Sang Disiembre 15, 2025, ginpagua sa prisuhan sa Russia si Brother Andrey Stupnikov. Ginsentensiahan sia nga guilty kag ginpriso sang Hunyo 3, 2021. Bangod gin-isip ang tion nga ginpriso sia samtang ginahulat ang iya bista kag ang tion nga gin-house arrest sia, natapos na niya ang iya sentensia.

Sobra lima ka tuig nga indi magkaupod si Andrey kag ang iya asawa nga si Olga. Amo ini ang ginsiling ni Olga sang ginpamalandungan niya ang tion nga indi sila magkaupod: “Sa sulod sang 32 ka tuig nga pag-asawahay namon ni Andrey, wala pa gid kaagi nga dugay kami nga indi updanay. Pamatyag ko, daku gid ang nadula sa akon. Pero nakabulig sa akon ang pangamuyo para maghaganhagan ang akon kabalaka. Sa sini nga mga tion, daw pareho lang nga ginahakos ako ni Jehova.”

Nagsiling pa si Olga: “Ginsugid sa akon ni Andrey nga madamo sia sing natun-an sang ara sia sa prisuhan. Nagsiling sia nga wala sia nagpokus sa mga kabudlayan nga iya naagyan, kundi sa kon paano ini makabulig sa iya nga mapakita ang maayo nga mga kinaiya. Halimbawa, narealisar niya nga kinahanglan niya nga mangin mapainubuson pa gid, magpabilin nga malipayon, kag pirme dumdumon nga importante sia kay Jehova. Kinahanglan gid niya ini nga mga kinaiya kay ang mga ara sa prisuhan, ginapakanubo kag ginapabatyag nga wala sila sing pulos.”

Nalipay gid kita nga updanay na liwat si Andrey kag si Olga. Kag makasalig kita nga sa bulig ni Jehova, mabatas man naton ang aton mga kabudlayan nga may kalipay.—Salmo 63:7.