Magdiretso sa kaundan

Magdiretso sa listahan sang kaundan

“Indi Namon Gusto Magsaulog sang Tigkalalag!”

“Indi Namon Gusto Magsaulog sang Tigkalalag!”

 “Indi Namon Gusto Magsaulog sang Tigkalalag!”

SUNO SA MANUNULAT SANG MAGMATA! SA BELGIUM

Amo ini ang desisyon sang isa ka klase sa isa ka eskwelahan sa Tienen, Belgium. Ngaa amo sini ang desisyon sang mga estudyante? Bag-o lang ginsaulog ang Tigkalalag sa Belgium. Una ini nga ginsaulog sa sini nga eskwelahan sang Oktubre 31, 2002. Gani, antes sini nga adlaw, ginhatagan sang maestra sing proyekto ang tanan nga estudyante tuhoy sa Tigkalalag. “Kon mas malaw-ay kag mas kahaladlukan, mas maayo!” siling niya.

Estudyante sa sini nga klase ang 10-anyos nga si Matthias. Nadumduman niya nga may nabasahan sia tuhoy sa mga katalagman sa bantog nga mga selebrasyon subong sang Tigkalalag sa Oktubre 8, 2001, nga gua sang Awake! Nahibaluan niya nga ang Tigkalalag wala ginakahamut-an sang Dios. Gani para sa iya proyekto, nagsulat si Matthias sing report pasad sa sini nga mga artikulo. Sa tapos mabasa sing maayo ang impormasyon, naghinakop ang maestra ni Matthias nga ang Tigkalalag indi nga wala sing halit subong sang paghunahuna sang madamo. Ginpangabay niya dayon si Matthias nga ipresentar sa klase ini nga topiko.

Sang ginsugdan ni Matthias ang iya presentasyon, daw wala nagapamati ang iban nga mga estudyante. Apang samtang nagapadayon sia, tanan sila nangin interesado sa iya pagpaathag. Sang matapos na sia, ginpamangkot sang maestra ang klase kon gusto pa nila magsaulog sing Tigkalalag. Tingob nga nagsabat ang klase: “Indi!” Nagsiling ang isa ka estudyante: “Makahaladlok gid ini!” Nagsiling ang isa pa: “Wala ako makahibalo nga ang Tigkalalag wala gali nagatahod sa mga tawo nga napatay na.”

Para kay Matthias, nga mahuluy-on anay, ginpalig-on gid sia sining eksperiensia nga sundon ang iya pasad sa Biblia nga ginapatihan walay sapayan sang pag-ipit. Dugang pa, labi sia nga gintahod sang iya maestra kag mga kaklase subong isa ka Saksi ni Jehova.