Magdiretso sa kaundan

Magdiretso sa listahan sang kaundan

Isa ka Dalagita nga May Masanag nga Paglaum

Isa ka Dalagita nga May Masanag nga Paglaum

 Isa ka Dalagita nga May Masanag nga Paglaum

ANG mga manugbalhag sang Magmata! nakabaton sing sulat halin sa 12-anyos nga dalagita nga si Stephanie. “Luyag ko kamo sugiran kon daw ano ka daku ang nabulig sang mga publikasyon sa akon sa eskwelahan,” sulat niya. “Sining karon lang, ginpahimo kami sing proyekto nga may tema nga ‘Pagkananuhaytuhay Sang Kultura.’ Gintan-aw namon sang akon pamilya ang mga publikasyon, gingunting ang mga teksto kag mga laragway nga bagay sa tema. Nian ginpatapik ko ang mga butang nga amon nakita sa poster board.” Ginpapili sang maestra ni Stephanie ang klase kon diin ang ginakabig nila nga lima ka pinakamaayo nga proyekto. “Sang masunod nga adlaw,” sulat ni Stephanie, “nakita ko nga ang akon proyekto lakip sa lima nga nagapanguna.”

Ang isa sang mga reperensia nga ginpili ni Stephanie amo ang Oktubre 22, 1998, nga Awake! nga may tig-ulo sa panghapin, “Will All People Ever Love One Another?” Subong isa sang mga Saksi ni Jehova, nagapati gid si Stephanie nga ang mga tawo sa nanuhaytuhay nga kultura mahimo magkabuhi sing tingob sa paghidait. Sa pagkamatuod, bahin sia sang isa ka internasyonal nga paghiliutod diin ang mga magkontrahanay anay​—⁠lakip ang mga Tutsi kag mga Hutu, mga Aleman kag mga Ruso, mga Armenianhon kag mga Turko, mga Hapones kag mga Amerikano⁠​—⁠​ginhiusa paagi sa kamatuoran sang Biblia. Sing tingob, ginatinguhaan nila nga ilugon ang ila Manunuga. Sa anong paagi? Ang isa sang mga teksto sa Biblia nga gingamit ni Stephanie sa iya proyekto nagahatag sing sabat: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” (Binuhatan 10:​34, 35) Ginatinguhaan sang mga Saksi ni Jehova nga ipakita ang kaanggid nga pagkawalay pinasulabi sa ila pagpakig-angot sa iban.

Nagalaum si Stephanie sa katumanan sang saad sang Biblia nga sa dili madugay paluntaron sang Ginharian sang Dios ang matarong nga mga kahimtangan sa aton duta. (Bugna 21:​3, 4) Sa kalibutan diin madamong pamatan-on ang nahadlok kag indi pat-od sa palaabuton, talalupangdon sia subong isa nga may masanag nga paglaum.