Magdiretso sa kaundan

Magdiretso sa listahan sang kaundan

Pagpakita sing Gugma sa Tion sang Kasisit-an

Pagpakita sing Gugma sa Tion sang Kasisit-an

 Pagpakita sing Gugma sa Tion sang Kasisit-an

SUNO SA MANUNULAT SANG MAGMATA! SA NIGERIA

ANG Domingo, Enero 27, 2002, gintawag nga Black Sunday sa Lagos, Nigeria. Ang isa ka paglupok sa talaguan sing mga armas sa idalom sang duta nagpatay-ug sang bug-os nga siudad kag nagpasanag sang kalangitan sa kagab-ihon. Sa sulod sang pila ka oras, ang mga linupok nagpaulan sing mga bala sang kanyon kag mga kagulub-an tubtob sa kalayuon nga tatlo ka kilometro, nga gintunaan sang pagsalasala sa siudad.

Bangod sang mga hinuringhuring, nagdugang pa ang kahadlok. Nagdagsa ang ginakugmat nga mga tawo sa mga kalye, nga wala makahibalo kon ano ang ila ginapalagyuhan ukon diin sila mapakadto. Bangod madulom ang kagab-ihon, ginatos ka tawo, pati na ang madamo nga nagasalasala nga mga kabataan, ang nagdalagan pakadto sa malubog nga tubig sang daku nga kanal kag nagkalalumos. Bangod nagkalarumpag ukon nagkalaguba ang mga balay, eskwelahan, kag bilding sang negosyo, linibo ang nadulaan sing puluy-an kag trabaho. Ginbulubanta nga 1,000 ka tawo ang napatay sa trahedya. Sang ulihi nagdugang pa ang ginbulubanta nga kadamuon.

Mga 1,350 ka wala maglupok nga mga bomba, mga rocket, kag mga granada ang nakuha sang ulihi sa mga puluy-an sa palibot sang kampo sang militar diin natabo ang paglupok. Nakakita ang isa ka tawo sing metal nga butang sa iya sala. Wala makahibalo nga bomba ini, ginpulot niya ini, ginbutang sa likod sang iya salakyan, kag gin-uli ini sa mga awtoridad.

Sang nabalitaan ini nga paglupok, gilayon nga ginkontak sang sanga talatapan sang mga Saksi ni Jehova sa Nigeria ang isa ka gulang sa Lagos kag ginhatagan sing instruksion ang 16 ka nagalakbay nga manugtatap sa amo nga duog nga hibaluon ang kahimtangan sang 36,000 ka Saksi sa Lagos. Nagpadala ang sanga sing isa ka milyon nga naira (mga $10,000 U.S.), lakip ang instruksion nga magporma sila sing komite sa pagbulig.

 Sa mga Saksi, isa ka lalaki ang nahalitan sing malubha sang bomba; sing makapasubo, duha ka lamharon nga babayi ang napatay; kag naguba ang duha ka Kingdom Hall kag ang mga balay sang 45 ka pamilya.

Anom ka adlaw pagkatapos sang mga paglupok sa talaguan sing mga armas, sang Pebrero 2, 2002, nagdabdab ang inaway sa ulot sang mga etniko sa lain nga bahin sang siudad. Suno sa Red Cross, 100 ka tawo ang napatay sa inaway, 430 ang nasamaran, kag 3,000 ang napilitan sa pagbiya sa ila puluy-an, kag 50 ka balay ang nasunog. Ginpangita gilayon sang komite sa pagbulig nga amo ang nagaatipan sa mga kinahanglanon sang mga biktima sang “Black Sunday” ang ila Cristianong mga kauturan sa sini nga duog.

Wala sing napatay nga mga Saksi sa sining tion, bangod ang kalabanan sa ila nagtambong sa isa ka sirkito nga asambleya sang nagsugod ang inaway. Apang, madamo nga katapo sang lima ka kongregasyon sa amo nga duog ang wala na sing balay nga mapulian. Handa nga ginpadayon sila sang ila Cristianong mga kauturan sa ila puluy-an. Ang isa ka Saksi nga doktor kag ang iya asawa naghatag sing dalayunan sa 27 nga nadulaan sing puluy-an.

Ang mga Saksi sa Lagos nga wala maapektuhan sang mga paglupok kag sang inaway sang mga etniko maalwan nga naghatag sing mga pagkaon, panapton, kag mga gamit sa balay. Ang manugtatap sa siudad nagreport: “Ang mga gin-amot sang mga kauturan sa Lagos sobra pa sa kinahanglan sang mga nahalitan.” Ginsulatan sang sanga talatapan ang mga kongregasyon nga untaton na ang pagpadala sing mga kontribusyon. Tatlo ka trak sang sobra nga mga butang ang ginpadala sa sanga talatapan agod taguon.

Ginduaw sang mga gulang sang kongregasyon ang madamo nga biktima kag ang namatyan nga mga pamilya. Ginpanikasugan nila nga makahatag sing lugpay gikan sa Kasulatan. Gin-organisar sang komite sa pagbulig ang pagkay-o sa mga balay nga naguba. Ginhatagan nila ang mga biktima sang duha ka kalamidad sing mga gamit sa balay, panapton, kag kalan-on kag ginbuligan ang mga nadulaan sing puluy-an nga makakita sing mga dalayunan. May kabug-usan nga 90 ka pamilya kag mga indibiduwal ang nabuligan sang komite.

Madamo nga biktima ang nalipay gid sa bulig nga nabaton nila. Ang isa ka Saksi nagtuaw sa komite sa pagbulig: “Tubtob buhi ako, himuon ko si Jehova nga akon ‘dalangpan kag kusog’!”—Salmo 46:​1, 2.

Natalupangdan sang mga indi Saksi ang pag-ulikid sang mga Saksi ni Jehova sa isa kag isa sa tion sining mga krisis. Ang tiyo sang isa sa mga Saksi nga napatay nagsiling sa mga gulang sa kongregasyon sang Saksi: “Mabalik ako agod pasalamatan gid kamo kag magtuon sing dugang pa.” Sa iya pamilya nagsiling sia: “Makatilingala gid ang nakita ko sa Lagos. Bisan ang mga paryente wala maghimo sang ginhimo sini nga mga tawo.”

[Retrato sa pahina 13]

Trak nga puno sing mga butang nga inugbulig

[Retrato sa pahina 13]

Ang pila nga nabuligan

[Retrato sa pahina 14]

Ini nga mag-asawa naghatag sing dalayunan sa 27 ka tawo nga nadulaan sing puluy-an

[Retrato sa pahina 14]

Mga Saksi nga nagakay-o sang naguba nga balay

[Picture Credit Line sa pahina 13]

Top: Sam Olusegun - The Guardian