Magdiretso sa kaundan

Magdiretso sa listahan sang kaundan

San-o Madula ang AIDS?

San-o Madula ang AIDS?

 San-o Madula ang AIDS?

Halin sa pagkabata pa, ginapaulanan ang mga pamatan-on sing mga mensahe tuhoy sa sekso nga nagabuyok sa mga tawo sa imoralidad. Lapnag man ang pag-indyeksion sing droga nga isa pa ka paagi nga malatnan ang isa sang HIV. Bangod sang iresponsable nga panimuot sang madamo karon, mahimo nagapalibog ka kon bala madula pa ang AIDS.

NAGAKAIGO nga ginatudlo sang mga doktor ang pagbag-o sang paggawi subong amo ang isa ka importante nga estratehiya sa pagpakigbato sa AIDS. “Ang tagsa ka kaliwatan sang mga pamatan-on,” siling sang isa ka report nga ginbalhag sang Centers for Disease Control and Prevention, “nagakinahanglan sing maid-id, dalayon nga impormasyon tuhoy sa ikaayong-lawas kag pagpasilabot nga magabulig sa ila sa pagpalambo sing tubtob-buhi nga mga kalantip agod malikawan ang mga paggawi nga makadul-ong sa pagmasakit sing HIV. Dapat makigbahin ang mga ginikanan kag ang mga manunudlo man sa sining maid-id nga programa.”

Maathag nga dapat paathagan sang mga ginikanan ang ila mga anak tuhoy sa sini nga katalagman antes sila sugiran sing sayop nga mga impormasyon sang ila mga katubotubo ukon sang iban. Mabudlay ini kon kaisa. Apang maluwas sini ang kabuhi sang imo anak. Ang pagpaathag sa imo mga anak tuhoy sa sekso kag mga droga wala nagakahulugan nga indi nila mahibaluan kon ano ang malain. Ang matuod, makaamlig ini sa ila batok sa kalainan.

Importante ang Paghanas sang mga Ginikanan

Sa tunga sang dumaan nga katawhan sang Dios, ginapaabot ang mga ginikanan nga tudluan nila ang ila mga anak tuhoy sa seksuwal nga mga relasyon kag kon paano maamligan ang ila ikaayong-lawas. Makawiwili nga ang kasuguan sang dumaan nga mga Israelinhon naglakip sang maathag nga mga panuytoy sa moral subong man sang mga buhat nga nag-amlig sa ila gikan sa impeksion. (Levitico 18:​22, 23; 19:29; Deuteronomio 23:​12, 13) Paano dapat itudlo ining kasuguan sa katawhan? Ginsugo ni Jehova nga Dios ang mga Israelinhon: “Ining mga pulong nga ginasugo ko karon sa imo dapat mangin sa  imo tagipusuon.” Dapat mahangpan sang mga ginikanan ang mga benepisyo sa pagsunod sa sining kasuguan kag ang mangin resulta kon lalison ini. Pagkatapos, ginhatagan sila sing instruksion: “Ipatudok mo ini sa imo anak kag ihambal mo ini kon nagapungko ka sa imo balay kag kon nagalakat ka sa dalan kag kon nagahigda ka kag kon nagabangon ka.”​—⁠Deuteronomio 6:​6, 7.

Ang kahulugan nga ginahatag sang isa ka diksionaryo sa “ipatudok” amo ang “itudlo kag ipasalop paagi sa pirme nga pagsulitsulit ukon paglaygay.” Maathag nga kinahanglan ang tion. Mas daku ang posibilidad nga malikawan sang mga kabataan ang mga sahi sang paggawi nga makadul-ong sa ila pagmasakit sing HIV kag sang iban pa nga mga balatian kon ang ila mga ginikanan magtigana sing tion agod tudluan sila tuhoy sa mga katalagman sang pag-abuso sa droga kag sang ginadumilian nga seksuwal nga pagpakighirop.⁠ *

Lugpay Para sa mga May HIV/AIDS

Mahimo nga para sa minilyon ka tawo nga may HIV/AIDS, diutay lamang nga lugpay ang mga panikasog sa pagtapna sini. Luwas sa pisikal nga mga epekto sang balatian mismo, masami nga ginatamay sila kag ginasikway bangod sang ila kahimtangan. Ngaa? Ang kinaandan apang sayop nga pagpati amo nga malatnan ka sang HIV bisan matandog mo lang ang mga tawo nga nagamasakit sini. Halangpunon ang kahadlok nga basi malatnan ka sang HIV/AIDS, kay makalalaton ini kag makamamatay. Bangod sang kahadlok sa AIDS, nagpakita ang iban sing di-rasonable nga kahadlok sa mga tawo nga nagabalatian sini. Ang mga tawo nga may HIV ginapangindian nga bulngon, ginatabog gikan sa simbahan, kag masingki nga ginasubol pa gani.

