Magdiretso sa kaundan

Magdiretso sa listahan sang kaundan

Ang Dios Bala Nagapakamaayo sa Aton sing Manggad?

Ang Dios Bala Nagapakamaayo sa Aton sing Manggad?

 Ang Pagtamod sang Biblia

Ang Dios Bala Nagapakamaayo sa Aton sing Manggad?

“Ang pagpakamaayo ni Jehova​​—⁠amo ina ang nagapamanggad, kag wala sia nagadugang sing kasakit sa sini.”​​—⁠HULUBATON 10:22.

ANG ginkutlo bala nga teksto sa Biblia nagakahulugan nga ginapakamaayo sang Dios ang iya mga alagad sing materyal nga mga manggad? Amo sini ang pagpati sang iban nga tawo. Talupangda ang pangangkon sang isa ka Pentecostal nga manugwali kag awtor nga taga-Australia: “Sa [akon] libro sugiran ko kamo kon ngaa kinahanglan ninyo ang madamo nga kuarta kag ikaduha kon paano ninyo matigayon ang madamo nga kuarta . . . Kon bag-uhon ninyo ang inyo pamensaron kag palambuon ang nagakaigo nga pagtamod sa kuarta, nagapati ako nga maagom ninyo ang pagpakamaayo kag kabuganaan gikan sa Dios kag indi na gid kamo magpanglaghap pa sing kuarta.”

Apang, ining pangangkon daw nagapahangop nga ang mga imol wala ginakahamut-an sang Dios. Ang materyal nga kabuganaan bala isa gid ka tanda sang pagpakamaayo sang Dios?

Ginpakamaayo Para sa Isa ka Katuyuan

May mga sitwasyon nga narekord sa Biblia diin ginpakamaayo sang Dios ang matutom nga mga alagad sing manggad. Halimbawa, si Jacob naghalin sa iya puluy-an nga may sungkod lang apang nagpauli 20 ka tuig sa ulihi nga may mga karnero, mga baka kag mga asno nga bastante sa duha ka kampo. Suno sa Biblia, ang kabuganaan ni Jacob isa ka dulot gikan sa Dios. (Genesis 32:10) Isa pa ka halimbawa: Nadula ni Job ang tanan niya nga mga pagkabutang, apang sang ulihi ginpakamaayo sia ni Jehova sing “napulog-apat ka libo nga karnero kag anom ka libo nga kamelyo kag isa ka libo nga pares sang baka kag isa ka libo nga asno nga babayi.” (Job 42:12) Ginhatagan ni Jehova si Hari Solomon sing daku gid nga manggad nga bantog gihapon tubtob sa karon.​​—⁠1 Hari 3:⁠13.

 Sa pihak nga bahin, may madamo nga rekord ang Biblia tuhoy sa matutom kag matinumanon nga mga sumilimba sang Dios nga mga imol. Pat-od gid nga ang Dios wala nagasilot sa pila sing kaimulon samtang nagapakamaayo naman sa iban sing kabuganaan. Ano, nian, ang katuyuan sang Dios sa paghatag sing manggad sa pila ka mga sitwasyon?

Ang sabat tuhay sa kada sitwasyon. Ang materyal nga mga manggad nga ginpanag-iyahan ni Jacob nangin pundasyon sa pagtukod sa isa ka pungsod, bilang preparasyon sa pag-abot sang ginsaad nga Binhi. (Genesis 22:​17, 18) Bangod sang kabuganaan ni Job, napat-od gid kon kay sin-o naghalin ang kalamidad nga natabo kay Job, gani napakabalaan ang ngalan ni Jehova. (Santiago 5:11) Kag gingamit ni Solomon ang kalabanan sang iya hatag-Dios nga manggad agod magpatindog sang isa ka matahom gid nga templo. (1 Hari 7:​47-​51) Sing talalupangdon, gingamit man ni Jehova si Solomon nga magsulat tuhoy sa limitado nga balor sang manggad pasad sa iya personal nga eksperiensia.​​—⁠Manugwali 2:​3-​11; 5:​10; 7:⁠12.

