Magdiretso sa kaundan

Magdiretso sa listahan sang kaundan

Ang Pagtilawtilaw sa Okulto—Ano ang Halit?

Ang Pagtilawtilaw sa Okulto—Ano ang Halit?

 Pamangkot sang mga Pamatan-on . . .

Ang Pagtilawtilaw sa Okulto​​—⁠Ano ang Halit?

INTERESADO gid bala ang mga tin-edyer sa okulto? Ang hubon sang mga manugpanalawsaw nagtinguha sa pagsabat sini paagi sa pagsurbe sa 115 ka estudyante halin sa ikalima nga grado tubtob sa hayskul. Ginpakita sang surbe ining nagapahangop nga estadistika: Kapin sa katunga sang mga ginsurbe nga mga estudyante (54 porsiento) ang nagsiling nga interesado sila sa okulto kag sa labaw-sa-kinaugali, samtang ikap-at nga bahin (26 porsiento) ang nagsiling nga “interesado gid” sila.

Ang mga manugpanalawsaw sang University of Alaska sa Anchorage nagsulat: “Ang mga balita sa mga pamantalaan kag mga magasin tuhoy sa ginapatihan nga daku nga paglapnag sang hilikuton sang sataniko nga kulto . . . nagdugang sa sining karon lang nga mga tinuig.” Nagsiling ang mga eksperto nga halos wala sing mabakod nga ebidensia nga nagasakdag sa mga pangangkon tuhoy sa nagalapnag nga Satanismo sa tunga sang mga pamatan-on. Bisan pa amo sina, wala sing pangduhaduha nga madamo sang mga pamatan-on ang interesado sa mga aspekto sang Satanismo kag sang okulto, bisan pa ini nga interes umalagi lamang.

Sa amo, ang pila ka pamatan-on mahimo mamangkot, ‘Ano ang halit sa pagtilawtilaw sa okulto?’ Sa pagsabat sini, tan-awon naton ang pila ka paagi nga nadalahig ang mga pamatan-on sa okulto.

Ang Pagbuyok sang Okulto

Ang artikulo sa U.S. News & World Report nagsiling nga ang “kabataan kag mga tin-edyer sa karon makatan-aw kag napadayag sa makalilibog​​—⁠masami makatulublag​​—⁠nga madamo kaayo nga larawan kag impormasyon nga indi mahanduraw bisan sang nagligad nga 20 ka tuig.” Ang pagkamausisaon nagtiklod sa madamo nga pamatan-on nga magbasa sing mga libro kag mga magasin, magtan-aw sing mga video, ukon magtan-aw sa mga Web site sa Internet nga nagapakita sing okulto.

Suno sa BBC News Online, ang bantog nga mga programa sa TV nga nagapakita sang mga aswang kag mga bampira “ginasiling nga nagapukaw sang interes sa pangaswang sa tunga sang mga kabataan.” Ang pila ka heavy-metal nga musika nagapakita man sing masingki ukon demonyohanon nga mga ideya. Ang kolumnista nga si Tom Harpur nagsulat sa pamantalaan nga The Sunday Star sa Toronto: “Dapat maghatag ako sing mabaskog gid nga paandam tuhoy sa nagakalatabo [sa musika]. . . . Wala pa gid ako makakita sing tuman kalain pa sangsa sini. Ang mga ambahanon puno sing kabuangan, pagkakontrolado sing malaut nga espiritu, mga demonyo, mga pagpatulo sing dugo, mga pamuyayaw, tanan nga sahi sang kasingki, pati na ang panglugos, paghalit sa kaugalingon, pagpatay, kag paghikog. Kamatayon kag kalaglagan, mga tagna sa paghukom, pagsikway sa tanan nga maayo kag pagbaton sa tanan nga kalangil-aran kag malaut​​—⁠amo ini ang ila mga topiko.”

Ang pagpamati bala sa sini nga musika nagadul-ong gid sa makahalalit nga paggawi? Maathag nga nagaresulta ini sa makahalalit nga paggawi sa  di-magkubos isa ka kaso​​—⁠ang iya sang 14 anyos nga pamatan-on sa Estados Unidos nga nagbuno sa iya iloy tubtob mapatay ini kag naghikog man sia. Kay man, ang mga dingding sang iya hulot puno sing mga poster sang heavy-metal rock nga mga musikero. Pagkatapos sini, ang iya amay nakitluoy: “Hambali ang mga ginikanan nga bantayan ang musika nga ginapamatian sang ila mga anak.” Nagsiling sia nga sang semana antes ginpatay sang iya anak ang iya iloy, pirme niya ginakanta ang rock “nahanungod sa dugo kag pagpatay sa imo iloy.”

