Magdiretso sa kaundan

Magdiretso sa listahan sang kaundan

Nahilway Gikan sa Gapos sang Dumot

Nahilway Gikan sa Gapos sang Dumot

 Nahilway Gikan sa Gapos sang Dumot

PANUGIRON NI JOSÉ GOMEZ

NATAWO ako sang Septiembre 8, 1964, sa Rognac, isa ka magamay nga banwa sa bagatnan sang Pransia. Ang akon mga ginikanan kag mga lolo kag lola taga-Andalusia nga mga Gypsy, nga natawo sa Algeria kag Morocco, sa Aminhan nga Aprika. Subong kinaandan sa kultura sang mga Gypsy, nangin daku kami nga pamilya bangod isa lang kami ka balay sang amon malapit nga mga paryente.

Ang akon amay masingki nga tawo, kag madumduman ko pa ang pagsakit niya sa akon iloy sang bata pa ako. Sang ulihi, gindiborsiohan sia sang akon iloy​—⁠butang nga talagsa lang nagakatabo sa mga Gypsy. Gindala ni Nanay ang akon manghod nga lalaki, ang akon magulang nga babayi, kag ako sa Belgium, diin nagpuyo kami sing malinong sa sulod sang walo ka tuig.

Apang, nagbag-o ang kahimtangan. Luyag namon makita ang amon amay, gani gindala kami ni Nanay sa Pransia kag nagpuyo liwat upod sa akon amay. Ang pagpuyo liwat upod sa akon amay naghatag sing mga hangkat sa akon. Sa Belgium, pirme kami nagaupod-upod kay Nanay bisan diin. Apang sa partido sang akon amay, ang mga lalaki dapat makig-upod sa mga lalaki. Ang ila pagtamod sa pagka-macho amo nga ang mga lalaki may kinamatarong pirme kag ang mga babayi amo dapat ang magtrabaho. Isa ka adlaw, halimbawa, sang luyag ko buligan ang akon tiya sa paghimos sang lamesa kag sa paghugas sang mga pinggan pagkatapos sang kaon, ginsilingan ako sang akon tiyo nga agi kuno ako. Sa iya pamilya, ang paghugas sa mga pinggan obra lamang sang mga babayi. Sang ulihi, ining di-timbang nga panghunahuna nag-impluwensia man sa akon.

Wala madugayi kag nabiktima liwat ang akon iloy sang kasingki ni Tatay. Pila ka beses nga sang nagtinguha kami nga magtambag, nagpalagyo kami sang akon utod nga lalaki nga nagaagi sa bintana agod likawan ang mga sumbag ni Tatay. Amo man sini ang natabo sa akon magulang nga babayi. Bangod sini, wala ako nagatener sa balay. Sa edad nga 15 anyos, wala sing direksion ang akon kabuhi.

Sang ulihi, nakilal-an ako tungod sa akon kasingki. Nalipay ako sa pagpangdaugdaug sa iban. Kon kaisa hungod ko nga ginagaritgarit ang iban nga mga pamatan-on nga lalaki, apang pila lamang ang nagasupok sa akon​—⁠ilabi na bangod pirme ako may dala nga lansitas ukon kadena. Sang ulihi nagpangawat ako sing mga awto kag ginbaligya ini. Kon kaisa ginasunog ko lang ini kag nasadyahan ako sa pagtan-aw sa mga bombero nga nagapatay sang kalayo. Sang ulihi ginransak ko ang mga balaligyaan kag mga bodega. Pila ka beses nga gindakop ako. Kag kada madakpan ako, nagapangayo ako sing bulig sa Dios sa pangamuyo!

Huo, nagapati ako sa Dios. Sang sa Belgium pa kami, nag-eskwela ako sa relihioso nga eskwelahan. Gani nahibaluan ko nga malain ang akon ginahimo. Apang, wala sing epekto ang akon pagtuo sa Dios sa akon paggawi. Abi ko anay dapat lang ako magpangayo sing patawad sa Dios kag mapatawad na ang akon mga sala.

Sang 1984, ginpamatbatan ako sing 11 ka bulan nga pagkabilanggo bangod sang pagpangawat. Ginbilanggo  ako sa Baumettes Prison, sa Marseilles. Ginpapikahan ko didto ang nagkalainlain nga bahin sang akon lawas. Ang isa ka pika mabasa nga “dumot kag pagtimalos.” Sa baylo nga magbag-o sa bilangguan, nagtudok pa gid ang akon dumot sa awtoridad kag sa katilingban sa kabilugan. Sang makaguwa ako, sa tapos mabilanggo sing tatlo lamang ka bulan, labi pa gid nga napun-an ako sing dumot. Nian, isa ka trahedya ang nagpabag-o sa dalanon sang akon kabuhi.

