Magdiretso sa kaundan

Magdiretso sa listahan sang kaundan

Emerhensia nga Paghugpa!

Emerhensia nga Paghugpa!

 Emerhensia nga Paghugpa!

PANUGIRON NI CÉSAR MUÑOZ

Pagkatapos sang makalilipay nga bakasyon sang ginduaw ko ang akon pamilya sa siudad sang ­Monterrey, Mexico, manugpauli na ako sa sanga talatapan sang mga Saksi ni Jehova sa Mexico City, diin may pribilehiyo ako sa pag-alagad. Domingo sadto, Disiembre 1, 2002. Nagsakay ako sa ­Flight 190, kag naglupad kami sang alas 7:00 sang gab-i.

 PAGLIPAS sang kubos sa isa ka oras kag tunga sang maayo nga paglupad, ang eroplano nagsugod sa pagpaubos. Nian hinali ini nga nagpaitaas, kag nakibot kami tanan bangod sang sobra nga gahod halin sa ubos. Pagkatapos sini, nag-anunsio ang kapitan nga ang mga ganhaan sang land­ing ­gear indi magbukas. Nagpilit ini! Ang pila ka pasahero naghibi bangod sang daku nga kahadlok. Ang iban nangadi sing mabaskog. Nagpalibog ako kon ano ang matabo.

Ginpahibalo sa amon sang kapitan nga magahimo sia sing mga tikang agod mabuksan ang mga ganhaan sang land­ing ­gear. Gani samtang nagalupad kami sa ibabaw sang Mexico City, gin-­undag-undag niya ang eroplano pasaka-panaug kag pawala-patuo sa sulod sang mga isa ka oras. Mas makahaladlok ini sangsa bisan ano nga pagsakay sa peryahan. Indi gid ini makalilipay! Nian ang kapitan nag-anunsio: “Ginakasubo namon nga ipahibalo sa inyo nga ang mga ganhaan sang land­ing gear indi magbukas. Ang mahimo na lang naton amo ang emerhensia nga paghugpa nga wala ginagamit ang land­ing ­gear.” Nagtinulukay kami nga may kahangawa, ginahunahuna nga basi mapatay kami tanan.

Ginhatag ang mga instruksion para sa emerhensia nga paghugpa. Gin-uba namon ang amon mga sapatos, ginhukas ang bisan ano nga butang nga makahalit, kag ginsunod ang posisyon sa pagpungko nga ginpanugda nila. Naghunahuna ako nga magahugpaas gid kami sa run­way! Sina nga higayon, nangamuyo ako kay Jehova nga Dios kag nakabatyag sing daku nga pagkakalma.​—Filipos 4:6, 7.

Nabatian ko na anay nga kon ang isa ka tawo malapit na mapatay, madumduman niya ang mga natabo sa iya kabuhi kag magahunahuna sang mga butang nga dapat kuntani ginhimo niya. Kanugon nga wala ko ginsugilanon ang katupad ko nga lamharon nga babayi tuhoy sa Ginharian kag namat-od ako nga kon hatagan ako sing isa pa ka kahigayunan, himuslan ko gid ang tanan nga kahigayunan sa pagpanaksi. Nahunahuna ko man kon bala ginhimo ko ang akon bug-os nga masarangan sa pag-alagad kay Jehova.

Sang nagpaubos na ang eroplano, nakita ko ang mga trak sang bombero, ambulansia, kag ang madamo nga tawo nga nagahulat. Nian nabatyagan namon ang mabaskog nga pagtay-ug sang nagtupa ang tiyan sang eroplano sa run­way. Sang nagdahog ang eroplano, nag-idlab ini bangod sang pagdapat sang metal sa baldosa. Ang mga trak sang bombero sa magtimbang nga bahin sang run­way gilayon nga nagpasumpit sing tubig sa eroplano agod pabugnawon ini.

Sa katapusan, pagkatapos sang makahalangawa gid nga mga higayon, ang eroplano nagdulog. Nagpalakpak kami tanan, nalipay gid kag naumpawan nga madinalag-on nga napahugpa sang piloto ang eroplano. Nian ginsilingan kami nga magbakwit gikan sa eroplano sa gilayon. Maabtik kami nga nagkadto sa puertahan kag nagpadalus-os pakadto sa kahilamnan.

Nagatindog sa malayo kag nagakurog sa kahadlok bangod sang natabo, nakita ko ang eroplano nga nagahilay sa run­way. Maayo na lang nga pila lamang ka pasahero ang nahalitan, kag indi tanto ka grabe. Sa mga ambulansia sa malapit, ang iban gintan-aw sang mga doktor bangod sang kakugmat.

Plano ko kuntani nga magpauli sing mga alas 9:00 sang gab-i, apang naatrasar sing apat ka oras ang akon pag-abot. Ginhunahuna ang natabo, nagpasalamat ako nga nabuhi ako! Bangod sini nga inagihan, nagpamalandong ako. Ang kabuhi wala sing kapat-uran. Magabatyag gid ang isa nga kubos kon hunahunaon niya nga ang tanan mahimo madula sa sulod lamang sang pila ka minuto. Kon indi mapat-od nga mabuhi pa, mahimo nga ulihi na agod tadlungon ang kabuhi ukon maghimo sing maayo nga rekord sa Dios. Labi ko nga ginapakabahandi karon ang kahigayunan nga gamiton ang akon kabuhi sing maalamon kag himuon nga importante ang kada adlaw sang akon ­pag-alagad sa akon Dios, nga si Jehova.​—Salmo 90:12.