Magdiretso sa kaundan

Magdiretso sa listahan sang kaundan

Ano Kon Makita Ako sang Akon Kabutho?

Ano Kon Makita Ako sang Akon Kabutho?

 Pamangkot sang mga Pamatan-on . . .

Ano Kon Makita Ako sang Akon Kabutho?

“Ang mag-eskwela kon Lunes isa ka pagpaantos. Kon may isa sang akon mga abyan ang nakakita nga nagbantala ako, nagahimo-himo ako sing mga istorya. Halimbawa, ginasugiran ko ang akon mga abyan nga nagapangolekta ako sang kuwarta sang isa ka Labor Party .”​—⁠James, Inglaterra.

“Sa eskwelahan ginayaguta ako sang mga kabutho nga nakakita sa akon. Nabatyagan ko ang sobra nga pag-ipit.”​—⁠Débora, Brazil.

NGAA ining mga pamatan-on nahadlok gid nga makita sang ila mga abyan? Ilegal bala ang ila ginahimo? Sa kabaliskaran, ginahimo nila ang pinakadungganon kag labing importante nga hilikuton sa duta karon. Ginatuman nila ang hilikuton nga ginsugo ni Jesus sang sia magsiling: “Busa lakat kamo kag maghimo sing mga disipulo sa mga tawo sa tanan nga kapungsuran, . . . nagatudlo sa ila nga tumanon ang tanan nga butang nga ginsugo ko sa inyo.”​—Mateo 28:19,  20.

Suno sa surbe sang Gallup sa Estados Unidos, sobra sa 90 porsiento sang mga pamatan-on ang nagapati sa Dios. Mga tunga ang nagasimba kada semana. Kag samtang madamo nga pamatan-on ang nagabuylog sa mga hilikuton nga ginasakdag sang simbahan, katulad sang pagkanta sa koro, diutay lamang ang nagapakighambal tuhoy sa Dios sa ila mga kabutho. Apang, ang mga Saksi ni Jehova bantog sa bug-os nga kalibutan sa ila pamalaybalay nga pagbantala. Linibo sang pamatan-on nga Saksi ang nagapakigbahin sa sini nga hilikuton.

Kon ikaw isa ka pamatan-on nga Saksi, pat-od gid nga nagapakigbahin na ikaw sa sining pagbantala nga hilikuton. Apang indi pirme mahapos ang paghimo mo sini. Katulad sang pamatan-on nga ginkutlo sa primero, mahimo nga indi ka mahim-os nga basi masugata ang kabutho sa pagpamalaybalay. “Makahuluya gid,” baton ni Jennie nga isa ka lin-ay sa Britanya, “kon makita ako sang akon kabutho nga nagapalda, nagabitbit sang bag​—nga mas pormal ang pamayo sangsa amon eskwelahan.”

Ang kahadlok nga masugata ang kabutho tuman gid kabaskog amo nga ang iban nga Cristianong pamatan-on nangita sing padihot. Si Leon nga isa ka pamatan-on nagsiling: “May kilala ako nga isa ka pamatan-on nga Saksi nga nagasuksok sang dyaket nga may kalo-kalo samtang nagabantala, agod nga makapanabon kon masugata niya ang mga abyan  sa eskwelahan.” Apang, ang iban naman nga pamatan-on nagalikaw gid sa pagbantala sa ila palibot. “Nadumduman ko nga nangamuyo ako nga kuntani indi kami magbantala sa isa ka partikular nga kalye,” hinumdom ni Simon nga isa ka pamatan-on, “bangod nakahibalo ako nga madamo ako sing kabutho nga nagapuyo didto.”

Normal lang ang magbatyag nga daw indi mahim-os kon may masugata nga imo kilala samtang nagabantala. Apang kon tugutan mo ang kahadlok nga magkontrol sa imo, magahalit lamang ini sa imo. “May malain ako nga panimuot sa pagbantala,” baton ni Alicia nga isa ka lin-ay sa Alemanya, “amo kon ngaa may negatibo ini nga epekto sa akon espirituwalidad.”

