Magdiretso sa kaundan

Magdiretso sa listahan sang kaundan

Sang Maglupok ang Planta sang Kemikal

Sang Maglupok ang Planta sang Kemikal

 Sang Maglupok ang Planta sang Kemikal

SUNO SA MANUNULAT SANG MAGMATA! SA PRANSIA

SANG Septiembre 21, 2001, napulo ka adlaw lamang pagkatapos nga ginsalakay ang World Trade Center sa New York, ang daku nga aksidente nga paglupok sang isa ka planta sang kemikal naghalit sing daku sa guwa nga bahin sang siudad sang Toulouse, sa bagatnan-katundan sang Pransia. Ginlaragway ini sang Pranses nga pamantalaan nga Le Point subong “ang pinakagrabe nga kalamidad sa industriya sa Pransia sugod sang natapos ang Bug-os Kalibutan nga Inaway II.”

Mga 300 ka tonelada nga abono ang naglupok, nga nagbuho sing 50 metros ang diametro kalapad kag nagdalom sing 15 metros. Ang paglupok kag ang resulta sini nga init kag puwersa sang hangin nagpatay sing 30 ka tawo kag naghalit sing kapin sa 2,200. Mga 2,000 ka puluy-an ang nagkalaguba kag 27,000 pa ang nahalitan tubtob sa kalayuon nga 8 kilometros. Nagsinalasala ang mga tawo sa pagsigahom nga nagsalakay ang mga terorista kag nagsungaw ang makahililo nga gas gikan sa planta.

Madamo nga mga Saksi ni Jehova ang nasamaran kag madamo pa ang apektado sa iban nga mga paagi bangod sang paglupok. Ginpahulag sang Cristianong gugma ang kaupod nga mga Saksi nga magbulig gilayon. (Juan 13:​34, 35) Ang masunod isa ka panaysayon tuhoy sa mga panikasog sa pagbulig.

“Wala sing Nabilin nga Nagatindog sa Bilding”

Si Khoudir isa sang mga nagatrabaho sa planta sang kemikal nga nakalampuwas. Bangod sang paglupok kag sang nagalinupad nga mga kagulub-an nalipong sia, kag naglitik ang iya apipingig kag nagliw-as ang iya baliskog. Si Benjamin, nga nagatrabaho sa isa ka bilding sa tupad sang planta sang kemikal, nag-apok sing tatlo ka metro sa dingding sang opisina. Napilasan sia sa pila ka bahin sang iya lawas sang nagalinupad nga kristal kag may nagdulot sa iya tuo nga mata, nga naghalit sang iya panan-aw. “Maayo lang nga wala ako sa akon lamesa,” siling niya. “Mga 600 ka kilo nga mga tisa ang nagtupa sa akon siya.”

Si Alain, isa ka manunudlo sa isa ka eskwelahan nga 200 metros lang ang antad sa planta, nagaseroks sang natabo ang paglupok. Sia nagsiling: “Wala sing nabilin nga nagatindog sa bilding, mga kabilya lamang. Wala sing dingding, wala sing atop, wala gid. Naigo ako sing mga buong nga kristal. May mga pilas ako sa guya. Daw ginhan-usan ako sing parakol sa guya.” Nabulag ang isa ka mata ni Alain kag nahalitan ang iya palamatin-an bangod sang paglupok.

Madasig nga mga Panikasog sa Pagbulig

Sa gilayon, ginkontak sang mga gulang sa 11 ka kongregasyon sang mga Saksi ni Jehova nga apektado sang aksidente ang tagsa ka katapo sang kongregasyon agod hibaluon ang mga kahalitan. Gilayon nga ginpadala ang mga boluntaryo sa mga nagakinahanglan gid sang bulig. Wala madugayi nahibaluan sang mga boluntaryo nga mga 60 ka puluy-an sang mga Saksi ang naguba, kag nagbulig sila agod masaylo ang mga napulo ka pamilya. Nagbulig man ang mga boluntaryo sa pagkay-o sa duha ka naguba nga Kingdom Hall. Dugang pa, nagbulig man sila sa kon paano makatigayon sing mga benepisyo sa paseguro.