Nian may mga hampang nga may ginailog nga mga karakter, ang pila sini nagatugot sa mga pumalasakop nga ilugon ang papel sang mga manugbabaylan kag sang iban pa nga mga tawo sa okulto. Madamo sini nga mga hampang ang nagapakita sang demonyohanon nga kasingki.⁠ *

Walay sapayan, ang nagapanalawsaw nga organisasyon nga Mediascope nagreport: “Ginapakita sang mga pagtuon nga ang nanamian sa heavy metal nga musika mahimo nga amo ang isa ka importante nga palatandaan sang pagpain sa kaugalingon, pag-abuso sa droga ukon alkohol, diperensia sa hunahuna, mga katalagman sa paghikog . . . ukon makatalagam nga mga panimuot sa tion sang pagkapamatan-on, apang ang musika indi amo ang kabangdanan sining mga paggawi. Ginahaumhaum nga ang mga tin-edyer nga nagaatubang na sa sining mga problema mahimo maganyat sa heavy metal nga musika, bangod ang mga liriko nagapabutyag sang ila mismo mga kabalaka.”

Mahimo indi tanan nga manugpanalawsaw ang magaugyon sa mga katalagman sang pagpamati sa sataniko nga musika. Apang ang mga video bala, musika, ukon mga hampang nga nagapadaku sa kasingki ukon paglaglag sa kaugalingon indi gid makahalalit? Apang, para sa mga Cristiano, ang pagtilawtilaw sa okulto nagahatag sing daku pa nga katalagman.

Ang Pagtamod sang Dios sa Okulto

Sa 1 Corinto 10:​20, nagpaandam si apostol Pablo sa mga Cristiano: “Indi ko luyag nga mangin umalambit kamo sang mga demonyo.” Sin-o gid ang mga demonyo, kag ngaa makatalagam nga madalahig sa ila? Sa simple nga hambal, ang mga demonyo amo ang mga anghel anay, nga nagpili nga sundon si Satanas nga Yawa. Ang Satanas nagakahulugan sing “Manugpamatok” kag ang Yawa nagakahulugan sing “Manugpasipala.” Suno sa Biblia, ining anghel  nga anak sang Dios sang una naghimo sa iya kaugalingon nga manugpamatok kag manugpasipala paagi sa pagrebelde sa Dios. Sang ulihi, ginbuyok niya ang iban pa nga mga anghel nga mag-ugyon sa iya rebelyuso nga dalanon. Sa amo, ining mga kaalyado niya nangin mga demonyo.​​—⁠Genesis 3:​1-​15; 6:​1-4; Judas 6.

Gintawag ni Jesus si Satanas nga “gumalahom sining kalibutan.” (Juan 12:31) Si Satanas kag ang iya mga demonyo may “daku nga kaakig” sa ila nagahilapit na nga kalaglagan. (Bugna 12:​9-​12) Indi makapakibot nga ang mga tawo nga nadalahig sa mga demonyo nangin mapintas man. Ang isa ka babayi sa Suriname nga nagdaku sa isa ka pamilya nga nagabuhat sing espiritismo nakakita mismo kon paano ang mga demonyo “nasadyahan sa pagpaantos sang ila nagapamatok nga mga biktima.”⁠ * Sa amo, ang madalahig sa sining mapintas nga espiritu nga mga tinuga tuman gid ka makatalagam!

Bangod sini, ginsugo sang Dios ang iya dumaan nga katawhan, ang mga Israelinhon, nga likawan ang tanan nga buhat sang okulto. “Ang tanan nga nagahimo sining mga butang kalangil-aran kay Jehova,” paandam sang Deuteronomio 18:10-​12. Ginpaandaman man ang mga Cristiano nga ang “mga nagabuhat sang espiritismo” makaagom sing kalaglagan sa mga kamot sang Dios. (Bugna 21:8) Bisan ang pagtilawtilaw sa okulto ginapakamalaut sang Dios. “Mag-untat sa pagtandog sang di-matinlo nga butang,” sugo sang Biblia.​​—⁠2 Corinto 6:⁠17.

