Sang Disiembre 18, 2025, si Brother Sergey Melnik ginpagua sa prisuhan sa Russia. Gindesisyunan sia nga guilty kag ginsentensiahan sang asta anom ka tuig nga pagkapriso sang Septiembre 23, 2021. Bangod gin-isip ang tion nga napriso sia samtang ginahulat ang iya bista, natapos na niya ang iya sentensia.

Sang napriso sia, ginsaylo sia sa lainlain nga prisuhan kag ginpaobra sa kusina. Bangod handa sia pirme magbulig kag mapisan sia mag-obra, ginarespeto sia sang iban nga priso kag mga guardia. Bisan pa malayo sia sa iya pamilya kag mabudlay ang iya sitwasyon sa prisuhan, padayon nga nangin malipayon si Sergey.

Antes ginsentensiahan si Sergey, ginsugid niya ang iya ginhimo nga paghanda engkaso nga mapriso sia. Nagsiling sia: “Determinado ako nga magpabilin nga matutom kay Jehova. Gani bisan ano pa kabudlay sang akon sitwasyon, regular ako nga nagabasa sang Biblia kag nagapangamuyo. Kag ginatinguhaan ko pirme nga makaupod ang mga kauturan. Labaw sa tanan, determinado ako nga indi magpadala sa kahadlok. Nagapati ako nga matuod gid ang ginasiling sang 2 Hari 6:16: ‘Indi ka magkahadlok! Kay mas madamo ang aton mga kaupod sangsa mga kaupod nila.’”

Nagapasalamat gid kita kay Jehova kay nakaupod na ni Sergey ang iya pamilya. Sigurado kita nga “nakahibalo si Jehova kon paano luwason sa pagtilaw ang mga tawo nga may diosnon nga debosyon.”—2 Pedro 2:9.