanan, ang iya mga pinamulong nagapakita kon sin-o ang dapat pangamuyuan.

Pagtahod kay Maria

Ang katunayan nga ang Kasulatan wala nagatudlo sa mga Cristiano nga mangamuyo kay Maria, wala nagapakita nga wala ginatahod ang iya papel sa katumanan sang mga katuyuan sang Dios. Ang mga pagpakamaayo nga matigayon paagi sa iya Anak mangin dayon nga benepisyo sang tanan nga matinumanon nga katawhan. “Ang tanan nga kaliwatan magapahayag sa akon nga malipayon,” siling mismo ni Maria. Kag ang iya pakaisa nga si Elisabet nagsiling nga si Maria “malipayon . . . sa tunga sang mga babayi.” Kag amo gid. Tumalagsahon gid nga pribilehiyo para kay Maria nga mapilian nga magbun-ag sa Mesias.—Lucas 1:42, 48, 49.

Apang, indi lamang si Maria ang babayi nga ginatawag sang Kasulatan nga malipayon. Bangod sang ginhimo ni Jael para sa kaayuhan sang dumaan nga pungsod sang Israel, sia man ginsiling nga nangin “labing malipayon sa mga babayi.” (Hukom 5:24) Ang matutom nga si Jael, si Maria, kag madamong iban pa nga diosnon nga mga babayi nga ginsambit sa Biblia takus gid sa pagkamatuod nga aton ilugon—apang indi nga aton simbahon.

Si Maria isa ka matutom nga sumulunod ni Jesus. Yara sia sa nanuhaytuhay nga mga okasyon sa tion sang iya dutan-on nga ministeryo kag sa iya kamatayon man. Pagkatapos nabanhaw si Jesus sia “padayon nga nagapangamuyo” upod sa mga kauturan ni Jesus. Nagahatag ini sa aton sing rason sa pagpati nga upod sa ila sia man ginhaplasan sing balaan nga espiritu sang Pentecostes 33 C.E. kag busa may paglaum nga mangin bahin sang nobya nga klase nga magagahom sa langit upod kay Cristo.—Mateo 19:28; Binuhatan 1:14; 2:1-4; Bugna 21:2, 9.

Apang, wala gid ini nagaawtorisar sa aton nga mangamuyo kay Maria. Ang tinagipusuon nga pangamuyo importante nga bahin sang pagsimba, kag ginapalig-on ang mga Cristiano nga “magpadayon sa pagpangamuyo.” (Roma 12:12) Apang, ini tanan nga pangamuyo dapat lamang ipatuhoy kay Jehova, paagi kay Jesucristo.—Mateo 4:10; 1 Timoteo 2:5.

[Nota]

^ par. 3 Ang pagpati nga si Maria iloy sang Dios napasad sa di-Makasulatanhon nga doktrina sang Trinidad, nga nagasiling nga Dios si Jesus.