Nangin Tulumuron Ko ang Pagtimalos

Nag-away ang amon pamilya kag ang isa pa ka Gypsy nga pamilya. Namat-od kami sang akon mga tiyo nga makighusay sa ila. Lunsay may mga armas ang duha ka pamilya. Sa pagsinabtanay, si Tiyoy Pierre kag ang pakaduha ni Tatay gintiro kag napatay. Naakig gid ako amo nga nagtindog ako sa kalye, nga nagauyat sing pusil, kag nagsinggitan sa kasingkal. Sang ulihi gin-agaw sang isa ko pa ka tiyo ang pusil sa akon.

Ginkasubo ko gid ang pagkapatay ni Tiyoy Pierre, nga ginkabig ko subong amay. Naglalaw ako suno sa kinabatasan sang mga Gypsy. Sa sulod sang madamo nga adlaw, wala ako magpamarbas ukon magkaon sing karne. Wala ako magtan-aw sing telebisyon ukon magpamati sing musika. Nanumpa ako nga itimalos ang kamatayon sang akon tiyo, apang ginpunggan ako sang akon mga paryente nga makakuha sing pusil.

Sang Agosto 1984, nagsugod ako sa pag-alagad sa militar. Sa edad nga 20 anyos, nagpalista ako sa nagahupot sing paghidait nga puwersa sang Nasyones Unidas sa Lebanon. Ginbaton ko ang risgo nga magpatay ukon mapatay. Sadto nga tion, nagamarijuana ako. Luwas nga nagaayo ang akon pamatyag sa sini nga droga, nagbatyag man ako nga wala sing makahalit sa akon.

Mahapos makatigayon sing armas sa Lebanon, gani namat-od ako nga magpadala sing mga armas sa Pransia agod padayunon ang akon plano nga itimalos ang akon tiyo. Nagbakal ako sing duha ka pistola kag mga bala gikan sa lokal nga mga pumuluyo. Ginbungkag ko ang mga pusil, gintago ini sa duha ka radyo, kag ginpadala ini sa balay.

Duha ka semana na lang antes matapos ang akon pag-alagad sa militar, nag-awol kami sang akon tatlo ka kaupod. Sang nagbalik kami sa kuwartel, ginpriso kami. Sang yara ako sa prisuhan, nagsingkal gid ako kag gin-atake ko ang isa ka guardia. Indi ko gid mabaton nga pakanubuon ako sang isa ka payo​—⁠isa ka indi Gypsy. Pagkasunod nga adlaw, nakig-away ako liwat, sini nga tion sa isa ka opisyal. Ginpadala ako sa Montluc Prison, sa Lyons, para sa nabilin nga bahin sang akon pag-alagad sa militar.

Nakasapo Ako sing Kahilwayan​—⁠Sa Prisuhan

Sa una nga adlaw ko sa Montluc Prison, mainabyanon nga gintamyaw ako sang isa ka malipayon nga pamatan-on nga lalaki. Nahibal-an ko nga isa sia sang mga Saksi ni Jehova kag nabilanggo sia kag ang iban pa nga karelihion niya bangod lamang nga indi sila mag-uyat sing mga armas. Nagpalibog yadto sa akon. Luyag ko makatuon sing dugang pa.

Nakita ko nga ang mga Saksi ni Jehova may tunay nga gugma sa Dios, kag nagdayaw ako sa ila mataas nga mga talaksan sa moral. Apang, madamo ako sing mga pamangkot. Ilabi na nga luyag ko mahibaluan kon bala makapakig-angot ang mga patay sa mga buhi paagi sa mga damgo​—⁠butang nga ginapatihan sang madamo nga mga Gypsy. Gintanyagan ako ni Jean-Paul, nga isa ka Saksi, sing pagtuon sa Biblia, nga ginagamit ang libro nga Mahimu Ka Mabuhi Sing Dayon sa Paraiso sa Duta.⁠ *

Malangkagon nga ginbasa ko ang libro sa isa ka gab-i, kag natandog gid ang akon tagipusuon sa akon nabasahan. Diri sa prisuhan, nasapwan ko ang matuod nga kahilwayan! Sang makaguwa ako sa prisuhan, nagsakay ako sa tren pauli, kag ang akon bag puno sing mga publikasyon sa Biblia.

Agod makontak ang mga Saksi sa amon lugar, nagkadto ako sa Kingdom Hall sa Martigues. Ginpadayon ko ang pagtuon sa Biblia, sa bulig karon sang isa ka lamharon nga bug-os tion nga ministro nga si Eric. Sa sulod sang pila ka adlaw, nag-untat ako sa pagpanigarilyo, kag wala na ako makigkita sa mga kaupod ko anay sa paghimo sing krimen. Determinado ako nga sundon ang Hulubaton 27:​11, nga nagasiling: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.” Nakita ko kay Jehova ang isa ka mahigugmaon nga Amay nga luyag ko pahamut-an.

