Magdiretso sa kaundan

Magdiretso sa listahan sang kaundan

“Walay Pulos” nga DNA?

“Walay Pulos” nga DNA?

 “Walay Pulos” nga DNA?

GINATAMOD sang madamo nga manugpanalawsaw ang pagtuon sa biolohiya, genetics, kag may kaangtanan nga mga patag suno sa pagtamod sang teoriya sang ebolusyon. Sa masami, ini nga pagtamod nagadul-ong sa ila sa sayop nga mga pagpati. Halimbawa, ginklase sang una nga mga sumalakdag ni Darwin ang pila ka organo, kaangay sang appendix, pituitary gland, kag mga tonsil, subong wala na sing pulos nga mga organo. Ginkabig nila ini nga mga salin sang proseso sang ebolusyon. Apang, ang kapuslanan sini nga mga organo natukiban sang ulihi. Busa, dapat isikway sang mga ebolusyonista ang ila una nga mga pagtamod.

Amo man ang natabo sining karon lang sa patag sang genetics. Ginpahangop anay sang nauna nga panalawsaw nga mga 98 porsiento sang DNA sa mga tawo kag sa iban nga mga organo ang wala sing kapuslanan. Busa, madamo sang naimpluwensiahan sang teoriya sang ebolusyon ang naghaumhaum nga ining DNA “walay pulos nga genetiko nga impormasyon nga salin sa proseso sang ebolusyon”​​—⁠isa ka pagtamod nga gilayon ginbaton.

Apang, sa liwat, napamatud-an nga sayop ang haumhaum nga napasad sa Darwinismo. Sining karon lang, natukiban sang mga sientipiko nga ang “junk” ukon walay pulos nga DNA importante gid sa lawas kay nagapatubas ini sang pinasahi nga mga porma sang RNA (ribonucleic acid) nga kinahanglanon sa kabuhi. Para kay John S. Mattick, direktor sang Institute for Molecular Bioscience sa Universidad sang Queensland sa Australia, ang padasudaso nga pagbaton sa teoriya tuhoy sa “junk” ukon walay pulos nga DNA “isa ka tipiko nga halimbawa kon paano naimpluwensiahan sang batasan sa pagpati sa isa ka establisado nga opinyon ang pag-usisa pasad sa mga katunayan, sa sini nga halimbawa sa sulod sang 25 ka tuig.” Ini nga kapaslawan, siling pa niya, “nagakaigo nga dumdumon subong isa sang pinakadaku nga sayop sa maragtas sang biolohiya sa molekula.”

Indi bala mas maalamon nga tamdon ang DNA subong nga may isa ka intelihente nga Desinyador? Narealisar sang mga tawo nga nagapati sa isa ka intelihente nga Desinyador nga sa ulihi ang mga kabangdanan sang makalilibog nga mga aspekto sang pagpanuga sang Dios masami nga nagaathag. Kag sa baylo nga magluya ang ila buot, labi pa sila nga nahalawhaw sa sini nga mga tukib.​​—⁠Hulubaton 1:⁠7; Manugwali 3:11.

[Picture Credit Lines sa pahina 21]

DNA: Photo: www.comstock.com; researcher: Agricultural Research Service, USDA