Magdiretso sa kaundan

Magdiretso sa listahan sang kaundan

Pag-atubang sa mga Baha sa Caucasus

Pag-atubang sa mga Baha sa Caucasus

 Pag-atubang sa mga Baha sa Caucasus

SUNO SA MANUNULAT SANG MAGMATA! SA RUSYA

SANG nagligad nga tuig sa naaminhan nga bahin sang Caucasus sa Rusya, ang kadamuon sang ulan nga kinaandan na nga nagatupa sa sulod sang tatlo ka bulan nagtupa sa sulod lamang sang duha ka adlaw. Madamo nga suba ang nag-awas sa pangpang. Bisan ang magagmay nga mga sapa nangin mabaskog nga sulog sang tubig, kag gin-anod ang tanan nga butang nga maagihan. Nabulwang ang mga dam kag nagkalaguba ang mga kabalayan kag iban pa nga mga tinukod. Sa hinali lamang, linibo ka residente ang nadulaan sing puluy-an. Madamo sang wala gilayon nakagua sa ila mga puluy-an ang napatay. Ang iban nagtindog na lamang nga wala sing mahimo samtang ang ila mga hinigugma ginaanod palayo sang mabaskog nga sulog sang tubig.

Sa siudad sang Nevinnomyssk, isa ka pamilya ang nagtinguha sa pagpalagyo sakay sa ila traktora. Apang, ginbaliskad sang masulog nga tubig ang traktora, kag ang bilog nga pamilya napatay. Ang iban napatay nga nagatinguha sa pagsalbar sa iban. Suno sa opisyal nga mga pagbanabana, 335,000 ka tawo ang nahalitan sang baha. Ang napatay sa ila kapin sa 200 kag madamo ang wala makita.

Linibo ka puluy-an ang nalapawan sing tubig. Ang mga tubo sang tubig kag mga imburnal nagkalaguba. Bisan ang nalubong nga mga bangkay naglutaw bangod sang mabaskog nga sulog sang tubig, pati na ang bangkay sang mga sapat nga napatay bangod sa anthrax. Ang halit sang baha ginabanabana nga naglab-ot sa mga 16 ka libo ka milyon ka ruble, ukon mga 500 milyones dolyares (U.⁠S.).

Ining matahom kag mauyahon nga duta, nga sa masami ginapatuhuyan sa ambahanon kag binalaybay, nangin isa ka makapasakit-sing-dughan nga talan-awon! Apang, ang matuod nga gugma sa isigkatawo wala maguba sang kalamidad.

Ginhatag Gilayon ang Bulig

Sang primero, wala sing matinlo nga tubig, wala sing koryente, wala sing gasolina, wala sing komunikasyon sa telepono. Ang mga tawo indi makapakigkomunikar sa isa kag isa. Sobra sa 3,000 ka Saksi ni Jehova ang nagapuyo sa naapektuhan  nga lugar, kapin sa 700 sa sulod kag malapit sa Nevinnomyssk. Gani sa gilayon nga nabalitaan ang tuhoy sa baha, ang mga Saksi nagtukod sing pinasahi nga pang-emerhensia nga mga komite agod diparahon ang mga naapektuhan. Ini nga mga komite nagsugod sa pagpanghikot bisan antes pa nag-abot ang mga manugtabang sang gobierno.

Sa magamay nga banwa sang Orbelyanovka, mga 60 kilometros bagatnan-sidlangan sang Nevinnomyssk, ang tubig madasig nga nagtaas. Nagdangop ang walo ka tawo, lakip ang duha ka Saksi nga mga babayi, sa isa ka pukatod. Apang nagdangop man didto ang magagmay nga mga sapat kag madamo nga mga man-ug. Subong resulta, ang walo ka tawo bilog nga gab-i nga nagpulaw kag nagbantay agod indi makagat sang mga man-ug.

Pagkaaga, nangita sing mga paagi ang lokal nga mga Saksi agod makadtuan ang ila duha ka Cristianong mga utod nga babayi. Sang pagkahapon, nakakita gid man sila sing isa ka diutay nga goma nga baruto. Apang antes salbahon ang mga utod, ginsakay sa baruto sang mga Saksi ang isa ka tigulang nga paralitiko pakadto sa isa ka indi delikado nga lugar. Pagkatapos sini, samtang ginasakay nila ang mga utod nga babayi pakadto sa indi delikado nga lugar, nag-abot ang isa ka helikopter kag ginkuha ang iban pa nga mga tawo sa pukatod.

