Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

MARSO 20, 2014
BALITA SA BILOG NGA KALIBUTAN

Si Guy H. Pierce nga Miembro sang Nagadumala nga Hubon sang mga Saksi ni Jehova, Napatay

Si Guy H. Pierce nga Miembro sang Nagadumala nga Hubon sang mga Saksi ni Jehova, Napatay

NEW YORK—Si Guy H. Pierce, nga miembro sang Nagadumala nga Hubon sang mga Saksi ni Jehova sa ila ulong talatapan sa Brooklyn, New York, napatay sang Martes, Marso 18. Nagaedad sia sing 79 anyos.

Si Mr. Pierce nagpangalagad sa lainlain nga komite nga nagadumala sang mga hilikuton sang mga Saksi kag sang ila bug-os kalibutan nga pagtudlo sa Biblia. Bangod sang iya mga responsibilidad sa organisasyon, pirme sia nagabiyahe, kag ginagamit niya ini nga kahigayunan para mapalig-on ang mga Saksi ni Jehova sa bilog nga kalibutan. Bisan masako sia, kilala gid sia nga mabinuligon kag nagapamati sa mga nagakinahanglan sang iya bulig ukon laygay. Wala man natahap ang mga tawo sa iya bangod palayuhum sia kag palalahog. Ang mga suod sa iya nagsiling nga madasig magmag-an ang buot sa iya bisan sang mga tawo nga lainlain ang gindak-an kag kultura. Sa iya pamulongpulong sa gradwasyon sang bug-os tion nga mga ministro, ginsambit ni Mr. Pierce ang isa ka butang nga ginahimo gid niya mismo: “Mangin malig-on sa husto nga mga prinsipio, pero magpasibu. Indi pagpakanubua ang iban sa inyo asaynment bangod lamang tuhay ang ila kultura.”

Si Guy Hollis Pierce natawo sa Auburn, California, sang Nobiembre 6, 1934. Nabawtismuhan sia subong isa sa mga Saksi ni Jehova sang Agosto 14, 1955, sang 20 anyos sia. Ginpangasawa niya ang isa man ka Saksi nga si Penelope (Penny) Wong, sang Mayo 30, 1977, kag nagpamilya sila. Sanday Mr. kag Mrs. Pierce nangin bug-os tion nga manunudlo sang Biblia (ginatawag sang mga Saksi nga regular payunir.) Sang ulihi, nangin isa sia ka nagalakbay nga manugtatap sang mga Saksi ni Jehova, nga nagabisita sa mga kongregasyon sang mga Saksi ni Jehova sa bilog nga United States para pabakuron pa gid ang pagtuo sang iban nga bug-os tion nga manunudlo sang Biblia kag sang mga miembro sang kongregasyon. Sang 1997, sila nga mag-asawa gin-agda nga magtrabaho sing bug-os tion sa sanga talatapan sa United States sang mga Saksi ni Jehova. Sang Oktubre 2, 1999, ginpahibalo nga si Mr. Pierce nangin bag-o nga miembro sang Nagadumala nga Hubon.

Si Mr. Pierce amo ang tsirman sang ika-129 nga annual meeting sang Watch Tower Bible and Tract Society of Pennsylvania, sang Oktubre 5 kag 6, 2013. Gintambungan ini sang 1,413,676 sa 31 ka pungsod sing personal ukon paagi sa webcast. Suno sa opisyal nga website sang mga Saksi, amo ini ang pinakadaku nga pagtilipon sang mga Saksi ni Jehova.

Magluwas sa iya asawa nga si Penny, si Mr. Pierce may anom ka kabataan, mga apo, kag mga apo sa tuhod. Indi man sia malipatan sang mga Saksi ni Jehova sa bilog nga kalibutan nga ginakabig niya subong pamilya.

Ang kaupod niya nga mga miembro sang Nagadumala nga Hubon nagsiling nga may mabakod sia nga pagtuo kag malig-on nga panindugan para sa kasuguan kag mga prinsipio ni Jehova.” Nagdugang pa sila: “Ang iya kaisog kag katutom sa iya kabuhi diri sa duta padayon nga magapabakod sa amon.”

Media Contact(s):

International: J. R. Brown, Office of Public Information, tel. +1 718 560 5000