Ang iban pa gid nagsiling nga ang AIDS isa ka sumpa sang Dios sa mga malauton. Matuod nga nalikawan kuntani sang mga tawo nga may HIV ini nga balatian kon ginsunod lamang nila ang mga talaksan sang Biblia tuhoy sa seksuwal nga moralidad, pagdroga, kag dugo. (Binuhatan 15:​28, 29; 2 Corinto 7:1) Apang, ginapakita sang Kasulatan nga ang balatian indi ebidensia sang silot sang Dios para sa isa ka espesipiko nga sala. Sa kabaliskaran, ang Biblia nagasiling: “Sa malaut nga mga butang ang Dios indi matilawan ukon sia mismo magatilaw kay bisan sin-o.” (Santiago 1:13; Juan 9:1-3) Ang tawo nga may HIV ukon AIDS bangod sang indi pagsunod sa Makasulatanhon nga mga talaksan apang nagbag-o na sang iya paggawi, makasalig nga wala sia ginbiyaan sang Dios.

Ginpakita sang Dios ang iya kahanuklog kag gugma sa mga nagabalatian sang nagkari sa duta ang iya Anak nga si Jesus. Sang masugata ni Jesus ang isa ka aruon sa isa sang iya paglakbay, ginpahulag sia ‘sang kaluoy, kag gin-untay niya ang iya kamot kag gintandog sia.’ Gingamit ni Jesus ang iya milagruso nga gahom kag gin-ayo ang aruon. (Marcos 1:40-42) Wala gintamay ni Jesus ang mga masakiton. Ang gugma nga ginpakita niya para sa ila isa ka himpit nga pagpabanaag sang gugma sang iya langitnon nga Amay.​—⁠Lucas 10:22.

Bulong Para sa AIDS​—⁠Malapit Na!

Ang milagruso nga mga pagpang-ayo ni Jesus wala lamang nagapasalig sa aton sang gugma sang Dios. Ginasugiran kita sang Biblia nga nagagahom na karon si Jesucristo subong isa ka langitnon nga Hari. (Bugna 11:15) Ginpakita sang iya ministeryo sa duta nga may gahom sia kag kahanda nga ayuhon ang bisan ano nga balatian sang katawhan. Amo gid sina ang himuon niya.

Ginapasalig kita sang tagna sa Biblia nga sa indi madugay “wala sing pumuluyo nga magasiling: ‘Nagamasakit ako.’ ” (Isaias 33:24) Walay sapayan nga napaslawan ang tawo sa pagpugong sa paglapnag sang AIDS ukon sa paghatag sing epektibo nga bulong para sa tanan, makasalig kita nga madula ang AIDS. “Pakamaayuha si Jehova, O kalag ko,” siling ni Hari David, “kag indi pagkalimti ang tanan niya nga mga buhat, Sia nga nagapatawad sang tanan mo nga kasaypanan, nga nagaayo sang tanan mo nga balatian.”​—⁠Salmo 103:​2, 3.

San-o ini matabo? Ano ang mga ginapatuman sang Dios para sa mga nagahandum nga makabaton sini nga mga pagpakamaayo? Ginaagda ka namon nga pakig-angutan ang mga Saksi ni Jehova agod makatuon ka pa tuhoy sa matahom nga mga saad sang Biblia.

[Mga nota]

^ par. 7 Napamatud-an sang madamo nga ginikanan nga ang libro nga Magtuon Gikan sa Daku nga Manunudlo, nga ginbalhag sang mga Saksi ni Jehova, nakabulig sa progresibo nga pagtudlo sa mga kabataan tuhoy sa sekso kag sa sadsaran nga mga prinsipio sa moral.

[Blurb sa pahina 11]

Ang tagna sang Biblia nagapasalig sa aton nga sa indi madugay “wala sing pumuluyo nga magasiling: ‘Nagamasakit ako’ ”

[Retrato sa pahina 10]

Ang pagtudlo sa imo mga anak tuhoy sa sekso kag pag-abuso sa droga makaamlig sa ila

[Retrato sa pahina 10]

Ginpakita sang ikasarang kag kahanda ni Jesus sa pag-ayo sa mga nagabalatian kon ano ang himuon niya sa palaabuton