Magdiretso sa kaundan

Magdiretso sa listahan sang kaundan

Nakabulig Ini sa Pagluwas sang Iya Kabuhi

Nakabulig Ini sa Pagluwas sang Iya Kabuhi

 Nakabulig Ini sa Pagluwas sang Iya Kabuhi

Ang Disiembre 22, 1999, nga guwa sang “Awake!” nagbinagbinag sang tema sa panghapin nga “Kidnapping​—⁠Why a Global Threat.” Si William Louis Terrell nagsiling nga ini nga guwa sang “Awake!” nakabulig sa pagluwas sang iya kabuhi.

PASADO alas dies sang aga sang Biernes, Marso 10, 2000, ginkidnap ni Joseph C. Palczynski, Jr. si Terrell nga ginatayaan sing pusil sa iya puluy-an. Ang mga artikulo sa Awake!, nga siling ni Terrell pirme niya gindumdom sa tion sang iya mapait nga eksperiensia, naghatag sang masunod nga mga panugda halin sa mga eksperto kon ano ang himuon kon makidnap:

“Magkooperar; indi magmabinatuon. Ang mabinatuon nga mga hostage masami nga ginapintasan, kag mas daku ang ila katalagman nga patyon ukon silutan.

“Indi magsalasala. Dumduma pirme nga nalampuwasan sang kalabanan sang mga biktima ang pagkidnap.”

“Makigsugilanon kon mahimo kag tinguhai nga mapasad ang komunikasyon. Kon tamdon ka sang mga kidnaper subong isa ka indibiduwal, mahimo nga indi ka nila paghalitan ukon patyon.

“Pahibalua sila [ang mga kidnaper] sang imo mga kinahanglanon sa matinahuron nga paagi.”

“Ang paghambalanay nangin proteksion sa ginkidnap, subong sang ginpaathag sang libro nga Criminal Behavior: ‘Kon labi nga nagakilal-anay ang biktima kag ang nagkidnap, labi sila nga mag-ayuhay. Ginapakita sini nga hitabo nga pagligad sang pila ka tion mahimo nga indi paghalitan sang nagkidnap ang hostage.’ ”

Gintinguhaan gid ni William Terrell, nga 53-anyos kag isa ka Saksi ni Jehova, nga sundon ini nga mga panugda sa sulod sang halos 14 ka oras nga ginhostage sia, sa kalabanan nga tion ginatayaan sia sing pusil. Ining mapait nga eksperiensia nagsugod wala lamang madugay sa tapos nagpanuktok si Palczynski sa puwertahan ni Terrell sa isa ka uma malapit sa Interstate Highway 95, diin naubusan sing gasolina ang salakyan nga ginkawat ni Palczynski.

Sang mabatian ang kahimtangan sang estranghero, nagpakita si Terrell sing handum nga magbulig. Nagpangayo si Palczynski sing isa ka baso nga tubig kag nagpadul-ong sa Baltimore, Maryland, E.⁠U.⁠A. Nagsiling si Terrell nga may  lihugon sia nga magdul-ong sa iya sa siudad sang Fredericksburg, Virginia, diin makasakay sia sing bus pakadto sa iya kaladtuan. Sang nagbalik na si Terrell nga dala ang isa ka baso nga tubig para sa estranghero, ginataya na ang pusil sa iya. Ginsugo ni Palczynski si Terrell nga idul-ong sia sa iya kaladtuan.

Pagsunod sa mga Panugda

Samtang nagabiyahe sa I-95, ginsunod ni Terrell ang sugo ni Palczynski nga indi masyado pagdasigon ang pagpadalagan kag indi magpadalagan nga makaganyat sing igtalupangod sa ila. Nagpabilin nga kalmado, ginsugilanon ni Terrell ang 31-anyos nga si Palczynski, nagpakita sing matuod nga interes sa iya subong indibiduwal kag sa mga kahimtangan nga nagdul-ong sa pagkit-anay nila. Ginsugid ni Palczynski nga sang nagligad nga tatlo ka adlaw ginduaw niya ang iya nobya nga si Tracy, nga nakigbugras sa iya. Didto gintiro niya kag ginpatay ang isa ka mag-asawa nga abyan ni Tracy kag ang isa ka kaingod nga nagpugong sa pagkuha niya kay Tracy. Sang ulihi nakapalagyo si Tracy.