Kon Paano Kita Ginapakamaayo sang Dios

Gintudluan ni Jesus ang iya mga sumulunod nga maghupot sang husto nga pagtamod sa kuarta sang ginsilingan niya sila nga “mag-untat sa pagkabalaka” tuhoy sa pagpanag-iya sang mga butang. Nangatarungan sia sa ila nga bisan si Solomon sa bug-os niya nga himaya wala mapanaptan sing subong katahom sa panapot sang mga liryo sa latagon. Apang, si Jesus nagsiling: “Karon, kon ginapanaptan sang Dios sing subong ang mga tanom sa latagon, . . . indi bala magpapanapot sia sing labi pa sa inyo, kamo nga may diutay sing pagtuo?” Ginpasalig ni Jesus ang mga Cristiano nga kon pangitaon nila anay ang Ginharian kag ang pagkamatarong sang Dios, nian ang pagkaon, panapot, kag puluy-an idugang sa ila. (Mateo 6:​25, 28-​33) Paano natuman ina nga saad?

Kon sundon, ang laygay sang Biblia magaresulta labi na gid sa espirituwal nga mga pagpakamaayo. (Hulubaton 10:22) Apang, may iban pa ini nga kapuslanan. Halimbawa, ang Pulong sang Dios nagatudlo sa mga Cristiano: “Ang kawatan dili na magpangawat, kundi sa baylo magpangabudlay sia sing lakas.” (Efeso 4:28) Nagasiling man ini nga “ang nagapangabudlay nga may kamot nga matamad magaimol, apang ang kamot sang maukod magapamanggad sa isa.” (Hulubaton 10:4) Ang bunayag kag mapisan nga mga Cristiano nga nagasunod sa sining laygay masami mas nahamut-an nga mangin mga empleyado. Mahimo ini mangin isa ka pagpakamaayo.

Ginatudluan man sang Biblia ang mga Cristiano nga likawan ang makagod nga kalingawan sang pagsugal, ang nagadagta nga bisyo sang pagpanigarilyo, kag ang makahalalit sa lawas nga batasan sang pagpahubog. (1 Corinto 6:​9, 10; 2 Corinto 7:⁠1; Efeso 5:5) Mas manubo ang gasto sang mga nagatuman sining laygay kag nagaayo ang ila panglawason.

Mas Mahal Pa sa Pilak Ukon Bulawan

Apang, ang materyal nga kabuganaan indi masaligan subong ang lamang nga pamatuod sang kahamuot kag pagpakamaayo sang Dios. Halimbawa, ginbuyagyag ni Jesus ang imol nga kahimtangan sa espirituwal sang mga Cristiano sa Laodicea sang ginsilingan niya sila: “Nagasiling ka: ‘Manggaranon ako kag nagbugana ako kag wala nagakinahanglan sing bisan ano,’ apang wala ka makahibalo nga ikaw kailo kag makaluluoy kag imol kag bulag kag hubo.” (Bugna 3:17) Sa kabaliskaran, si Jesus nagsiling sa mga imol sa materyal apang mapagros sa espirituwal nga mga Cristiano sa Smirna: “Nahibaluan ko ang imo kapipit-an kag kaimulon​​—⁠apang manggaranon ka.” (Bugna 2:9) Ginhingabot ang mga Cristiano sa Smirna bangod sang ila katutom gani mahimo gid nga namigado sila, apang nagpanag-iya sila sing manggad nga mas mahal pa sa pilak ukon bulawan.​​—⁠Hulubaton 22:⁠1; Hebreo 10:34.

Ginapakamaayo ni Jehova nga Dios ang mga paghimakas sang mga nagahimo sang iya kabubut-on. (Salmo 1:​2, 3) Ginahatagan niya sila sing kusog kag ikasarang agod malandas ang mga pagtilaw, agod maaman ang mga kinahanglanon sang ila mga pamilya, kag agod pangitaon anay ang iya Ginharian. (Salmo 37:25; Mateo 6:​31-​33; Filipos 4:​12, 13) Gani, sa baylo nga tamdon ang materyal nga mga butang subong panguna nga pagpakamaayo sang Dios, ang matuod nga mga Cristiano nagatinguha nga “mangin manggaranon sa maayong mga buhat.” Paagi sa pagpalambo sing suod nga kaangtanan sa Manunuga, ang mga Cristiano “mahalungon nga nagatipon para sa ila kaugalingon sing maayo nga sadsaran para sa palaabuton.”​​—⁠1 Timoteo 6:​17-​19; Marcos 12:42-​44.