Magdiretso sa kaundan

Magdiretso sa listahan sang kaundan

LEKSION 46

Ang Pagtilaw nga Natabo sa Bukid Carmel

Ang Pagtilaw nga Natabo sa Bukid Carmel

Madamo sing malain nga hari ang napulo ka tribo sang ginharian sang Israel, pero si Ahab ang isa sa pinakamalain nga hari. Ginpangasawa niya ang malain gid nga babayi nga nagasimba kay Baal. Sia amo si Jezebel. Ginpalapnag ni Ahab kag ni Jezebel ang pagsimba kay Baal kag ginpatay nila ang mga manalagna ni Jehova. Ano ang ginhimo ni Jehova? Ginpadala niya si Elias para maghatag sing mensahe kay Ahab.

Si Elias nagsiling kay Hari Ahab nga bangod sa iya malain nga ginahimo, indi gid mag-ulan sa Israel. Sa sulod sang sobra tatlo ka tuig, wala sila sing patubas kag ang katawhan nagutman. Ginpakadto liwat ni Jehova si Elias kay Ahab. Ang hari nagsiling: ‘Ikaw ang rason sang amon kabudlayan! Imo gid ini sala.’ Si Elias nagsabat: ‘Indi ako ang rason sini nga tig-ilinit, kundi ikaw, kay nagsimba ka kay Baal. Tan-awon naton kon sin-o ang matuod nga Dios. Tipuna ang pungsod kag ang mga manalagna ni Baal sa ibabaw sang Bukid Carmel.’

Nagtipon ang katawhan sa bukid. Si Elias nagsiling: ‘Magdesisyon na kamo. Kon si Jehova ang matuod nga Dios, simbaha ninyo sia. Pero kon si Baal, simbaha ninyo sia. Ginahangkat ko kamo. Ang 450 ka manalagna ni Baal magpreparar sing halad kag magpanawag sa ila dios, kag mapreparar man ako sing halad kag magpanawag kay Jehova. Ang magasabat paagi sa kalayo amo ang matuod nga Dios.’ Nagpasugot ang katawhan.

Ang mga manalagna ni Baal nagpreparar sing halad. Bilog nga adlaw sila nga nagpanawag sa ila dios: “O Baal, sabta kami!” Sang wala sila ginsabat ni Baal, ginhimo sila nga kaladlawan ni Elias. Nagsiling sia: ‘Tuduhi pa gid ninyo panawag. Basi nagakatulog sia, kag kinahanglan pukawon.’ Padayon nga nagpanawag ang mga manalagna ni Baal asta maggab-i. Pero wala gihapon sing may nagsabat.

Ginbutang ni Elias ang iya halad sa halaran kag ginbubuan ini sing tubig. Dayon nangamuyo sia: ‘O Jehova, palihug ipakita sa katawhan nga ikaw ang matuod nga Dios.’ Nagpadala dayon si Jehova sing kalayo halin sa langit nga nagsunog sa halad. Ang katawhan nagsinggit: “Si Jehova ang matuod nga Dios!” Si Elias nagsiling: ‘Indi ninyo pagtuguti nga may makapalagyo sa mga manalagna ni Baal!’ Sa sina nga adlaw, ginpatay ang 450 ka manalagna ni Baal.

Sang may gamay nga panganod nga nakita sa ibabaw sang dagat, si Elias nagsiling kay Ahab: ‘May nagapadulong nga mabaskog nga ulan. Ipreparar ang imo kangga, kag magpauli.’ Dayon nagdulom ang langit tungod sa gal-um, naghangin, kag nag-ulan sing mabaskog. Natapos gid man ang tig-ilinit. Madasig gid ang pagpadalagan ni Ahab sang iya kangga. Pero sa bulig ni Jehova, mas madasig pa ang dalagan ni Elias sangsa kangga! Pero wala na bala sing problema si Elias? Tan-awon naton.

“Kabay nga mahibaluan sang mga tawo nga ikaw, nga ang ngalan amo si Jehova, ikaw lamang ang Labing Mataas sa bug-os nga duta.”—Salmo 83:18