Magdiretso sa kaundan

Magdiretso sa listahan sang kaundan

Paghatag sa Kabataan sing Pagtalupangod nga Kinahanglan Nila

Paghatag sa Kabataan sing Pagtalupangod nga Kinahanglan Nila

 Ang Pagtamod sang Biblia

Paghatag sa Kabataan sing Pagtalupangod nga Kinahanglan Nila

MAY tion bala ang Anak sang Dios para sa mga kabataan? Abi sang iban nga disipulo wala. Isa ka bes ginpunggan nila ang mga bata sa pagpalapit kay Jesus. Nagsabat sia paagi sa pagsiling: “Pabay-i ninyo ang mga bata nga magpalapit sa akon; indi sila pagpunggi.” Nian mahigugmaon niya nga gin-abiabi kag ginsugilanon ang isa ka grupo sang kabataan. (Marcos 10:13-​16) Gani ginpakita ni Jesus nga handa sia magtalupangod sa kabataan. Paano mailog sang mga ginikanan karon ang iya halimbawa? Paagi sa nagakaigo nga paghanas kag pagpakig-upod sa ila kabataan.

Siempre, ginatinguhaan gid sang responsable nga mga ginikanan ang kaayuhan sang ila kabataan kag ginalikawan ang pagmaltrato sa ila. Masiling pa gani nga “kinaugali” sa mga ginikanan nga magtahod kag magpasunaid sa ila kabataan. Apang nagapaandam ang Biblia nga sa aton adlaw madamo ang wala na sing “kinaugali nga gugma.” (2 Timoteo 3:​1-3) Kag bisan gani ang mga nagapalangga na sa ila kabataan madamo pa gihapon sing dapat tun-an agod mangin maayo pa gid nga ginikanan. Gani ang masunod nga mga prinsipio sa Biblia maayo nga mga pahanumdom sa mga ginikanan nga nagahandum sing labing maayo para sa ila kabataan.

Ang Paghanas nga Wala Nagapaakig

Si Dr. Robert Coles, isa ka kilala nga manunudlo kag manugpanalawsaw nga saykayatris, nagsiling anay: “Sa sulod sang bata may nagatubo nga igbalatyag sa moral. Sa banta ko halin sa Dios ining igbalatyag, nga ang mga kabataan luyag matuytuyan sa moral.” Sin-o ang magabusog sining handum sa moral nga pagtuytoy?

Sa Efeso 6:​4, ang Kasulatan nagalaygay: “Kamo, mga amay, dili ninyo pagpaakiga ang inyo mga anak, kundi padayon sila nga padakua sa disiplina kag sa nagatadlong nga panghunahuna ni Jehova.” Natalupangdan mo bala nga ang teksto partikular nga nagatugyan sa amay sang salabton nga ipatudok sa ila kabataan ang gugma sa Dios kag hanuot nga pagtahod sa Iya mga talaksan? Sa bersikulo 1 sang Efeso kapitulo 6, ginpatuhuyan ni apostol Pablo ang amay kag ang iloy sang ginhambalan niya ang kabataan nga ‘magmatinumanon sa ila mga ginikanan.’⁠ *

Siempre, kon wala ang amay, ang iloy amo ang magaabaga sining responsabilidad. Madamo nga nagasolo nga iloy ang nagmadinalag-on sa pagpadaku sa ila kabataan sa disiplina kag sa nagatadlong nga panghunahuna ni Jehova nga Dios. Apang, kon ang iloy mamana, ang Cristianong bana dapat ang magapanguna. Ang iloy dapat kinabubut-on nga magasunod sa sining pagpanguna sa paghanas kag pagdisiplina sa ila kabataan.

Paano mo madisiplina ukon mahanas ang imo kabataan sa paagi nga indi sila ‘maakig’? Wala sing sekreto nga mga pormula, ilabi na kay tuhay ang kada bata. Apang dapat binagbinagon sing maayo sang mga ginikanan kon bala ang ila pagdisiplina pirme nagapakita sing gugma kag pagtahod sa ila kabataan. Sing makawiwili, ining laygay nga indi pagpaakigon ang inyo kabataan ginsulit sa Kasulatan sa Colosas 3:⁠21. Diri, ginlaygayan liwat ang mga amay: “Dili ninyo pagpaakiga ang inyo mga anak, agod nga indi magluya ang ila buot.”

