Magdiretso sa kaundan

Magdiretso sa segundaryo nga menu

Mga Saksi ni Jehova

Hiligaynon

OKTUBRE 7, 2015
AUSTRIA

Ginbuksan ang Plake Para sa Saksi sa Austria nga Ginpatay sang mga Nazi, Meyor ang Dinapit nga Humalambal

Ginbuksan ang Plake Para sa Saksi sa Austria nga Ginpatay sang mga Nazi, Meyor ang Dinapit nga Humalambal

Si Gabriele Votava, ang meyor sang Meidling District sa Vienna, nga nagahambal sa sini nga okasyon.

VIENNA—Sang Mayo 13, 2015, mga 400 ang nagtambong sa pagbukas sang plake nga gindedikar kay Gerhard Steinacher, nga isa sa mga Saksi ni Jehova, nga ginpatay sang mga Nazi, setentay singko ka tuig na ang nagligad bangod nagpangindi sia nga mangin soldado sang Germany. Ang meyor sang Meidling District sa Vienna nga si Gabriele Votava, amo ang dinapit nga humalambal sang ginbuksan ang plake nga ginbutang sa gua sang balay anay sang pamilya Steinacher sa Lägenfeldgasse 68, sa Meidling, Vienna.

Ang programa may tema nga “Indi ko mahimo nga magpaniro,” base sa ginsiling ni Mr. Steinacher sang nagpetisyon sia nga kaluuyan sia. Ginapakita sining simple nga mga tinaga ang Cristianong mga prinsipio nga importante gid para kay Mr. Steinacher, pareho sang ginsiling ni Jesus sa Mateo 19:19: “Higugmaa ang imo isigkatawo subong sang imo kaugalingon.”

Bilang pamatan-on, si Gerhard isa ka estudyante sang Biblia. Sang 17 anyos sia, nagdesisyon sia nga mangin isa sa mga Saksi ni Jehova. Sang Septiembre 15, 1939, si Mr. Steinacher gin-aresto bangod nagpangindi sia nga magsoldado kag magpanumpa sing katutom kay Hitler. Ginpriso sia sing anom ka semana sa Vienna, kag ginsaylo sa prisuhan sa Moabit sa Berlin, Germany, antes sia ginbista.

Sang Nobiembre 11, 1939, ang una nga adlaw sang una nga pagbista sa iya, si Mr. Steinacher ginkasuhan nga wala nagasuportar sa pagpakig-away sang pungsod kag ginsentensiahan sing kamatayon. Nagpetisyon sia nga kaluuyan base sa iya relihioso nga pagpati. Pero sang Marso 2, 1940, ginsuportahan sang Reichskriegsgericht (Reich Military Court) ang silot sa iya nga kamatayon. Pagligad sang apat ka semana, sang Marso 30, si Mr. Steinacher ginpugutan sing ulo sa prisuhan sang Plötzensee, ang prisuhan nga kilala sa kapintas sini. Disinuebe anyos lamang sia.

Sang nabuksan na ang plake, ang seremonya nagpadayon sa malapit nga Volkshochschule Theater. Nalakip sa seremonya ang eksibit nga nagapakita sang kasaysayan sang pamilya Steinacher. Isa sa mga displey ang gamay nga kahon—nga nakita sang 1976—nga may 28 ka sulat halin kanday Ignatz kag Luise Steinacher para sa ila anak nga si Gerhard sang sa prisuhan sia, kag ang 25 ka postcard kag sulat ni Gerhard para paumpawan ang iya mga ginikanan kag ipabutyag ang malig-on nga panindugan sang ila pamilya.

Sang napatay ang nanay ni Gerhard nga si Luise sang 1976, ini nga kahon sang mga sulat kag postcard nakita sa balay sang mga Steinacher.

Sa report parte sini nga okasyon, ang artikulo sa semanal nga pamantalaan sa Vienna nga Wiener Bezirkszeitung, nagsiling nga isa gid ini ka “espesyal nga pagdumdom” para ang kaisog ni Mr. Steinacher mahibaluan sang tanan. Gindayaw pa gid sang artikulo si Mr. Steinacher paagi sa pagsiling: “Desidido sia nga mapatay bangod sang iya mga prinsipio—mga prinsipio nga iya gid ginasunod sa iya kabuhi.”

Media Contact(s):

International: J. R. Brown, Office of Public Information, tel. +1 718 560 5000

Austria: Johann Zimmermann, tel. +43 1 804 53 45

Germany: Wolfram Slupina, tel. +49 6483 41 3110