Magdiretso sa kaundan

Magdiretso sa listahan sang kaundan

“Ang Pagpangita sang Katawhan sa Dios”

“Ang Pagpangita sang Katawhan sa Dios”

 “Ang Pagpangita sang Katawhan sa Dios”

Amo sini ang tig-ulo sang editoryal sang Septiembre 25, 2002, nga Excelsior nga pamantalaan sa Mexico City. Ginsulat ini ni Carlo Coccioli, isa ka kilala nga iskolar kag manunulat sa Mexico. Ang iya artikulo nagaumpisa sa masunod nga pinamulong.

“Bag-o ko lang matapos basa​​—⁠⁠ukon nabasa liwat ukon, sing nagakaigo pa, masulitsulit basa​​—⁠⁠ang isa ka tumalagsahon nga gamay nga pula nga libro​​—⁠⁠indi ang pula nga libro nga bantog sang panahon ni Mao Tse-tung. Indi lamang ini [Mankind’s Search for God⁠⁠ *] isa ka tumalagsahon gid nga libro kundi, indi kaangay sa ‘Little Red Book’ ni Mao Tse-tung nga nangin kinaraan na sa paglipas sang panahon, mahimo nga indi gid ini madula. Ini nga libro, sa simple nga hambal, isa ka regalo sang mga Saksi ni Jehova sa kalibutan. Kon ipaanggid sa kalabanan nga mga libro, magamay ini, apang dalayawon gid ang kaundan sini. Mahimo ini ipamulsa, apang kon makita mo ini sa isa ka librarya nga may 90,000 ka nagkalainlain nga libro, ayhan amo ini ang pinakaimportante sa tanan.”

Si G. Coccioli padayon nga nagsaysay tuhoy sa tion sang pamatan-on pa sia sang namat-od sia kon ano nga karera ang iya kuhaon. “Ang patag nga ginpili ko nga tun-an sa unibersidad,” paathag niya, “may kaangtanan sa kon ano ang makagalanyat kag makawiwili sa akon: ang mga relihion, ilabi na ang mga sa Sidlangan.” Nagsiling sia nga nawili gid sia sa pagtuon tuhoy sa mga relihion kag sang Bug-os Kalibutan nga Inaway II, natigayon niya ang doctorate sa mga asignatura may kaangtanan sa mga relihion.

“Gani,” paathag niya, “makasiling gid ako nga ang gamay nga pula nga libro nga nabaton ko isa ka tumalagsahon gid nga hinimuan tuhoy sa madalom kag importante nga topiko nahanungod sa mga relihion. . . . Ang tagsa ka puluy-an dapat may yara sini [nga libro] nga mahimo buksan, basahon, kag basahon liwat sa tion kag tion. Wala ini sing relihioso nga pasayod kundi, sa baylo, isa ini ka masangkad nga hinimuan sang tawo sa kultura, nga may huyog nga mag-imbestigar sa masibod nga misteryo sang Dios.”

Sa paghinakop sang iya artikulo, ginhatag ni G. Coccioli ang numero sang telepono sang Saksi nga naghatag sa iya sing libro. Sugod sadto nakabaton ang Saksi sing madamo nga tawag nga nagapangabay sini, gani ginpat-od sang sanga talatapan sang mga Saksi ni Jehova sa Mexico nga ang tanan nga interesado sa Mankind’s Search for God makabaton sing kopya. Ang isa ka tawo nga nagpangabay sing 20 ka libro para sa iya pamilya kag mga abyan nagauswag karon sa pagtuon niya sa Biblia.

[Nota]

^ par. 3 Ang bag-o nga mga imprinta sini nga libro indi na matig-a ang panghapin kag indi na pula ang duag. Ini nga libro indi matigayon sa Hiligaynon nga lenguahe.