Magdiretso sa kaundan

Magdiretso sa listahan sang kaundan

Pagbantay sa Kalibutan

Pagbantay sa Kalibutan

 Pagbantay sa Kalibutan

Paghangop sa Taghol sang Ido?

Ang isa ka kompanya sa Japan nga nagapanghimo sing mga hampanganan nagdesinyo sing isa ka gamit nga nagabadbad sang mga taghol sang ido sa mga tinaga nga mahangpan sang tawo, report sang Japan Information Network. Ini nga gamit amo ang isa ka wireless nga mikropono nga ginaangot sa higot sa liog sang ido kag nagapaliton sing mga tunog sa isa ka gamay nga receiver. Ginaanalisar kuno sang receiver ang mga taghol sang ido kag ginaklaseklase ini sa anom ka sahi sang emosyon: kapaslawan, kaakig, kalipay, kasubo, handum, kag kabaris. Ang mga resulta ginapakita sa LCD sang receiver, kag nagalakip sang mga prase kaangay sang “Maayo ang pamatyag ko!” “Naugot ako!” kag “Kari ka, mahampang kita!” Ang taghimo nagsiling nga 300,000 ka bilog sini nga gamit nga tag-$100 U.⁠S. ang kada isa ang nabaligya na nila sa Japan kag nagalaum sila nga makabaligya sing isa ka milyon sini sa South Korea kag Estados Unidos.

Diborsio sang may Edad na nga mga Mag-asawa

Sa Alemanya, “nagadugang ang kadamuon sang mga mag-asawa nga nagabulagay pagkatapos sang malawig nga pag-asawahay,” report sang Berliner Morgenpost. Si Gina Kästele, isa ka terapista sa pag-asawahay gikan sa Munich, Alemanya, nagsiling nga ang isa ka daku nga rason sini amo ang nagadugang nga pagkaindependiente sang mga babayi, ilabi na tuhoy sa kuarta. “Nadula na sang lalaki ang iya importansia anay subong manugsakdag sang pamilya,” siling ni Kästele. Ang isa ka kinaandan nga pagtamod amo nga ang pagdiborsio sang may edad na nga mga mag-asawa resulta sang pagpaiway anay nila sang ila pagbulagay tubtob magpain na ang ila mga kabataan. Apang sa masami, siling ni Kästele, ang kabangdanan sang pagdiborsio sang mga may edad na amo ang pagluib sang bana.

Ang Epekto sang Isa ka Yuhom

“Tubtob sa 74 porsiento sang mga ginsurbe ang indi luyag makig-angot sa masinulub-on nga mga tawo, kag 69 porsiento ang indi makapakig-abyan sa ila.” Amo ina ang report sang Wprost nga magasin tuhoy sa isa ka pagtuon sang Institute of Sociology sa Jagiellonian University sa Kraków, Poland. Ang isa ka rason nga ginsambit amo nga ang masinulub-on nga mga tawo masami ginahaumhaum nga may ginalikom. Madugay na nahibaluan ini sang mga tawo nga ang obra dayag sa publiko, amo kon ngaa ang “mga politiko, mga negosyante, mga bituon sa pop nga musika, mga manugbalita sa TV, kag ang mga tawo sa public relations, mga ahente, kag mga manugbaligya nagayuhum” pirme, siling sang Wprost. Nasapwan man sang mga manalawsaw nga kon magyuhum kita, mas madamo nga dugo ang nagakadto sa aton utok, kag ginapauswag sini ang aton panimuot. Ang isa ka negosyante nga babayi nagsiling: “Ginatinguhaan ko nga magyuhum bisan pa wala ako sing gana nga magyuhum. Kon makayuhum na ako, mabatyagan ko ang pagbag-o sa akon kaugalingon, kag nagapaayo gid ini sang akon pamatyag.”

Paandam Tuhoy sa Ginadabok nga Kalayo sa mga Kamping

Sa Australia, ang kabangdanan sang kapin sa 70 porsiento sang pagkapaso sang mga kabataan sa dabok sa lugar nga ginakampingan ‘amo ang mainit nga mga agipo sa baylo nga kalayo,’ report sang Medical Journal of Australia (MJA). Dugang pa, ang kalabanan nga pagkapaso sa kamping sa Australia nagakatabo “sa masunod nga aga pagkatapos nga abi nila napalong na ang kalayo nga gindabok sa kamping.” Ngaa amo sini? Nasapwan sang mga manalawsaw nga kon ang mga dabok sa kamping subwan sing tubig, ang kainit sang baga kag abo nagatahaw pa 16 degrees Celsius pagligad sang walo ka oras. Samtang, ang dabok sa kamping nga ginpalong paagi sa pagtampok sing balas mangin subong gihapon kainit sa 91 degrees Celsius pagligad sang walo ka oras​​—⁠bastante na nga makapaso sing third-degree pagligad sang isa ka segundo nga pagdapat sa panit. “Bangod ang pagpalong paagi sa balas nagahinago lang sang katalagman,” ang MJA nagasiling, “ang lamang luwas nga paagi sa pagpalong sa isa ka dabok sa kamping amo ang pagbasya sing tubig sa sini.”