Madamo nga tawo ang napatay kag nahalitan sa Ukraine halin sang nagsugod ang inaway sang Pebrero 2022. Naapektuhan gid sa sini ang halos 97,000 ka Saksi ni Jehova nga nagaistar subong sa Ukraine. Ang kadamuon sang mga kauturan nga napatay bangod sa inaway nakalab-ot na sa 65, lakip na diri ang duha ka tigulang nga sister.

Sang Oktubre 26, 2025, napatay ang 87 anyos nga si Sister Oleksandra Nesmashna sang nagtupa ang bomba sa iya gid mismo balay sa banwa sang Kostiantynivka. Nagsiling ang mga kauturan nga isa sia ka maayo kag maabiabihon nga sister. Ang isa ka gulang sa ila kongregasyon nagsiling: “Mapisan gid si Sister Oleksandra sa iya ministeryo, kag handa gid sia pirme nga magbulig sa iban. Labaw sa tanan, palangga gid niya si Jehova.”

Wala pa tatlo ka semana, napatay man ang 76 anyos nga si Sister Valentyna Oleksandrova sang Nobiembre 13, 2025. Naigo sang drone nga may bomba ang iya ginasakyan samtang nagabiyahe sia malapit sa baryo sang Borova. Kilala si Valentyna bilang isa ka mapinalanggaon nga sister kag pirme gid sia nagasugid sa iban sang kamatuoran parte sa Biblia.

Subong, nagahatag sing espirituwal kag praktikal nga bulig ang 18 ka Disaster Relief Committee, mga manugtatap sang sirkito, kag mga gulang sa aton mga kauturan nga naapektuhan sang inaway. Si Ivan, nga isa ka manugtatap sang sirkito kag isa sa mga nagabulig, nagsiling: “May mga kauturan nga nagub-an sang balay kag napatyan sang mga pinalangga. Pero bisan pa sa sini, grabe gid ang ila pagsalig kay Jehova, gani napalig-on gid ako. Pila na ka tuig nga may inaway sa Ukraine, pero determinado ang aton mga kauturan nga magsalig sing bug-os kay Jehova.”

Nasubuan gid kita nga may mga kauturan nga napatay sa Ukraine. Nagapangamuyo kita kay Jehova nga padayon niya nga ‘pahiran ang luha’ sang tanan nga naapektuhan sini nga inaway. Nagasalig man kita sa iya promisa nga sa indi na lang madugay “dulaon niya sing dayon ang kamatayon.”—Isaias 25:8.