Magdiretso sa kaundan

Magdiretso sa listahan sang kaundan

Ang Pag-asawahay Bala Dapat Mangin Tubtob-buhi nga Pag-updanay?

Ang Pag-asawahay Bala Dapat Mangin Tubtob-buhi nga Pag-updanay?

 Ang Pagtamod sang Biblia

Ang Pag-asawahay Bala Dapat Mangin Tubtob-buhi nga Pag-updanay?

NGAA ipamangkot pa ina? Indi bala nga ang pag-asawahay, suno sa pagbalikwat sa panumpa sa kasal sang Nakatundan, “sa kalipay man ukon sa kasakit” kag “tubtob kamatayon”? Huo, ang panumpa sa kasal masami nagasiling nga ang nobya kag nobyo nagasulod sa bug-os-kabuhi nga pag-updanay. Apang madamo ang wala na nagakabig sang ila kaugalingon nga nahigot sa sining solemne nga mga panaad. Makahalangawa nga kadamuon sang mag-asawa ang nagabulagay​​—⁠ang iban pagligad sang pila lamang ka bulan, kag ang iban naman pagligad sang madamo nga tinuig. Ngaa nagausmod ang pagtahod sa pag-asawahay? Ang Biblia nagahatag sing sabat.

Palihug tan-awa ang 2 Timoteo 3:​1-3, kag ipaanggid ini sa kon ano ang makita mo sa kalibutan karon. Sing bahin, ining mga bersikulo nagasiling: “Sa katapusan nga mga adlaw magaabot ang makahalanguyos nga mga tion nga mabudlay pakigbagayan. Kay ang mga tawo mangin mga mahigugmaon sang kaugalingon, mga mahigugmaon sang kuwarta, . . . mga di-mapinasalamaton, mga di-matutom, mga wala sing kinaugali nga gugma, mga indi tampad sa bisan anong kasugtanan, . . . mga wala sing pagpugong sa kaugalingon.” Dalayawon gid ang pagkasibu sining tagna. Ini nga mga panimuot naghalit kag nagpahuyang sang mga relasyon sang mag-asawa sa bug-os nga kalibutan, nga ginapamatud-an sang mataas nga kadamuon sang diborsio.

Sing maathag, madamo nga tawo ang nadulaan sing pagtahod sa pag-asawahay. Bangod sini, mahimo kita mamangkot: Dapat bala tamdon sing serioso ang pag-asawahay? May butang bala subong sang pagkasagrado sang pag-asawahay? Paano dapat tamdon sang mga Cristiano ang pag-asawahay? Ano nga bulig ang ginatanyag sang Biblia sa mga mag-asawa sa karon?

Nagbalhin Bala ang Pagtamod sang Dios?

Sa ginsuguran, wala nagsiling ang Dios nga ang higot sang pag-asawahay temporaryo lamang. Ang pagtingob niya sa una nga lalaki kag babayi ginsaysay sa Genesis 2:​21-24, kag wala ginsambit ang pililian nga magdiborsio ukon magbulagay. Sa baylo, ang bersikulo 24 nagsiling: “Bayaan sang lalaki ang iya amay kag ang iya iloy kag magahiusa sia sa iya asawa kag sila mangin isa ka unod.” Ano ang buot silingon sina nga kasulatan?

Binagbinaga ang tawhanon nga lawas, kon paano ang nagkalainlain nga basad gintalabid nga wala sing sugpon kag kon paano ang mga tul-an nagtabuay sa mabakod, wala nagasag-id nga mga lutalutahan. Daw ano nga paghiusa! Daw ano nga kapag-on! Apang daw ano kasakit kon  ining di-matupungan nga organismo mahalitan sing daku! Busa, sa Genesis 2:​24, ang termino nga “isa ka unod” nagapadaku sang pagkasuod kag pagkapermanente sang pag-asawahay. Nagahatag man ini sing pat-od nga paandam sang daku nga kasakit kon ang higot sini mabugto.

Bisan pa nga ang nagabalhin nga mga huyog sang nagligad nga mga milenyo nagdihon kag nagbag-o sang mga tawhanon nga pagtamod, ginatamod gihapon sang Dios ang pag-asawahay subong tubtob-buhi nga pag-updanay. Sang nagligad nga mga 2,400 ka tuig, ginbiyaan sang pila ka Judiyong mga lalaki ang ila unang mga asawa kag nagpangasawa sing mas bataon nga mga babayi. Ginpakamalaut sang Dios ining nga buhat, nga nagsiling paagi sa iya manalagna nga si Malaquias: “ ‘Andami ninyo ang inyo kaugalingon nahanungod sa inyo espiritu, kag wala sing magluib sa asawa sang inyo pagkapamatan-on. Kay ginadumtan niya ang pagbulagay,’ siling ni Jehova ang Dios sang Israel.”​​—⁠Malaquias 2:​15, 16.

