Magdiretso sa kaundan

Magdiretso sa listahan sang kaundan

Ngaa Dapat Tamdon nga Sagrado ang Pag-asawahay?

Ngaa Dapat Tamdon nga Sagrado ang Pag-asawahay?

 Ang Pagtamod Sang Biblia

Ngaa Dapat Tamdon nga Sagrado ang Pag-asawahay?

ANG kalabanan nga mga tawo karon mahimo magsiling nga nagapati sila nga ang pag-asawahay sagrado. Ngaa, nian, madamo ang nagadiborsio? Para sa iban, ang pag-asawahay isa lamang ka romantiko nga pangako kag isa ka legal nga kasugtanan. Mahimo magahunahuna sila nga ini nga mga pangako, bangod pangako lamang, puede nga indi pagtumanon. Ang mga tawo nga may amo sini nga pagtamod sa pag-asawahay madali lang mangampo sa ila pag-asawahay kon indi nila matigayon ang ginapaabot nila.

Paano bala ginatamod sang Dios ang kahimusan sang pag-asawahay? Ang sabat masapwan sa iya Pulong, ang Biblia, sa Hebreo 13:4: “Paghuptan sing dungganon sang tanan ang pag-asawahay.” Ang Griegong tinaga nga ginbadbad “dungganon” nagapahangop sing isa ka butang nga bilidhon kag ginapabaloran gid katama. Kon ginapabaloran naton ang isa ka butang, ginahalungan naton agod matipigan ini kag indi naton luyag nga madula ini, bisan sing aksidente lamang. Amo man ini tuhoy sa kahimusan sang pag-asawahay. Dapat ini tamdon sang mga Cristiano subong dungganon—isa ka butang nga bilidhon nga dapat nila amligan.

Maathag nga ginhimo ni Jehova nga Dios ang pag-asawahay subong isa ka sagrado nga kahimusan sa ulot sang bana kag asawa. Apang paano naton mapakita nga pareho sa iya ang aton pagtamod sa pag-asawahay?

Gugma kag Pagtahod

Ang pagpadungog sa kahimusan sang pag-asawahay nagakinahanglan nga padunggan sang mag-asawa ang kada isa. (Roma 12:10) Si apostol Pablo nagsulat sa unang-siglo nga mga Cristiano: “Ang tagsatagsa sa inyo maghigugma sang iya asawa subong sang iya kaugalingon, kag ang asawa magtahod sang iya bana.”​—Efeso 5:​33.

Huo, mahimo nga kon kaisa ang isa ka tiayon magahulag sing di-mahigugmaon  ukon sing di-matinahuron. Sa gihapon, dapat magpakita sing gugma kag pagtahod ang mga Cristiano. Si Pablo nagsulat: ‘Magpinaumuray kag magpinatawaray, kon ang isa may inugsumbong batok sa isa; subong nga ang Ginuo nagpatawad sa inyo, amo man ang himuon ninyo.’​—Colosas 3:​13.

Tion kag Atension

Ang mga mag-asawa nga nagatamod sa ila pag-asawahay subong sagrado nagahinguyang sing madamo nga tion agod maaman ang pisikal kag emosyonal nga mga kinahanglanon sang kada isa. Nalakip sa sini ang seksuwal nga paghirupay. Ang Biblia nagasiling: “Ihatag sang bana sa iya asawa ang nagakaigo kag subong man sang asawa sa bana.”—1 Corinto 7:3.

Apang, ang pila ka mag-asawa naghunahuna nga dapat magpuyo ang bana sa iban nga lugar sing temporaryo agod makaganar sing daku. Kon kaisa, ang pagtener sang bana sa iban nga lugar wala ginpaabot nga nadugayan. Masami, nangin isa ini ka mabudlay katama nga sitwasyon para sa mag-asawa nga kon kaisa ginatunaan sang pagpanghilahi kag diborsio. (1 Corinto 7:​2, 5) Bangod sa sini nga rason, ginsikway sang madamo nga Cristianong mag-asawa ang mga oportunidad sa materyal nga kabuganaan sa baylo nga mabutang sa katalagman ang pag-asawahay nga ginatamod nila nga sagrado.