Pagpanginpadlos Gikan sa mga Buhat sang Okulto

Nagatilawtilaw ka bala sa okulto? Nian binagbinaga ang natabo sa unang-siglo nga siudad sang Efeso. Madamo didto ang “nagahimo sing salamangka.” Apang ang pila napahulag sa gamhanan nga mga buhat nga ginhimo ni apostol Pablo sa bulig sang balaan nga espiritu. Ang mga resulta? ‘Madamo sa mga naghimo sing mga salamangka ang nagdala sing tingob sang ila mga tulun-an kag ginpanutdan nila ini sa itululok sang tanan. Kag ginbanabana nila sing tingob ang bili sini kag nasapwan nga ini nagabili sing kalim-an ka libo ka bilog nga pilak. Sa amo sa isa ka gamhanan nga paagi ang pulong ni Jehova padayon nga nagatubo kag nagalandas.’​​—⁠Binuhatan 19:11-​20.

Ano ang ginasugid sini sa aton? Nga kon luyag sang isa ka tawo nga mahilway sa mga pagkontrol sang mga demonyo, dapat niya dulaon ang tanan nga kagamitan may kaangtanan sa sataniko nga pagsimba! Nagalakip ini sang tanan nga libro, magasin, poster, komiks, video, mga pangalap (ang mga butang nga ginagamit para “proteksion”), kag demonyohanon nga materyal nga ginapasulod gikan sa Internet. (Deuteronomio 7:​25, 26) Isikway ang ano man nga kagamitan nga mahimo gamiton sa pagpamakot, subong sang mga kristal nga bola ukon mga Ouija board. Subong man, likawi ang musika ukon mga video nga nagapakita sang sataniko nga mga topiko.

Nagakinahanglan sing kaisog kag determinasyon ang paghimo sining maisugon nga mga tikang. Apang daku gid ang mga kaayuhan. Ang isa ka Cristianong babayi nga si Jean⁠ * nagbakal sing computer game nga daw di-makahalalit sa primero. Samtang padayon sia sa iya paghampang sa computer, nadiskobrehan niya ang mga bahin sang hampang nga may lakot nga espiritismo. Sang ulihi nagdamgo sia sing mga makahaladlok! “Nagbugtaw ako sa managob nga kagab-ihon,” siling ni Jean, “kag ginguba ang mga CD nga nagaunod sini nga hampang.” Ang resulta? “Wala na ako gintublag pa liwat.”

Kon determinado gid ikaw nga makapanginpadlos, magamadinalag-on ka. Dumduma ang determinasyon nga ginpakita ni Jesus sang ginsulay sia sang Yawa nga magsimba sa iya. “Si Jesus nagsiling sa iya: ‘Palayo ka, Satanas! Kay nasulat na, “Si Jehova nga imo Dios ang simbahon mo, kag sa iya lamang ikaw maghimo sing sagrado nga pag-alagad.” ’ Nian ginbayaan sia sang Yawa.”​—⁠Mateo 4:8-11.

Indi Makig-away sing Isahanon

Ginpahanumdom kita ni apostol Pablo nga ang tanan nga Cristiano “nagapakig-away . . . batok sa malaut nga mga puwersa nga espiritu sa langitnon nga mga duog.” (Efeso 6:12) Apang indi makig-away kay Satanas kag sa iya mga demonyo sing isahanon. Mangayo sing bulig sa imo mahinadlukon sa Dios nga mga ginikanan kag sa mga gulang sa inyo lokal nga Cristianong kongregasyon. Mahimo nga daw mahuya ka sa pagsugid sang imo pagkanadalahig, apang magaresulta ini sa imo pagbaton sing kinahanglanon gid nga pagsakdag.​​—⁠Santiago 5:​14, 15.

Dumduma man ang ginasiling sang Biblia: “Pamatuki ang Yawa, kag magapalagyo sia sa inyo. Magpalapit kamo sa Dios, kag magapalapit sia sa inyo.” (Santiago 4:​7, 8) Huo, si Jehova nga Dios nagasakdag sa imo! Magabulig sia sa imo nga mahilway gikan sa siod sang okulto.

[Mga nota]

^ par. 10 Tan-awa ang artikulo nga “Pamangkot Sang mga Pamatan-on . . . Makatalagam Bala ang mga Hampang nga May Ginailog nga mga Karakter?,” sa Septiembre 8, 1999, nga guwa sang Magmata!

^ par. 15 Tan-awa ang artikulo “Pagpanginpadlos Gikan sa Gota sang Espiritismo” sa Septiembre 1, 1987, nga guwa sang kaupod sini nga magasin, Ang Lalantawan, nga ginbalhag sang mga Saksi ni Jehova.

^ par. 20 Ang ngalan gin-islan.

[Retrato sa pahina 26]

Isikway ang tanan nga butang may kaangtanan sa sataniko nga pagsimba

[Picture on page 26]

Mag-andam sa mga Web site nga nagapakita sing espiritismo