Kapin sa apat ka siglo sang ulihi, ginsulit ni Jesus ang orihinal nga pagtamod sang Dios sa pag-asawahay sang ginkutlo niya ang Genesis 2:​24 kag nian nagsugo: “Ang gintingob sang Dios dili pagbulagon sang tawo.” (Mateo 19:​5, 6) Mga tuig sang ulihi si apostol Pablo naghatag sing instruksion nga “ang asawa indi dapat magbulag sa iya bana” kag “indi dapat bayaan sang bana ang iya asawa.” (1 Corinto 7:​10, 11) Ining mga kasulatan sibu gid nga nagasambit sang pagtamod sang Dios sa pag-asawahay.

Nagatugot gid man bala ang Biblia nga matapos ang pag-asawahay? Huo, ang pag-asawahay matapos kon ang isa ka tiayon mapatay. (1 Corinto 7:39) Matapos man ang pag-asawahay bangod sang panghilahi kon amo sini ang desisyon sang inosente nga tiayon. (Mateo 19:9) Magluwas sini, ang Biblia nagapalig-on sa mga mag-asawa nga magpabilin nga nagaupdanay.

Kon Ano ang Himuon Agod Mangin Walay Katubtuban ang Pag-asawahay

Luyag sang Dios nga magdugay ang pag-asawahay, indi subong isa ka pagpanikasog nga makalampuwas, kundi subong isa ka makalilipay nga paglakbay. Handum niya nga malubad sang mga mag-asawa ang ila mga problema kag magkalipay sing daku sa pagpakig-upod sa isa kag isa. Ang iya Pulong nagaaman sing panuytoy para sa isa ka malipayon, walay-katubtuban nga pag-asawahay. Palihug talupangda ang masunod nga mga teksto.

Efeso 4:​26: “Indi pagpatunuri sing adlaw ang inyo kaakig.”⁠ * Ang isa ka malipayon nga bana nagapati nga ini nga kasulatan nagbulig sa ila nga mag-asawa nga malubad sa gilayon ang mga di-paghangpanay. “Kon indi ka makatulog pagkatapos sang di-paghangpanay, may yara problema. Indi mahimo nga pabay-an mo lang nga magpadayon ang problema,” siling niya. Kon kaisa ginahambalan sing maayo nila nga mag-asawa ang mga problema tubtob sa kagab-ihon. Apang madinalag-on ini. Nagsiling sia: “Ang pag-aplikar sa mga prinsipio sang Biblia may maayo gid nga mga resulta.” Sa paghimo sini, ining mag-asawa nangin malipayon sa 42 ka tuig sang ila pag-asawahay.

Colosas 3:​13: “Padayon kamo nga magpinaumuray sa isa kag isa kag hilway nga magpinatawaray sa isa kag isa.” Ginpaathag sang isa ka bana kon paano nila nga mag-asawa gin-aplikar ini: “Sarang mapaakig sang mag-asawa ang isa kag isa bisan wala sila sing ginahimo nga sayop, kay ang tanan may mga kaluyahon kag mga pamatasan nga nagapainit sa iban nga tawo. Nagapaumod kami sa isa kag isa paagi sa indi pagtugot sini nga mga butang nga magpahilayo sa amon sa isa kag isa.” Walay duhaduha nga ining sentimiento nagbulig sa sining mag-asawa sa sulod sang 54 ka tuig sang ila pag-asawahay!

Ang pag-aplikar sa sining mga prinsipio sang Kasulatan nagapabakod sang higot nga nagahiusa sa mga bana kag mga asawa. Sa amo, ang ila pag-asawahay mahimo mangin malipayon, makaalayaw, kag tubtob-buhi.

[Nota]

^ par. 14 Suno sa unang-siglo nga orasan sa Natung-an nga Sidlangan, ang isa ka adlaw nagatapos sa pagtunod sang adlaw. Gani ginapalig-on ni Pablo ang iya mga bumalasa nga makighidait sa iban antes matapos ang kada adlaw.