Magdiretso sa kaundan

Magdiretso sa listahan sang kaundan

Aids sa Aprika—Ano ang Paglaum sa Bag-o nga Milenyo?

Aids sa Aprika—Ano ang Paglaum sa Bag-o nga Milenyo?

 Aids sa Aprika—Ano ang Paglaum sa Bag-o nga Milenyo?

SANG KORESPONSAL SANG MAGMATA! SA ZAMBIA

SANG nagligad nga Septiembre ang mga delegado halin sa lainlain nga bahin sang Aprika nagtipon sa Lusaka, Zambia, para sa ika-11 nga Internasyonal nga Komperensia sa AIDS kag mga STD sa Aprika. Ang isa ka katuyuan sang komperensia amo ang pagpalig-on sang daku pa nga kooperasyon sang lainlain nga mga rehiyon sa pagsabat sa pamangkot, Paano naton malubad ang paglapnag sang AIDS sa Aprika?

Si Propesor Nkandu Luo, nga sadto ministro sang kapagros sa Zambia, nagsiling nga ang kahimtangan sa Aprika kag sa iban nga mga bahin sang imol nga kalibutan “serioso katama,” kag nagdugang pa nga ini “nagpugong kag nagbale-wala pa gani sa pila sang importante nga mga pag-uswag nga nahimo sa kapagros kag sa iban pa nga sosyal kag ekonomiko nga patag.”

Ang isa ka simposium tuhoy sa pagkawalay peligro sang dugo nagbaton nga ang AIDS ginaliton paagi sa mga pagtayon. Ang isa ka doktor, nga tiglawas sang World Health Organization’s Blood Safety Unit, nagsiling nga bisan pa ang seksuwal nga paghulid upod sa isa nga may AIDS wala pirme nagaliton sing HIV, ang nagabaton sang dugo nga may AIDS malatnan​—⁠sa kada tion nga matabo ini! May nagakaigo gid nga rason nga ining doktor nagsiling nga sa sini nga kaso, “ang labing di-peligruso nga pagtayon sing dugo amo ang indi pagpatayon sing dugo.”

Ginpatalupangod sang komperensia nga bangod sang mahal kaayo nga bili sang pagpabulong, mabudlay kon indi man imposible para sa mga may AIDS nga masarangan ang pagpabulong. Sa promedyo, halimbawa, ang isa ka taga-Uganda sa isa ka siudad may mga $200 nga kita sa isa ka bulan. Apang ang pagpabulong nga nagagamit sing mga antiretroviral nagabili sing tubtob sa $1,000 kada bulan!

Ginpakita sang komperensia sa Lusaka nga ang pagsugod sang bag-o nga milenyo wala sing makita nga mahapos nga solusyon sa paglapnag sang AIDS. Apang, nahibaluan sang mga estudyante sang Biblia nga sa ulihi ang solusyon sang tanan nga balatian nasandig sa Manunuga, si Jehova nga Dios, nga nagasaad nga sa iya bag-ong kalibutan, “wala sing pumuluyo nga magasiling: ‘Nagamasakit ako.’”—Isaias 33:24.

[Mapa/mga laragway sa pahina 31]

Si Propesor Nkandu Luo

[Kapsion]

Retrato sa pahanugot ni E. Mwanaleza, Times of Zambia