Ang Hangkat nga Magbag-o

Indi mahapos para sa akon ang pag-aplikar sing Cristianong mga  prinsipio. Halimbawa, nagdroga ako liwat sa sulod sang pila ka semana. Apang ang pinakamabudlay nga hangkat para sa akon amo ang pagdula sa handum nga magtimalos. Likom kay Eric, nagadala ako pirme sing pusil kag nagabuko gihapon nga magtimalos sa mga nagpatay sa akon tiyo. Naghinguyang ako sing bug-os nga mga gab-i sa pagpangita sa ila.

Sang ginsugid ko ini kay Eric, ginpaathag niya sa akon nga indi ko matigayon ang maayo nga kaangtanan sa Dios kon may mga armas ako kag nagatinguha nga magtimalos. Dapat ako magdesisyon. Ginpamalandungan ko sing maayo ang laygay ni apostol Pablo sa Roma 12:19: “Dili kamo magtimalos, mga hinigugma, kundi pabayai ang kasingkal.” Ini, kag upod ang hanuot nga pangamuyo ang nakabulig sa akon agod makontrol ang akon balatyagon. (Salmo 55:22) Sang ulihi, wala na ako maghupot sing mga armas. Sang Disiembre 26, 1986, sa tapos makatuon sa Biblia sa sulod sang isa ka tuig, ginsimbuluhan ko ang akon dedikasyon kay Jehova nga Dios paagi sa pagpabawtismo sa tubig.

Ang Maayo nga Reaksion sang Akon Pamilya

Ang mga pagbag-o sa akon paggawi nagpalig-on sa akon mga ginikanan nga magtuon man sa Biblia. Nagpakasal sila liwat, kag nagpabawtismo ang akon iloy sang Hulyo 1989. Sang ulihi, pila pa ka katapo sang akon pamilya ang nagbaton sang mensahe sang Biblia kag nangin mga Saksi ni Jehova.

Sang Agosto 1988, namat-od ako nga mangin isa ka bug-os tion nga ministro. Nian naghigugma ako kay Katia, isa ka lamharon nga utod nga babayi sa amon kongregasyon. Nagpakasal kami sang Hunyo 10, 1989. Indi mahapos ang amon una nga tuig sang pag-asawahay, kay dapat ko pa bag-uhon ang akon panimuot sa mga babayi. Nabudlayan ako sa pag-aplikar sang mga pulong sang 1 Pedro 3:⁠7, nga nagapalig-on sa mga bana nga padunggan ang ila asawa. Sulit-sulit nga nagapangamuyo ako sing kusog nga tunlon ang akon bugal kag bag-uhon ang akon panghunahuna. Amat-amat nga nag-ayo ang kahimtangan.

Masakit gihapon para sa akon ang kamatayon sang akon tiyo, kag kon kaisa indi ko mapunggan nga maghibi kon madumduman ko sia. Ginapakigbatuan ko ang mabaskog nga emosyon kon madumduman ko kon paano sia ginpatay. Sa sulod sang mga tuig, bisan sa tapos ako mabawtismuhan, nahangawa ako nga basi masumalang ko ang mga miembro sang pamilya nga nakaaway namon anay. Ano ang himuon ko kon salakayon nila ako? Mangin ano ang akon reaksion? Mangibabaw bala ang akon daan nga personalidad?

Isa ka adlaw naghatag ako sing pamulongpulong publiko sa malapit nga kongregasyon. Nakita ko didto si Pepa, nga paryente sang mga lalaki nga nagpatay sa akon tiyo. Ginaako ko nga sang makita ko sia, natilawan ang matuod nga kalidad sang akon Cristianong personalidad. Apang ginkalimtan ko ang akon balatyagon. Sang ulihi, sang adlaw nga nagpabawtismo si Pepa, ginhakos ko sia kag ginpanginbulahan sa desisyon niya nga alagdon si Jehova. Walay sapayan sang tanan nga natabo, ginbaton ko sia subong akon espirituwal nga utod nga babayi.

Adlaw-adlaw, ginapasalamatan ko si Jehova nga ginbuligan niya ako nga mahilway gikan sa mga gapos sang dumot. Diin na ayhan ako karon kon wala ang kaluoy ni Jehova? Bangod sa iya, natigayon ko ang isa ka malipayon nga pamilya. May paglaum man ako sa palaabuton​—⁠isa ka bag-o nga kalibutan nga wala sing dumot kag kasingki. Huo, nagasalig gid ako nga ang saad sang Dios matuman: “Magalingkod sila, ang tagsatagsa sa idalom sang iya puno sang ubas kag sa idalom sang iya kahoy nga higuera, kag wala sing magapakurog sa ila; kay ang baba mismo ni Jehova sang mga kasuldadusan ang nagpamulong sini.”​—⁠Miqueas 4:4.

[Nota]

^ par. 18 Ginbalhag sang mga Saksi ni Jehova.

[Retrato sa pahina 19]

Upod sa nagahupot sing paghidait nga puwersa sang Nasyones Unidas sa Lebanon, 1985

[Retrato sa pahina 20]

Upod kay Katia kag sa akon mga anak, si Timeo kag si Pierre