Magdiretso sa kaundan

Magdiretso sa listahan sang kaundan

Pagbantay sa Kalibutan

Pagbantay sa Kalibutan

 Pagbantay sa Kalibutan

Isa ka Toro sa Balaligyaan Sang mga Porselana

Nagpalibog ka bala anay kon ano ang mahimo matabo kon mangin matuod ang hulubaton nga ang isa ka toro makasulod sa balaligyaan sang mga porselana? Ti, nagreport ang BBC News nga may natabo nga kaangay sina. Isa ka toro nga nakabuhi gikan sa isa ka subasta sang mga sapat sa Lancashire, Inglaterra ang nagsulod sa balaligyaan sang mga antigo. “Balaligyaan ini sang antigo nga mga porselana kag, subong mapaabot, pila ka malahalon nga mga butang ang nagkalabuka,” siling sang isa ka pamantalaan nga nagreport sang natabo. Sa tapos masugilanon ang tag-iya sang toro kag mabinagbinag ang risgo sa pagdakop sa sapat, namat-od ang mga awtoridad nga patyon na lang ang toro. Gani ginsirhan sang mga pulis ang balaligyaan kag gintiro ang toro nga nakibon sa sulod.

Pagpang-espiya Paagi sa Cell Phone

Nabutang sa katalagman ang kompidensial nga mga butang sa negosyo bangod sang mga cell phone nga may kamera, report sang pamantalaan nga Frankfurter Allgemeine Zeitung. Bisan pa nga ginkabig anay ang mga kamera subong isa lamang ka gamit agod mapadamo ang benta, tuman gid kaathag ang mga retrato nga makuha sining pinakaulihi nga teknolohiya sang mga cell phone kag ginakabig ini nga isa ka daku nga problema sang mga opisyales sa seguridad sang madamo nga kompanya. Indi kaangay sang kinaandan nga mga kamera, luwas nga indi madali makita, madasig ini makapadala sing retrato, amo nga epektibo gid ini nga gamit para sa pagpang-espiya. Bisan madakpan pa ang nagapang-espiya, tapos na ang pagretrato. Bangod sini nga mga rason, gindumilian na sang pila ka kompanya ang paggamit sing cell phone nga may kamera sa mga duog nga estrikto ang seguridad, subong sang mga departamento sa desinyo kag mga duog diin ginatestingan ang bag-o nga mga modelo sang mga produkto.

Mga Kahalitan Bangod sang mga Aksidente sa Salakyan

“Linibo pa ka tawo ang nagakapatay sa mga aksidente sa salakyan kada tuig sangsa masingki nga krimen,” report sang pamantalaan nga El País sa Espanya. Kada tuig sa Europa, 55,000 ang nagakapatay kag 3.5 milyones ang nagakahalitan sa mga aksidente sa salakyan. Sa Espanya, ang mga tawo nga nagapangidaron sing 15 tubtob 29 anyos amo ang mga biktima sa 35 porsiento sang tanan nga napatay bangod sang aksidente sa salakyan, gani amo ini ang panguna nga kabangdanan sang kamatayon sa sini nga grupo. “Amo ini ang pinakaserioso nga problema sa kapagros sang mga tawo,” siling ni Jeanne Picard Mahaut, humalambal sang La Ligue, isa ka indi gobierno nga organisasyon nga nagakonsentrar sang igtalupangod agod mangin kapin ka luwas sa aksidente ang pagbiyahe sa salakyan. “Kon indi kamo magpati sa akon,” siling pa niya, “pamangkuta ninyo ang mga doktor nga nagaatipan sa mga kaso sang emerhensia kada talipuspusan sang semana.” Lakip sa ginpanugda nga mga tikang, ginpangabay sang La Ligue kag sang duha pa ka grupo sa Europa ang pagtakod sa salakyan sing instrumento nga nagakontrol sang kadasigon kag sing ‘black box’ agod mahibaluan ang posible nga kabangdanan sang aksidente.

Indi Maayo nga Tuig Para sa mga Bukid nga Yelo

Ang tuman nga tig-ilinit sang 2003 amo “ang pinakamalain nga panahon nga madumduman karon” para sa mga bukid nga yelo, siling sang pamantalaan nga Corriere della Sera sa Italya. Bangod mas mainit karon ang tig-ilinit kag mas mataas ang promedyo nga temperatura, nagakatunaw “sing tuman kadasig” ang nasupot nga niebe kag yelo sa kabukiran sang naaminhan nga Italya. Lakip sa mga natukiban sining karon lang halin sa natunaw nga yelo amo ang 3,300 ka kilogramo nga kanyon nga ginhimo sa Austria, nga nakita sa kataason nga 3,178 ka metro halin sa nibel sang dagat. Gingamit ini nga kanyon sa pagsalakay sa Italya sang unang bug-os kalibutan nga inaway. “Nangin masunson ang kaanggid sa sini nga mga tukib sang nagligad nga 20 ka tuig,” siling sang artikulo. “Bangod sang mas mainit nga tig-ilinit, natunaw ang mga bukid nga yelo kaangay sang bukas nga freezer.”