Ginasing-alan sang iban nga ginikanan ang ila kabataan. Makapaakig gid ini sa ila kabataan. Apang ang Biblia nagpalig-on: “Ang tanan nga madinumtanon  nga kapaitan kag kaakig kag kasingkal kag sininggitanay kag maparas nga hambal kuhaon gikan sa inyo.” (Efeso 4:31) Nagasiling man ang Biblia nga “ang ulipon sang Ginuo indi dapat makig-away, kundi dapat magmalulo sa tanan.”​​—⁠2 Timoteo 2:⁠24.

Hatagi Sila sing Inyo Tion

Ang paghatag sa inyo kabataan sing pagtalupangod nga kinahanglan nila nagakahulugan man nga handa kamo nga isakripisyo ang inyo mga kalipayan kag mga kasulhayan para sa kaayuhan sang inyo kabataan. Ang Biblia nagasiling: “Ining mga pulong nga ginasugo ko karon sa imo dapat mangin sa imo tagipusuon; kag ipatudok mo ini sa imo anak kag ihambal mo ini kon nagapungko ka sa imo balay kag kon nagalakat ka sa dalan kag kon nagahigda ka kag kon nagabangon ka.”​—⁠Deuteronomio 6:​6, 7.

Sa karon, pila lang ka ginikanan ang makapakig-upod sa ila kabataan sa bug-os nga adlaw bangod sa ila masako nga palangabuhian. Apang, ginapadaku sang Deuteronomio nga ang mga ginikanan “dapat” mangita sing tion agod ihinguyang upod sa ila kabataan. Nagakinahanglan ini sing maayo nga pag-organisar kag subong man sing pagsakripisyo. Apang, kinahanglan sang kabataan ini nga pagtalupangod.

Binagbinaga ang resulta sang isa ka pagtuon sa kapin sa 12,000 ka tin-edyer. Ang hinakop sang mga manugpanalawsaw: “Ang labing maayo nga garantiya sa kapagros kag labing mabakod nga proteksion sa makatalagam nga paggawi sang isa ka tin-edyer amo ang mabakod nga kaangtanan sa ginikanan.” Huo, ginahandum gid sang kabataan ang pagtalupangod sang ila mga ginikanan. Isa ka bes, ginpamangkot sang isa ka iloy ang iya kabataan, “Kon ihatag sa inyo ang bisan ano nga luyag ninyo, ano ang pasulabihon ninyo?” Ang apat ka bata nagsabat, “Dugang pa nga tion upod kay Nanay kag Tatay.”

Gani agod mangin responsable nga ginikanan, pat-ura gid ninyo nga mahatag ninyo ang mga kinahanglanon sang inyo kabataan, lakip na ang ila espirituwal nga edukasyon kag suod nga pagpakig-abyan sa ila mga ginikanan. Buot silingon sini nga buligan ang kabataan nga mangin sangkol, matinahuron, kag bunayag nga mga hamtong nga mabuot sa ila isigkatawo kag nagahimaya sa ila Manunuga. (1 Samuel 2:26) Huo, ang responsable nga mga ginikanan amo ang mga nagahanas kag nagadisiplina sa ila kabataan sa diosnon nga paagi.

[Nota]

^ par. 7 Gingamit diri ni Pablo ang Griegong tinaga nga go·neuʹsin, gikan sa go·neusʹ, nga nagakahulugan sing “ginikanan.” Apang sa bersikulo 4 gingamit niya ang Griegong tinaga nga pa·teʹres, nga nagakahulugan sing “mga amay.”

[Retrato sa pahina 13]

Ang pagsing-al makapahanusbo sa bata

[Retrato sa pahina 13]

Maghinguyang sing tion upod sa imo kabataan