Ti, ngaa abi dapat gid ikaw magbantala​—ilabi na kon nabudlayan ka sa paghimo sini? Sa pagsabat, binagbinagon naton kon ngaa gintugyan ini sang Dios nga obligasyon sa imo. Dayon ipakita namon sa imo kon paano, upod ang panikasog kag determinasyon, mangin posible para sa imo nga malandas ang imo kahadlok.

Ang Obligasyon sa Pagbantala

Una sa tanan, magabulig ini sa imo nga binagbinagon ang katunayan nga indi bag-o ukon tumalagsahon ang pagpaambit sang imo pagtuo sa iban. Sugod pa sa dumaan nga panahon, ginhimo na ini sang mahinadlukon sa Dios nga mga lalaki kag mga babayi. Halimbawa, si Noe nabantugan nga amo ang naghimo sang daku nga arka. (Genesis 6:​14-​16) Apang suno sa 2 Pedro 2:5, isa man sia ka “manugbantala sang pagkamatarong.” Ginbatyag ni Noe nga obligado sia sa pagpaandam sa iban sa magaabot nga kalaglagan.​—Mateo 24:37-​39.

Sang ulihi, bisan pa ang mga Judiyo wala ginhatagan sing espesipiko nga mga sugo nga magbantala sa mga di-Judiyo, madamo ang nagpaambit sang ila pagtuo sa iban. Gani, ang dumuluong nga si Rut nakatuon tuhoy kay Jehova. Nagapasalamat sa iya Judiyo nga ugangan-nga-babayi, si Noemi, si Rut nagsiling sa iya: “Ang imo katawhan mangin akon katawhan, kag ang imo Dios akon Dios.” (Rut 1:​16) Sang ulihi, ginpakita ni Hari Solomon nga madamo sang di-Judiyo ang nagkadto sa pagpamati sang “dakung ngalan” ni Jehova kag nagsimba sa Iya templo.​—1 Hari 8:​41, 42.

Kon ining dumaan nga mga alagad sang Dios nagbantala sa iban​—bisan pa wala sing direkta nga sugo nga himuon ini​—mas labi na gid karon nga ang mga Cristiano dapat magabatyag nga obligado sa pagbantala! Ti, ginsugo kita nga ibantala “ining maayong balita sang ginharian.” (Mateo 24:14) Katulad kita kay apostol Pablo, nga ang kinahanglanon gintugyan sa aton nga ipahayag ining maayong balita. (1 Corinto 9:​16) Nataya ang aton mismo kaluwasan. Ang Roma 10:​9, 10 nagasiling: “Kon ibantala mo sing dayag inang ‘pulong sa imo kaugalingon nga baba’ nga si Jesus Ginuo, . . . maluwas ka. Kay paagi sa tagipusuon ang isa nagatuo para sa pagkamatarong, apang paagi sa baba ang isa nagapahayag sing dayag para sa kaluwasan.”

Sa diin ikaw ‘makapahayag sing dayag’? Bisan ang di-pormal nga pagpanaksi may nagakaigo nga duog, ang pamalaybalay nga ministeryo amo gihapon ang pinakaepektibo nga paagi sa paglab-ot sa iban. (Binuhatan 5:​42; 20:20) Indi ka bala obligado sa pagpaambit sining hilikuton bangod kay pamatan-on ka? Obligado gid. Ginhatag ini sang Biblia nga sugo sa Salmo 148:12, 13: “Kamo nga mga pamatan-on nga lalaki kag kamo man nga mga ulay, kamo nga mga tigulang nga lalaki pati na ang mga bata nga lalaki. Magdayaw sila sang ngalan ni Jehova.”

