Sang Disiembre 2025, isa ka gatos ka tuig na halin sang gin-umpisahan ang pagbantala sa Mozambique. Bisan pa nakaeksperiensia sang madamo nga kabudlayan ang mga Saksi ni Jehova sa sini nga pungsod sa Africa, padayon nila nga ginbuligan ang mga tawo nga matun-an ang mga kamatuoran sa Biblia.

Sang Disiembre 1925, nag-abot si Brother Albino Mhelembe sa Mozambique halin sa South Africa. Pag-abot niya sa Marracuene, a ginsugid niya ang parte sa Ginharian sang Dios sa mga tawo didto kag maayo gid ang nangin resulta sini. Madamo ang nangin interesado nga magtuon sa Biblia, naghimo sing mga pagbag-o sa ila kabuhi, kag sang ulihi nagbantala man sila sa iban. Ang mga ginikanan ni Sister Carmina Mahlanguana amo ang isa sa una nga nagbaton sang kamatuoran sa Mozambique. Amo ini ang iya ginsiling parte sa mga manugbantala sadto: “Mapisan gid sila nga nagbantala sa mga baryo. Halimbawa, nagapangita anay sila sang daku nga kahoy para may handong sila kon mag-istorya sila sa mga tawo parte sa Biblia. Dayon kon magpamalaybalay na sila, ginahambalan nila ang mga tawo nga magkadto sa sini nga kahoy kag diri nila istoryahan ang parte sa Biblia.” Pagligad sang napulo ka tuig, madamo pa gid ang nagbaton sang kamatuoran sa Biblia kag nagbantala man sila sa iban.

Pero sugod sang mga 1940, nakaeksperiensia sang grabe nga paghingabot ang mga Saksi ni Jehova sa Mozambique sa sulod sang madamo nga tuig. Ang iban ginpahalin sa pungsod, may mga ginpriso, kag ginpaantos pa gani. Halimbawa, sang 1946, si Brother Janeiro Dede nga nagaalagad bilang espesyal payunir sa Mozambique, gin-aresto kag sang ulihi ginpahalin sa pungsod kag gindala sa São Tomé. Sang 1975, naglala pa gid ang paghingabot sang ginsilingan sang mga awtoridad ang mga tawo sa bilog nga pungsod nga pamatukan ang mga Saksi. Sa sulod sang 12 ka tuig, madamo nga Saksi ang ginpilit nga mag-istar sa prisuhan sa Carico, Mozambique. Bisan pa sa sining mabudlay nga kahimtangan, nagpabilin nga matutom ang aton mga kauturan. Patago sila nga nagahiwat sang mga miting kag nagabantala. Amo ini ang ginsiling ni Brother Filipe Matola nga napriso sadto: “Ginhanas kami kon paano gamiton sing epektibo ang Biblia sa pagbantala kag sa pagtudlo. . . . Ginapalig-on man ang mga bag-uhan nga mangin maisog kag batason ang mga pagtilaw kag pagkapriso.”

Pero sang Pebrero 11, 1991, pagligad sang halos 50 ka tuig nga paghingabot, legal na nga ginkilala ang mga Saksi ni Jehova sa Mozambique. Dayon may ginpadala nga mga misyonero nga naggradweyt sa Gilead. Bangod sini, nangin madasig ang pagdamo sang mga manugbantala. Pagligad sang duha ka tuig, ginsugdan ang pagtukod sang bag-o nga branch office para madumalahan ang pagbantala sa Mozambique. Subong, ang mga kauturan sa branch office sa Maputo naga-translate sang mga publikasyon kag mga video nga nabase sa Biblia sa halos 30 ka lenguahe nga ginagamit sang mga 35 ka milyon nga pumuluyo sa Mozambique.

Nalipay gid kita nga ginapakamaayo ni Jehova ang mga 109,000 naton ka kauturan nga nagaalagad sa 2,109 ka kongregasyon sa Mozambique. Ang ila katutom sa sulod sang isa ka gatos ka tuig nagapalig-on sa aton nga “nakahibalo si Jehova kon paano luwason sa pagtilaw ang mga tawo nga may diosnon nga debosyon.”—2 Pedro 2:9.