Kon Mag-utwas ang mga Problema

Kon mag-utwas ang mga kabudlayan, ang mga Cristiano nga nagapadungog sa ila pag-asawahay wala nagapadasodaso sa pagbulag ukon pagdiborsio. (Malaquias 2:​16; 1 Corinto 7:​10, 11) Si Jesus nagsiling: “Ang tagsatagsa nga nagabulag sa iya asawa, luwas sa kabangdanan sang pagpakighilawas, nagahimo sa iya nga makihilahion; kag ang bisan sin-o nga magpangasawa sang binulagan nagapanghilahi.” (Mateo 5:​32) Ang pagdiborsio ukon pagbulag nga wala sing Makasulatanhon nga rason wala nagapadungog sa pag-asawahay.

Ang aton pagtamod sa pag-asawahay ginapakita man sa mga laygay nga ginahatag naton sa mga may serioso nga mga problema sa pag-asawahay. Nagalaygay bala kita gilayon nga dapat sila magbulag ukon magdiborsio? Huo, kon kaisa may nagakaigo nga mga rason nga dapat magbulag, subong sang sobra katama nga pag-abuso sa pisikal ukon hungod nga di-pagsuporta. * Subong man sang ginsiling na sa ibabaw, ginatugutan lamang sang Biblia ang diborsio kon ang isa ka tiayon nakahimo sing pagpakighilawas. Sa gihapon, indi dapat impluwensiahan sing di-nagakaigo sang mga Cristiano ang desisyon sang iban sa sining mga kahimtangan. Kay man, ang tawo nga may problema sa pag-asawahay—indi ang nagahatag sing laygay—amo ang magaatubang sa mga resulta sang desisyon.​—Galacia 6:​5, 7.

Likawi ang Pagpakadiutay sa Pag-asawahay

Sa pila ka duog, nangin kinaandan sa mga tawo nga gamiton ang pag-asawahay agod makapuyo sing legal sa iban nga pungsod. Masami nga ining mga tawo nagabayad sa isa ka banwahanon sa sinang pungsod agod magpakasal sa ila. Sa masami, wala nagaupod ining duha sa isa ka balay bisan pa mag-asawahay sila, ayhan indi gani sila mag-abyanay. Sa dili madugay kon matigayon na ang legal nga pagpuyo, nagadiborsio sila. Ginatamod nila ang ila pag-asawahay subong isa lamang ka kasugtanan sa negosyo.

Wala ginapahanugutan sang Biblia ining pagpakadiutay sa pag-asawahay. Bisan ano pa ang ila mga motibo, ang mga tawo nga nagapakasal nagasulod sa isa ka sagrado nga kahimusan nga ginakabig sang Dios nga isa ka bug-os kabuhi nga obligasyon. Ang mga partido sa sining kasugtanan nahigtan subong bana kag asawa, kag indi sila makaminyo liwat kon wala sing Makasulatanhon nga rason sa pagdiborsio.​—Mateo 19:​5, 6, 9.

Kaangay man sa bisan ano nga mapuslanon nga tulumuron, ang isa ka madinalag-on nga pag-asawahay nagakinahanglan sing pagpaninguha kag pagbatas. Ang mga wala nagapabalor sa pagkasagrado sini madali lang mangampo. Ukon magpasugot na lang sila sa isa ka di-malipayon nga pag-asawahay. Sa pihak nga bahin, ang mga nagakilala sa pagkasagrado sang pag-asawahay nakahibalo nga ginapaabot sang Dios nga magaunungay sila. (Genesis 2:​24) Nakahibalo man sila nga kon pauswagon nila ang ila pag-asawahay, ginapadunggan nila ang Desinyador sang kahimusan sang pag-asawahay. (1 Corinto 10:31) Ini nga pagtamod magapahulag sa ila nga magbatas kag maninguha agod magmadinalag-on ang ila pag-asawahay.

[Nota]

^ par. 14 Tan-awa Ang Lalantawan, Nobiembre 1, 1988, pahina 22-3.