Sang Disiembre 18, 2025, ika-75 na nga anibersaryo sang importante nga desisyon sang Supreme Court sang Canada sa kaso nga Aimé Boucher v. His Majesty The King. Bangod sa sining importante nga desisyon, naproteksionan ang kahilwayan sa pagsimba sang mga Saksi ni Jehova, kag “daku ang nabulig sini sa kahilwayan sa paghambal sang tanan nga taga-Canada.” a

Sugod sang 1940, ginhingabot kag gin-aresto ang ginatos ka Saksi ni Jehova sa Quebec bangod sa ila pagbantala. Sang Nobiembre 1946, ang tanan nga Saksi sa Quebec maisog nga nagpanagtag sang apat ka pahina nga tract nga Quebec’s Burning Hate for God and Christ and Freedom Is the Shame of All Canada sa sulod sang 16 ka adlaw. Mabasa sa sini nga tract ang parte sa pagbalewala sang gobierno sa kinamatarong sang mga taga-Canada sa kahilwayan sa pagsimba. Ginasugid man sini ang detalyado nga impormasyon kon paano ginasuportahan sang mga lider sang simbahan, sang mga pulis, kag sang pila ka grupo ang pagpamintas sa aton mga kauturan sa Quebec. Ginkabig sang gobierno sang Quebec nga pagrebelde batok sa ila ang pagpanagtag sini nga tract, amo nga ginkasuhan ang mga Saksi sing seditious libel.

Sang Nobiembre 26, 1946, Si Brother Aimé Boucher kag ang iya mga bata nga babayi nga sanday Gisèle, 21 anyos, kag Lucille, 12 anyos, gin-aresto kag ginpriso kay nagpanagtag sila sang tract. Sang ginbista sila sang 1947, nagdesisyon ang korte nga guilty si Aimé kag si Gisèle sa kaso nga pagrebelde batok sa gobierno. Ginsentensiahan si Aimé sing isa ka bulan nga pagkapriso. Ginsuportahan sang Court of Appeal sang Quebec ini nga desisyon, amo nga ginpasaka ni Aimé ang iya kaso sa Supreme Court sang Canada.

Sang ulihi, nagpasugot ang Supreme Court nga bistahon ini nga kaso. Bangod sini, madamo nga taga-Canada ang namangkot: Husto bala nga kabigon nga rebelde ang isa kay nagsiling sia nga ginahingabot sia bangod sa iya relihion? Sang ginbinagbinag sang Supreme Court ang tract, nagsiling ini nga ang mensahe sini indi pagrebelde batok sa gobierno, kundi ginabuligan sini ang mga tawo nga mangin mahidaiton kag gamiton ang ila ikasarang sa pagpangatarungan. Bangod sini, sang Disiembre 18, 1950, ginbasura sang Supreme Court ang kaso ni Aimé, kag nagdesisyon ini nga wala sia sing sala. Bangod man sini, ginbasura sang gobierno ang mga kaso sang sobra 100 pa ka Saksi ni Jehova.

Nalipay gid ang mga tawo sa bilog nga Canada sa sini nga desisyon. Ang isa ka artikulo nga The Peterborough Examiner nagsiling: “Ang kahilwayan sang isa ka tawo nagakahulugan sang kahilwayan sang bilog nga pungsod.” Sang 2017, si Dr. Janet Epp Buckingham, nga isa ka professor kag eksperto sa legal nga mga butang, nagsiling nga ang paghingabot sa mga Saksi ni Jehova sa Quebec nakabulig para amligan ang kahilway sa pagsimba sang mga tawo sa Canada.

Subong, ini nga desisyon sang korte padayon nga nagaamlig sa kinamatarong sang tanan nga pumuluyo sa Canada. Lakip sa ila ang sobra 125,000 ka Saksi ni Jehova nga nagaalagad sa sobra 1,150 ka kongregasyon sa bilog nga pungsod.

Samtang ginapamalandungan naton ini nga kadalag-an, gusto naton nga padayon nga ‘paiwagon ang aton kapawa sa atubangan sang mga tawo’ kag dayawon si Jehova.—Mateo 5:16.