Ang Hangkat sa Pagbantala sa mga Katubotubo

Matuod, daw makahuluya kag makatulublag nga masugata ang kabutho samtang nagapamalaybalay. Kon sa bagay, natural lamang ina nga luyag mo nga batunon ka sang iban. Wala sing isa ang luyag sunlugon, insultuhon, ukon pakahuy-an. Subong sang ginpaathag sang lin-ay nga si Tanya, “ang mga kabataan sa eskwelahan mahimo nga mangin masyado kapintas!” Gani mahanduraw mo gid kon ano ang reaksion sang imo mga kabutho kon makita ka nila nga nagabayo sing pormal kag nagauyat sang Biblia. Sing makapasubo, mahimo yagutaon ka gid nila. “May kaklase ako nga nagapuyo man sa building nga ginaistaran namon,” hinumdom ni Felipe nga pamatan-on sa Brazil. “Nagasiling sia, ‘Biblia naman liwat ang dala mo! Ano na ang unod sang bag mo man?’ ”

Indi basta-basta nga sunlugon ikaw. Ang Biblia nagasugid sa aton nga si Isaac, ang anak ni Abraham, nakaagom sang makaulugot nga pagyaguta sang iya utod sa amay, nga si Ismael. (Genesis 21:9) Wala ginpakadiutay ni apostol Pablo ini nga pagmaltratar.  Sa Galacia 4:​29, husto nga gintawag ini sang apostol nga ‘paghingabot.’

Sing kaanggid, nagpaandam si Jesus nga ang pila ka tawo mangin mapintas sa iya mga sumulunod. Nagsiling sia: “Kon ang kalibutan nagadumot sa inyo, nahibaluan ninyo nga nagdumot ini sa akon sing una sa inyo. Kon kamo bahin sang kalibutan, kahamut-an sang kalibutan ang iya kaugalingon. Karon bangod kamo indi bahin sang kalibutan, kundi ginpili kamo sa kalibutan, sa sining kabangdanan ang kalibutan nagadumot sa inyo.”​—Juan 15:18, 19.

Nian, subong Cristiano, dapat ikaw mangin handa nga magbatas sang pila ka paghingabot. (2 Timoteo 3:​12) Bisan pa indi ka maghambal sang isa ka tinaga tuhoy sa Biblia sa imo mga katubotubo, hingabuton gihapon ikaw sang iban bangod ginahuptan mo ang mataas nga mga talaksan sang pagginawi kag wala nagapakigbahin sa ila malain nga paggawi. (1 Pedro 4:4) Apang, ginahatag ni Jesus ining makapaumpaw nga mga pulong: “Malipayon kamo kon ang mga tawo magpasipala sa inyo kag maghingabot sa inyo kag binutig nga maghambal sing tanan nga sahi sang malaut nga butang batok sa inyo tungod sa akon.” (Mateo 5:​11) Paano ikaw mangin malipayon samtang ginasunlog ukon ginainsultuhan? Bangod nahibaluan mo nga ginapahalipay mo ang tagipusuon ni Jehova! (Hulubaton 27:11) Kag paagi sa pagpahamuot sa Dios, matigayon mo mismo ang padya nga kabuhi nga walay katapusan!​—Lucas 10:25-28.

Maayo na lang, mahimo nga indi tanan ukon kalabanan sang imo kabutho ang magyaguta sa imo kon masugata mo sila sa ministeryo. Si Angela nga isa ka lin-ay sa Britanya nagapahanumdom sa aton: “Kon masugata mo ang isa ka kabutho samtang nagapamalaybalay, masami nga mas nahuya sila sangsa imo!” Sa pagkamatuod, ang iban daw nalangkag pa gani kon ano ang ihambal mo. Bisan diin man sini, madamo nga Cristianong pamatan-on ang nagmadinalag-on sa pagpanaksi sa ila mga kabutho. Ang amon masunod nga artikulo sa sining serye magabinagbinag sang pila ka paagi kon paano mo man ini himuon.

[Retrato sa pahina 25]

Madamo nga pamatan-on ang nahadlok nga makasugata sang ila kabutho samtang nagaministeryo

[Retrato sa pahina 27]

Indi gid pagtuguti nga ikahuya mo ang imo pagtuo bangod sang pagsunlog