Sadto man nga adlaw ginsalbar sang mga Saksi ang iban pa sakay sa baruto. Sang namangkot ang mga Saksi, “Kilala bala ninyo kon sin-o kami?” ang mga tawo nagsabat: “Siempre pa, mga taga-Ministry of Emergency Situations.” Nakibot sila nga mahibaluan nga ang nagtabang sa ila mga Saksi.

Ang mga Saksi sa Nevinnomyssk nagbakal sing isa ka masulusaylo nga kusina kag nagluto sing mainit nga pagkaon para sa mga nagakinahanglan. Indi lamang pagkaon ang ila gindul-ong kundi pati man tubig, panapton, kag bulong. Ang mga grupo sang Saksi nga mga boluntaryo nagpaninlo man sing mga puluy-an kag nagpanghawan sing mga ugsaran.

Gingamit sang negosyante nga Saksi nga mag-asawa sa Zelenokumsk ang ila salakyan sa pagdul-ong sing tubig, pagkaon, kag panapton, nga ginpangompra nila sa isa ka pakyawan nga tiendahan. Sang ang mga kakilala sang asawa namangkot sa iya kon para kay sin-o ang iya ginpangompra, nagsabat sia nga para ini sa iya mga masigkatumuluo nga naapektuhan sang kalamidad. Bangod sang iya mainulikdon nga panimuot, napahulag man sila sa pagbulig. Ang isa ka negosyante nga babayi naghatag sing isa ka sako sang miki, ang isa pa sing isa ka daku nga putos sang habon, kag ang iban pa sing mga sako sang kalamay.

Bulig Gikan sa Malayo nga mga Lugar

Sanglit madamo nga mga Saksi sa Rusya ang luyag magbulig sa mga biktima sang baha, isa ka pinasahi nga pundo ang gingamit para sa pagpadala sing bulig sa mga nagakinahanglan. Bisan ang boluntaryo nga mga manugpangabudlay sa Administrative Center (sanga talatapan) sang mga Saksi ni Jehova sa Rusya, nga nahamtang malapit sa St. Petersburg, nagbulig man. Ang iban nagbakal sing bag-o nga mga butang para sa mga biktima sang baha. Ang isa ka utod nga babayi nagsiling: “Ginhatag ko ang akon pinakamaayo nga mga butang bangod may yara pa ako, apang ang amon mga kauturan wala gid sing bisan ano.”

Ang Administrative Center nagpadala man sing sulat sa mga  150 ka kongregasyon sang mga Saksi ni Jehova sa St. Petersburg kag Moscow, nga nagapaathag kon paano ang mga kauturan makadonar sing kuarta, pagkaon, kag panapton. Bisan pa mabudlay ang pangabuhi sa Rusya kag ang kalabanan nga mga Saksi imol lamang, madamo ang ila mga donasyon. Nagpahanumdom ini sang bulig nga ginhatag sang imol nga mga Cristiano sa Macedonia sa ila nagakinahanglan nga mga kauturan sa Judea.​—⁠2 Corinto 8:1-4.

Sa tapos mabahinbahin ang donasyon sa lugar nga ginatipunan, ginkarga ini sa mga trak kag gindala sa lugar nga naapektuhan sang kalamidad. Magluwas sini nga mga donasyon, ang Administrative Center nagbakal sing napulo ka tonelada nga pagkaon, 500 ka set nga kobre-kama, kag mga produkto para sa katinlo kag kapagros, subong man sing mga gamit kag mga panapton nga pangtrabaho nga gamiton sa pagpaninlo pagkatapos sang kalamidad. Sa kabug-usan, anom ka 50-ka-tonelada nga trak ang nagdala sing bulig sa naaminhan nga bahin sang Caucasus.

Ang Kaalwan Nangin Panaksi

Nakaganyat sing igtalupangod ang pagpaninlo nga ginhimo sang mga Saksi sa lugar nga naapektuhan sang baha. Binagbinaga ang kahimtangan sa matahom nga balakasyunan nga siudad sang Kislovodsk, diin nagapuyo ang kapin sa 300 ka Saksi. Nagtanyag sila nga buligan ang administrasyon sang siudad kag ginhatagan sila sing isa ka lugar nga tinluan.

