Magdiretso sa kaundan

Magdiretso sa listahan sang kaundan

Habon—“Bakuna nga Mahimo Mo sa Imo Kaugalingon”

Habon—“Bakuna nga Mahimo Mo sa Imo Kaugalingon”

 Habon—“Bakuna nga Mahimo Mo sa Imo Kaugalingon”

“ANG ikaduha nga nagapatay sa madamo nga kabataan sa bug-os nga kalibutan indi malaria, TB, ukon AIDS. Ini amo ang . . . lupot,” report sang The Economist nga magasin. Apang, madamo sining nabiktima nga kabataan ang buhi pa kuntani karon kon sila kag ang ila pamilya regular nga naggamit sing habon sa pagpanghinaw sang ila mga kamot.

Nasapwan sang mga manugpanalawsaw sa London School of Hygiene and Tropical Medicine nga ang “nagakaigo nga pagpanghinaw sa kamot makabuhin sa insidente sang lupot sing 43%,” siling sang The Economist. “Epektibo man ini nga makabuhin sa insidente sang impeksion sa baga, ang panguna nga nagapatay sa mga bata. Nasapwan sa isa ka daku nga pagtuon nga ginhimo para sa mga soldado sang Amerika nga ang insidente sang kataro kag ubo nagnubo sing 45% sang ginhinawan sang mga soldado ang ila kamot sing lima ka beses kada adlaw.” Bisan sa nagatin-ad nga mga pungsod masarangan baklon sang kalabanan nga pamilya ang habon. Gani, nagakaigo nga gintawag ini subong “isa ka sahi sang bakuna nga mahimo mo sa imo kaugalingon.” Kag indi pa ini masakit!

Ang Biblia nagapalig-on man sang katinlo. “Tinluan ta ang aton kaugalingon sang tanan nga nagahigko sang lawas kag sang espiritu,” siling sang 2 Corinto 7:1. (Maayong Balita nga Biblia) Bisan ang aton espirituwal nga kaputli amo ang panguna nga ginaulikdan sang Dios, ginakabig man niya nga importante ang pisikal nga katinlo. (Levitico, kapitulo 12-​15) Siempre pa, wala niya ginalauman nga mangin sobra kita ka estrikto sa sini. Sa gihapon, dapat mangin batasan naton nga magpanghinaw sang kamot pagkatapos gamiton ang kasilyas, pagkatapos ulihan ukon islan ang lampin sang bata, antes magpreparar sang pagkaon ukon antes magkaon, kag sa iban pa nga sitwasyon diin posible nga mapalaton naton ang makahalalit nga mga mikrobyo ukon kagaw sa iban. Paagi sa regular nga pagpanghinaw sang aton mga kamot, ginapakita naton ang Cristianong gugma sa aton pamilya kag sa tanan nga makaupod naton.​​—⁠Marcos 12:31.