Magdiretso sa kaundan

Magdiretso sa listahan sang kaundan

 LEKSION 26

Ngaa May Pag-antos kag Malain nga Nagakatabo?

Ngaa May Pag-antos kag Malain nga Nagakatabo?

“Ngaa?” Amo ini ang pirme nga ginapamangkot sang mga tawo kon may malain nga matabo. Pero nalipay kita kay ginasabat sang Biblia ina nga pamangkot!

1. Ano ang ginhimo ni Satanas nga nangin umpisa sang kalainan sa kalibutan?

Si Satanas nga Yawa nagrebelde sa Dios. Gusto ni Satanas nga sia ang maggahom, gani ginsulay niya si Adan kag si Eva nga magrebelde upod sa iya. Ginhimo niya ini paagi sa pagbinutig kay Eva. (Genesis 3:1-5) Ginpapati niya si Eva nga may ginatago nga maayo nga butang si Jehova sa iya. Ginpagua niya nga mangin mas malipayon ang mga tawo kon indi sila magsunod sa Dios. Ginhambal ni Satanas ang una nga kabutigan sang ginsilingan niya si Eva nga indi sia mapatay. Gani gintawag sang Biblia si Satanas nga ‘butigon kag amay sang kabutigan.’Juan 8:44.

2. Ano ang desisyon ni Adan kag ni Eva?

Maalwan gid si Jehova kay Adan kag kay Eva. Nagsiling sia nga puede nila kaunon ang bunga sang tanan nga kahoy sa hardin sang Eden magluwas lang sa isa. (Genesis 2:15-17) Pero nagdesisyon sila nga kaunon ang bunga sang sina nga kahoy. ‘Nagkuha si Eva sang bunga sini kag ginkaon ini.’ Sang ulihi, ‘nagkaon man si Adan.’ (Genesis 3:6) Pareho sila nga wala nagtuman sa Dios. Perpekto si Adan kag si Eva, gani natural lang kuntani sa ila ang paghimo sing husto. Pero hungod nila nga wala gintuman ang Dios, gani nakasala sila kag wala sila nagpasakop sa iya paggahom. Bangod sini, nag-antos gid sila.—Genesis 3:16-19.

3. Ano ang epekto sa aton sang desisyon ni Adan kag ni Eva?

Sang nagpakasala si Adan kag si Eva, nangin indi sila perpekto, kag napasa nila ini sa tanan nila nga kaliwat. Parte kay Adan, ang Biblia nagasiling: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo.”Roma 5:12.

Madamo sing rason kon ngaa nagaantos kita. Kon kaisa bangod sa aton sala nga mga desisyon ukon sala nga desisyon sang iban. Kon kaisa nagaantos kita kay natabuan nga ara kita sa isa ka lugar nga may malain nga natabo.—Basaha ang Manugwali 9:11.

 USISAA PA GID

Usisaon naton kon ngaa indi ang Dios ang ginahalinan sang kalainan kag pag-antos subong, kag kon ano ang ginabatyag niya kon nagaantos kita.

4. Ang ginahalinan sang aton pag-antos

Madamo ang nagapati nga ang Dios ang nagagahom sa kalibutan. Matuod bala ina? Tan-awa ang VIDEO.

Basaha ang Santiago 1:13 kag 1 Juan 5:19, dayon binagbinaga ini nga pamangkot:

  • Ang Dios bala ang ginahalinan sang pag-antos kag kalainan?

5. Binagbinaga ang resulta sang paggahom ni Satanas

Basaha ang Genesis 3:1-6, dayon binagbinaga ini nga mga pamangkot:

  • Ano nga kabutigan ang ginsiling ni Satanas?—Tan-awa ang bersikulo 4 kag 5.

  • Paano ginpagua ni Satanas nga may ginatago si Jehova nga maayo sa mga tawo?

  • Suno kay Satanas, kinahanglan bala sang mga tawo si Jehova bilang ila Manuggahom para mangin malipayon sila?

Basaha ang Manugwali 8:9, dayon binagbinaga ini nga pamangkot:

  • Bangod indi si Jehova ang Manuggahom sini nga kalibutan, ano ang resulta?

  1. Perpekto si Adan kag si Eva kag nag-istar sila sa Paraiso. Pero ginsunod nila si Satanas kag nagrebelde kay Jehova

  2.   Sa tapos sang pagrebelde, ang mga tawo nangin makasasala, nagaantos, kag nagakapatay

  3. Dulaon ni Jehova ang sala, pag-antos, kag kamatayon. Ang mga tawo mangin perpekto liwat kag magaistar sa Paraiso

6. Nagaulikid si Jehova kon nagaantos kita

Nagaulikid bala ang Dios kon nagaantos kita? Binagbinaga ang ginsulat ni Hari David kag ni apostol Pedro. Basaha ang Salmo 31:7 kag 1 Pedro 5:7, dayon binagbinaga ini nga pamangkot:

  • Ano ang masiling mo kay nakita ni Jehova ang aton pag-antos kag nagaulikid sia?

7. Dulaon sang Dios ang tanan naton nga pag-antos

Basaha ang Isaias 65:17 kag Bugna 21:3, 4, dayon binagbinaga ini nga pamangkot:

  • Ngaa makapaumpaw mahibaluan nga dulaon ni Jehova ang epekto sang tanan nga malain nga naeksperiensiahan sang tawo?

Kabalo ka bala?

Sang ginhambal ni Satanas ang una nga kabutigan, ginpasipalahan niya si Jehova. Buot silingon, ginguba niya ang reputasyon ni Jehova bilang maayo kag mapinalanggaon nga Manuggahom. Kon dulaon na ni Jehova ang pag-antos sang mga tawo sa ulihi, ibindikar niya ang iya kaugalingon. Buot silingon, pamatud-an niya nga ang iya paggahom amo ang pinakamaayo. Ang pagbindikar sa ngalan ni Jehova amo ang pinakaimportante sa tanan.—Mateo 6:9, 10.

KON MAGSILING ANG IBAN: “Pagbuot ’na sang Dios nga mag-antos kita.”

  • Ano ang isabat mo?

 SUMARYO

Si Satanas nga Yawa, kag si Adan kag si Eva amo ang panguna nga rason sang kalainan sa kalibutan. Nagaulikid si Jehova kon nagaantos kita, kag sa indi madugay dulaon niya ang pag-antos.

Rebyu

  • Ano nga kabutigan ang ginsiling ni Satanas nga Yawa kay Eva?

  • Ano ang epekto sa aton sang pagrebelde ni Adan kag ni Eva?

  • Ngaa makasiling kita nga nagaulikid si Jehova kon nagaantos kita?

Ang Puede Mo Himuon

DUGANG NGA IMPORMASYON

Hibalua kon ano ang sala suno sa Biblia.

“Ano ang Sala?” (Artikulo sa website)

Basaha kon ano nga isyu ang ginpautwas ni Satanas nga Yawa sa hardin sang Eden sadto.

“Ngaa Ginatugutan sang Dios ang Pag-antos?” (Ang Lalantawan, Enero 1, 2014)

Hibalua ang makapaumpaw nga mga sabat sa isa ka mabudlay nga pamangkot.

“Ngaa Natabo ang Holocaust? Ngaa Wala Ini Ginpunggan sang Dios?” (Artikulo sa website)

Tan-awa kon ano ang natun-an sang isa ka lalaki parte sa pag-antos nga nakita niya sa palibot.

Wala Na Ako Nagaisahanon (5:09)