Ang Pagtamod sang Biblia

Dapat Bala Gamiton ang mga Larawan sa Pagsimba?

KADA Agosto 15, isa ka daku nga relihioso nga selebrasyon ang ginahiwat sa isla sang Tínos sa Gresya. Linibo ang nagatipon agod magsimba kay Maria ang iloy ni Jesus kag sa iya larawan nga ginapatihan nga may milagruso nga mga gahom. * Ang isa ka Griegong Ortodokso nga reperensia nagapaathag: “Upod ang pinasahi nga pagtuo kag pagkadebotado ginapadunggan naton ang Labing Balaan nga Theotokos, ang Iloy sang aton Ginuo, kag ginapangabay naton ang iya pangamlig kag madasig nga pagbulig. Nagadangop kita sa nagamilagro nga mga Santo—Balaan nga mga lalaki kag mga babayi—para sa aton espirituwal kag lawasnon nga mga kinahanglanon . . . Upod ang tudok nga debosyon ginahalukan naton kag ginasimba ang ila balaan nga mga relikya kag sagrado nga mga larawan.”

Madamo sa nagapangangkon nga mga Cristiano ang nalakip sa mga relihion nga nagahimo sing kaanggid nga mga buhat sang pagsimba. Apang ginasakdag bala sang mga panudlo sang Biblia ang paggamit sing mga larawan sa pagsimba?

Ang Una nga mga Cristiano

Binagbinaga ang natabo sang tuig 50 C.E. sang nagduaw si apostol Pablo sa Atenas, isa ka siudad nga nagahatag sing daku nga importansia sa paggamit sing mga imahen sa pagsimba. Ginpaathag ni Pablo sa mga taga-Atenas nga ang Dios “wala nagapuyo sa mga templo nga ginhimo sang kamot, ukon ginaalagad sia sang mga kamot sang tawo subong nga daw may kinahanglan sia nga bisan ano . . . Busa, . . . indi kita dapat maghunahuna nga ang Isa ka Dios kaangay sang bulawan ukon pilak ukon bato, nga tinigib sang arte kag hunahuna sang tawo.”—Binuhatan 17:24, 25, 29.

 Sa pagkamatuod, ining mga paandam may kaangtanan sa paggamit sing mga idolo masami makit-an sa Cristianong Griegong Kasulatan, nga ginatawag man nga Bag-ong Testamento. Halimbawa, ginlaygayan ni apostol Juan ang mga Cristiano: “Magbantay kamo sa mga diosdios.” (1 Juan 5:21) Nagsulat si Pablo sa mga taga-­Corinto: “Ano bala ang pagsinanto sang templo sang Dios sa mga idolo?” (2 Corinto 6:16) Madamo sang una nga mga Cristiano ang naggamit anay sing relihioso nga mga imahen sa pagsimba. Ginpahanumdom ini ni Pablo sa mga Cristiano sa Tesalonica sang nagsulat sia: “Kamo nagliso sa Dios gikan sa inyo mga idolo agod magpaulipon sa isa ka buhi kag matuod nga Dios.” (1 Tesalonica 1:9) Maathag nga ang pagtamod sang una nga mga Cristiano tuhoy sa mga larawan pareho sa pagtamod nanday Juan kag Pablo.

Pagbaton sang mga “Cristiano” sa Larawan

Ang Encyclopædia Britannica nagsiling nga “sang una nga tatlo ka siglo sang Cristianong Simbahan, . . . wala pa sing Cristianong taliambong, kag sa kabug-usan ginapamatukan gid ini sang simbahan. Halimbawa, ginmulay ni Clement sang Alexandria ang relihioso (pagano) nga taliambong bangod ginpalig-on sini ang mga tawo nga simbahon ang gintuga sa baylo sang Manunuga.”

Paano, nian, nangin popular ang paggamit sing mga larawan? Ang Britannica nagpadayon: “Sang mga tunga-tunga sang ikatlo nga siglo amat-amat nga ginsugdan kag ginbaton ang paggamit sing laragway nga taliambong sa Cristianong Simbahan apang ginpamatukan gid ini sang pila ka kongregasyon. Sadto lamang sang ang Cristianong Simbahan nangin simbahan sang estado sang Roma sa idalom ni Emperador Constantino sang temprano nga bahin sang ikap-at nga siglo nga gingamit ang mga laragway sa mga simbahan, kag nian ini ginbaton nga kinabatasan sa Cristianong Simbahan.”

Isa ka nangin kinabatasan sang mga pagano nga karon nagpangangkon na nga mga Cristiano amo ang pagsimba sa laragway sang emperador. “Sa pagpahisuno sa pagsimba sa emperador,” paathag ni John Taylor sa iya libro nga Icon Painting, “ginsimba sang mga tawo ang iya laragway nga ginpinta sa kambas ukon kahoy, kag ining buhat nagdul-ong sa pagsimba sa mga larawan.” Busa ang paganong pagsimba sa mga laragway ginbuslan sang pagsimba sa mga laragway ni Jesus, ni Maria, sang mga anghel, kag sang “mga santo.” Ining mga laragway nga ginsugdan anay gamit sa mga simbahan amat-amat nga ginbutang sa mga balay sang minilyon ka tawo, kag ginsimba man diri.

Pagsimba sa “Espiritu kag Kamatuoran”

Ginsugiran ni Jesus ang iya mga tagpalamati nga ang mga alagad sang Dios dapat magsimba “sa espiritu kag kamatuoran.” (Juan 4:24) Gani kon luyag hibaluon sang isa ka sinsero nga tawo kon ano ang kamatuoran tuhoy sa paggamit sing mga larawan sa pagsimba, dapat sia magdangop sa Pulong sang Dios para sa kasanagan sa sining topiko.

Halimbawa, ang Biblia nagaunod sang ginsiling ni Jesus: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:6) Si Pablo nagsiling nga “may isa ka Dios, kag isa ka manugpatunga sa Dios kag sa mga tawo, ang tawo nga si Cristo Jesus,” kag nga si “Cristo . . . nagapakiluoy tungod sa aton.” (1 Timoteo 2:5; Roma 8:34) Mas mahangpan naton ini kon basahon naton nga “maluwas sing bug-os [ni Cristo] yadtong mga nagapalapit sa Dios paagi sa iya, bangod pirme sia nagakabuhi agod makitluoy para sa ila.” (Hebreo 7:25) Dapat kita magpalapit sa Dios sa ngalan ni Jesucristo. Wala na sing iban pa nga tawo, kag pat-od nga wala sing walay kabuhi nga larawan ang makatal-us sa iya. Ining ihibalo gikan sa Pulong sang Dios makabulig gid sa bisan sin-o nga nagapangita sing kamatuoran nga masapwan ang paagi sa pagsimba “sa Amay sa espiritu kag kamatuoran” kag maeksperiensiahan ang mga pagpakamaayo sining superyor nga paagi sang pagsimba. Sa pagkamatuod, subong sang ginsiling ni Jesus, “amo sini ang ginapangita sang Amay nga magsimba sa iya.”—Juan 4:23.

[Nota]

[Picture Credit Line sa pahina 24]

Boris Subacic/AFP/Getty Images