Sang Mayo 21, 2025, naghimo sang importante gid nga desisyon ang Supreme Court sang Sri Lanka nga makabulig sa tanan nga nagaistar sa sina nga pungsod nga hilway na nga makasimba. Pagkatapos sang 11 ka tuig nga mga pag-usisa kag mga hearing, nagdesisyon ang Korte nga ginlapas sang mga pulis ang kinamatarong sang apat ka sister may labot sa ila ginapatihan. Ining paborable nga desisyon importante gid sa kadalag-an sang katawhan ni Jehova sa Sri Lanka bangod sa pila ka rason. Isa sa sini amo nga may legal na nga kinamatarong ang mga Saksi ni Jehova nga masugid sa iban ang ila ginapatihan. Dugang pa, mangin sulundan ini sa pagrespeto sa kahilwayan sang relihion sa bilog nga South Asia.

Sang Oktubre 2014, may apat ka sister nga nagabantala sa baryo sang Kirama, sa south sang Sri Lanka. Gulpi lang may akig nga grupo sang mga tawo nga nagpalapit sa ila. Sang nag-abot ang mga pulis, gin-aresto nila ang mga sister imbes ang akig nga grupo. Gin-detain nila ang mga sister sing isa ka gab-i bisan wala man sing may ginpasaka nga kaso kontra sa ila. Ginbutang sila sa lainlain nga selda upod sa bayolente nga mga kriminal. Bisan pa sa sini, nangin kalmado ang mga sister kag nagsalig kay Jehova sina nga tion. Pagkasunod nga adlaw, ginpagua ang mga sister.

Pagligad sang isa ka bulan, sang Nobiembre 2014, ginbasura sang isa ka judge ang ila kaso. Pero, kumbinsido gid ang apat ka sister nga nalapas ang ila kinamatarong, gani nagdesisyon sila nga i-report ini sa Human Rights Commission kag sa Supreme Court sang Sri Lanka. Sang ulihi, sang Mayo 2025, nagdesisyon ang Korte nga nalapas gid man sang mga awtoridad ang kinamatarong sang mga sister kag nagmando nga bayaran sang gobierno kag sang chief sang mga pulis ang mga sister. Sang tapos nga nagdesisyon ang Supreme Court, si Sister Malkanthi nagsiling: “Ini nga desisyon indi lang kadalag-an para sa amon nga apat. Kundi, kadalag-an ini sang tanan nga kauturan sa Sri Lanka para hilway sila nga makasimba. Subong, nangin matuod gid para sa akon ang ginpromisa sang Dios sa Isaias 54:17 nga ‘wala sing ginhimo nga hinganiban nga magmadinalag-on batok sa imo.’”

Upod sa aton mga kauturan sa Sri Lanka, nalipay gid kita sa sining positibo nga desisyon nga nagasuporta sa aton kinamatarong nga padayon nga ‘magkabuhi sing matawhay kag malinong nga may bug-os nga diosnon nga debosyon.’—1 Timoteo 2:2.