Sanday Catherine kag Michel nagapuyo sa tabok lamang sang planta. Nagamaneho si Catherine sang iya awto sang maglupok. Sia nagpaathag: “Sang primero nabatyagan namon nga daw nagalinog. Pagligad sang pila ka segundo, nakabati kami sing lupok. Dayon nakita namon ang aso nga nagatub-ok. Nagmaneho ako pakadto sa amon duog; kaangay ini sa isa ka patag-awayan. Ang tanan nga balay nagkalaguba, kag ang mga bintana sang balaligyaan nagkaladugmok. Ang mga tawo nagadinalagan sa kalye. Ang iban nagapungkuon ukon nagahigda sa dalan, nga nagahibi kag nagasinggitan. Sa balay, ang tanan namon nga bintana bisan gani ang mga hamba nagkalahuklab, kag wala sing nabilin nga puwertahan. Gilayon nga nag-abot ang amon Cristianong kauturan agod buligan kami. Pagkahapon isa ka grupo gikan sa kongregasyon  ang nag-abot nga may dala nga mga balde kag mga silhig pati na mga plastik nga pangsirado sa mga bintana.”

Sanday Alain kag Liliane nagapuyo man malapit sa planta. Bangod sang paglupok, bug-os nga naguba ang ila apartment. “Ang tanan nagkalaguba,” siling ni Alain. “Ang mga dingding kag tiles naglinitik, kag ang mga bintana, mga puwertahan, kag muwebles naguba tanan. Wala gid sing nabilin. Gilayon nga nag-abot ang amon Cristianong kauturan agod magbulig. Ginpanguha nila ang mga ginub-an kag nagbulig man sa pagpaninlo sa iban pa nga mga apartment sa bilding. Nakibot gid ang amon kaingod nga makita nga tuman kadamo ang nagkari agod magbulig.” Sang aga antes sang paglupok, nakabaton si Alain sing tawag sa telepono gikan sa isa ka ginatun-an niya sa Biblia nga nagapangabay sa iya nga magkadto agod magtuon sing Biblia. May ginkadtuan man si Liliane. Sa amo, wala sila nga duha sa balay sang natabo ang paglupok.

Indi lamang mga katapo sang kongregasyon ang ginbuligan sang mga Saksi. Pagkatapos magbinuligay sa isa kag isa, ginbuligan man nila ang ila mga kaingod, ginpanguha ang mga ginub-an sa mga apartment kag gintakpan ang naguba nga mga bintana. Nagpasalamat gid ang mga kaingod kag natingala sila nga wala sila ginpabayad.

Ginbuligan man ang lokal nga mga awtoridad, nga nahalawhaw gid sa kadakuon sang halit. Gintinluan sang mga Saksi ang mga eskwelahan kag ang iban pa nga publiko nga mga bilding. Sa isa ka duog, ginpadala sang lokal nga mga awtoridad ang mga boluntaryo nga Saksi sa mga balay agod hibaluon ang mga kinahanglanon sang mga tawo.

Paghatag sing Espirituwal nga Bulig

Dugang sa materyal nga bulig, madamo nga mga Saksi sa duog nga ginlukpan ang nagakinahanglan sing espirituwal nga bulig. Sa amo, ang nagalakbay nga mga manugtatap upod ang lokal nga mga gulang nagduaw sa tanan nga apektado sang kalamidad. Ini nga suporta ginpasalamatan gid. Si Catherine nagsiling: “Ang mga gulang nahiusa nga nagsakdag sa amon. Nagkari sila agod palig-unon kami. Sa katunayan, mas kinahanglan namon ini sangsa materyal nga bulig.”

Bangod sang Cristianong gugma nga ginpakita gilayon paagi sa mga buhat pagkatapos sining kalamidad, nagkomento sing talalupangdon ang pila ka tawo. Ang isa ka Saksi nga nasamaran sing malubha nagsiling: “Indi naton mahibaluan kon ano ang matabo buwas. Dapat padayon naton nga alagaron si Jehova subong nga daw amo na ini ang aton katapusan nga adlaw.” (Santiago 4:​13-​15) Ang isa pa ka Saksi naghinakop: “Ini tanan nagbulig sa amon nga marealisar nga indi kita dapat maghatag sing di-nagakaigo nga pagpabalor sa materyal nga mga butang. Ang importante gid amo nga bahin kita sang katawhan ni Jehova.”

[Retrato sa pahina 14]

Si Benjamin kag si Khoudir

[Retrato sa pahina 14]

Si Alain

[Retrato sa pahina 15]

Ang Toulouse pagkadason nga adlaw sa tapos sang paglupok

[Credit Line]

© LE SEGRETAIN PASCAL/CORBIS SYGMA

[Retrato sa pahina 15]

Si Alain kag si Liliane