Sang masunod nga gab-i, sa pagtinguha ni Palczynski nga mang-agaw sing isa ka salakyan, isa ka dos-anyos nga bata nga lalaki ang naigo sang isa niya ka bala, nga nagpawasaag sang sag-ang sang bata. Naigo man ang salakyan nga ginadala ni Jennifer Lyn McDonel. Makapasubo nga napatay sia sang isa ka bala, kag ang isa pa ka bala nag-igo sa bakante nga pulungkuan sang ila isa-ka-tuig nga bata. Manugpakadto si Jennifer kag ang iya bana, nga si Thomas, sa Kingdom Hall sang mga Saksi ni Jehova, diin may bahin sila nga duha sa miting sadto nga gab-i. Ang iloy ni Jennifer, nga si Sarah Francis, nagpaathag: “Amo lang yadto nga gab-i nga wala nila gindala ang bata sa Kingdom Hall. [Kon gindala nila sia] duha kuntani sa ila ang amon ginlalawan.”

Samtang padayon nga ginasugilanon sing mainayuhon ni Terrell ang nagkidnap sa iya, nagsiling si Palczynski nga indi gid niya luyag nga may mahalitan kag ginahigugma gid niya si Tracy kag gusto niya nga mangin kaupod sia. Nagpaathag si Terrell: “Ginsugiran ko sia nga indi na niya mabag-o ang nagligad apang puwede niya mabag-o ang palaabuton, kag ginpalig-on ko sia nga magsungka. Ginsugiran ko sia nga duawon ko sia sa prisuhan kag magatuon kami sa Biblia.” Sang ulihi ginbalita nga kutob sang makatapos sia sa hayskul sang 1987, napulo lang ka bulan sang iya kabuhi ang wala niya mahinguyang sa prisuhan ukon sa institusyon sang mga may balatian sa hunahuna ukon subong parolado.

Gingamit ang iya eksperiensia subong madugay na nga Cristianong gulang, ginpadayon ni Terrell ang pagkuha sang simpatiya sang natublag nga pamatan-on paagi sa pagsugid sing matuod nga natabo sa kabuhi nga mga halimbawa gikan sa Biblia. Halimbawa, ginsugid niya ang eksperiensia sang maayo nga tawo, nga si Hari David sang Israel, nga nagkaibog sa asawa ni Urias, nga isa sang mga soldado sa hangaway ni David. Sang nagbusong ang babayi bangod kay David, ginpangitaan niya sing paagi nga mapatay sa inaway si Urias. Sang ginsugid sing mataktikanhon kay David ang iya mga sala, naghinulsol gid sia kag natigayon niya liwat ang kahamuot sang Dios.​—⁠2 Samuel 11:2–12:⁠14.

Gin-ayuhan ni Terrell ang pugante kag gintawag sia sa iya hayo nga Joby. Sang nagdulog sila sa isa ka balaligyaan kag ginsugo si Terrell nga magbakal sing pagkaon kag sing mabulubitbit nga telebisyon, nagsiling si Palczynski nga patyon niya ang madamo pa kon tinguhaan niya nga pahibaluon ang iban. Bangod nakita niya nga indi mapaktan ang hunahuna sang pugante, nagsunod si Terrell. Sang ulihi, sa tapos makita sa alas onse nga balita ang nahanungod sa mga krimen ni Palczynski, ginhakos ni Palczynski si Terrell kag mahipos nga nangindulaan sa isa ka banwa sang Baltimore.

Mga isa ka semana sang ulihi, nakorner si Palczynski sa isa ka balay diin may mga hostage sia. Ginpatawag si Terrell, nga ginsambit sang pugante, agod magbulig sa negosasyon. Sing makapasubo, wala ini nagmadinalag-on, kag sang Marso 22, gintiro kag napatay sang mga pulis si Palczynski nga nagsulong sa balay. Wala sing iban pa nga nahalitan.

Pagkatapos sadto, nagkuha si Terrell sing mga 600 ka kopya sang guwa sang Awake! nga ginakilala niya nga nakabulig agod maluwas ang iya kabuhi. Ginhatag niya ang ginatos sini sa iban. Nagapasalamat si Terrell nga nangin batasan niya ang pagbasa sang mapuslanon nga mga impormasyon sa Awake!, kag nagapati kami nga kamo man.

[Laragway sa pahina 28]

Si William Terrell