Sang Hunyo 28 sang alas 8:00 sang aga, mga 150 ka Saksi, lakip ang bug-os nga mga pamilya, ang nagdala sang ila mga gamit kag nagtipon agod magtrabaho. Ang iban nagbakasyon sa ila trabaho nga wala sing sueldo agod magbulig sa pagpaninlo. Wala madugay, nag-abot ang isa ka salakyan, kag ang nahauna nga bise-alkalde nagpanaug. “Sin-o ini nga mga tawo?” pamangkot niya.

“Mga Saksi ni Jehova sila,” siling sa iya. “Nagkara sila agod tinluan ang siudad pagkatapos sang kalamidad.”

Natingala sa tuman kadamo nga tawo nga nakita niya, ang bise-alkalde nagsiling, “Dalayawon gid sila! Salamat! Tumalagsahon gid ini!”

Sang ulihi, antes lang gid sang panyaga, isa pa ka opisyal sang siudad ang nag-abot sakay sa iya salakyan. Nagdulog sia, nanaug, kag nagpalapit sa mga Saksi. “Ginapanilagan namon ang inyo ginahimo, kag natingala gid kami,” siling niya. “Wala pa kami makakita sing mga tawo nga nagapangabudlay kaangay ninyo. Daku na ang inyo ginhimo!”

Sini man nga tion, isa ka tigulang nga babayi nga naglabay ang nagdulog kag nagpamangkot, “Ngaa tuman gid kapisan sini nga mga tawo?” Sang ginsugiran sia nga ang mga Saksi ni Jehova nagabulig sa siudad, nagtulo ang mga luha sa iya mata. “Matuod nga mga tumuluo kamo,” siling niya. “Ang matuod nga pagkatawo sang mga tawo nagagua sa tion sang kalamidad.” Isa pa ka babayi ang nagsiling: “Dalayawon gid ini! Madugay na nga wala ako makakita sing subong sini.”

Sang masunod nga adlaw gindayaw sang lokal nga pamantalaan nga Na Vodakh ang mga Saksi ni Jehova, nga nagasiling nga ginhakot nila ang kapin sa 100 ka tonelada sang lunang gikan sa siudad. Ang mga opisyales sang siudad sang Kislovodsk nagpadala sing sulat sang pagpasalamat sa mga Saksi, nga nagasiling: “Ginpasag-uli sang inyo hamili nga bulig ang katahom sang siudad . . . Wala duhaduha nga ang mga pulong sang pagpasalamat gikan sa madamo nga mga bisita sa amon siudad amo ang inyo pinakamaayo nga padya.”

Bisan pa nga ang kinaugali nga kalamidad nga natabo sa naaminhan nga bahin sang Caucasus nangin kabangdanan sang daku nga kadulaan kag kagumon, ang mga Saksi ni Jehova nalipay nga ipakita ang gugma sa ila mga masigkatumuluo kag sa ila mga isigkatawo. Labi ini nga nagpahalipay sa ila bangod nahibaluan nila nga ini nga pagpakita sing gugma nagahatag sing himaya kay Jehova, ang aton Manunuga.

[Mga mapa sa pahina 16]

(Para sa aktual nga pormat, tan-awa ang publikasyon)

Black Sea

CAUCASUS MOUNTAINS

Nevinnomyssk

Orbelyanovka

Zelenokumsk

Kislovodsk

Caspian Sea

[Credit Line]

Globe: Mountain High Maps® Copyright © 1997 Digital Wisdom, Inc.

[Retrato sa pahina 17]

Nagbakal ang mga Saksi sining masulusaylo nga kusina kag nagluto sing pagkaon para sa mga nagakinahanglan

[Retrato sa pahina 17]

Gingamit sini nga Saksi ang salakyan sang pamilya sa pagdul-ong sing pagkaon kag suplay

[Retrato sa pahina 18]

Gindayaw sang mga opisyales sang Kislovodsk ang mga Saksi bangod sang pagbulig nga mapasag-uli ang ila siudad